Chicken: ఆడవాళ్లు చికెన్ తినకూడదా? తింటే హార్మోన్ల సమస్యలు వస్తాయా?

Chicken: ఆడవాళ్లు చికెన్ తినవచ్చా? తినకూడదా? సోషల్ మీడియాలో మహిళలు చికెన్ తినకూడదనమే ప్రచారం ఎంతవరకు నిజం? అసలు డాక్టర్లు ఏం చెబుతున్నారు? చికెన్ తినడం వల్ల వచ్చే లాభాలు నష్టాలు ఏమిటి?

ఆడవాళ్లు చికెన్ తినకూడదా?

ఇప్పుడు సోషల్ మీడియాలో  ఆడవాళ్లు చికెన్ తినకూడదు అనే పోస్టులు వైరల్ అవుతున్నాయి. మహిళలు చికెన్  తింటే హార్మోన్ల సమస్యలొస్తాయని, PCOS పెరుగుతుందని, బరువు పెరిగిపోతారని ఎన్నో పోస్టులు ఇప్పుడు సోషల్ మీడియాలో కనిపిస్తున్నాయి. ఇవి చూసి కొంతమందిలో భయం పెరిగిపోతోంది. మరికొంతమంది ఏకంగా చికెన్ తినడమే మానేస్తున్నారు. ఈ విషయంపై అసలు వైద్యులు ఏం చెబుతున్నారో తెలుసుకోండి.

మహిళలకు చికెన్ తింటే ఏమవుతుంది?

చికెన్‌ పిల్లలు, పెద్దలు, మహిళలు, పురుషులు అందరూ తినాల్సిన ఆహారం. ఇందులో అధిక నాణ్యత గల ప్రోటీన్ ఉంటుంది. మహిళలకు  ప్రోటీన్ చాలా అవసరం. ఇది కండరాలను బలోపేతం చేస్తుంది, కణాల మరమ్మతుకు, రోగనిరోధక శక్తిని పెంచడానికి సహాయపడుతుంది. అంతేకాదు, చికెన్‌లో ఉండే విటమిన్ B6, విటమిన్ B12, నియాసిన్, ఫాస్పరస్, సెలీనియం, జింక్ వంటి పోషకాలు జీవక్రియ, నాడీ వ్యవస్థ పనితీరు, రక్త కణాల ఏర్పాటుకు తోడ్పడతాయి. రుతుస్రావం కారణంగా ఐరన్ లోపంతో బాధపడే మహిళలకు, సమతుల్య ఆహారంలో భాగంగా చికెన్ తీసుకోవడం మంచి పోషణను అందిస్తుంది.

హార్మోన్ సమస్యలకు, చికెన్‌కు సంబంధం?

నిజానికి చికెన్ తినడం వల్ల నేరుగా హార్మోన్ల సమస్యలు వస్తాయని చెప్పడానికి ఎలాంటి ఆధారాలు లేవు.  PCOS, హార్మోన్ల మార్పులు, ఊబకాయం వంటివి జన్యువులు, ఇన్సులిన్ రెసిస్టెన్స్, జీవనశైలి, వ్యాయామం లేకపోవడం, అధిక కేలరీల ఆహారం వంటి అనేక కారణాల వల్ల వస్తాయి. వీటన్నింటికీ చికెన్‌ను కారణంగా చెప్పడం ఒక అపోహ మాత్రమే.

బ్రాయిలర్ కోళ్లకు హార్మోన్ ఇంజెక్షన్లు ఇస్తారు అనే ప్రచారం కూడా ఉంది. కానీ, చాలా దేశాల్లో వాణిజ్య కోళ్ల పెంపకంలో హార్మోన్ల వాడకం చట్టవిరుద్ధం. కోళ్లు వేగంగా పెరగడానికి జన్యుపరమైన ఎంపిక, నాణ్యమైన దాణా, ఆధునిక పెంపకం వంటి పద్ధతులనే పాటించాలి.

చికెన్ ఎలా తినాలి?

చికెన్‌ను ఆరోగ్యకరమైన పద్ధతిలో వండుకుని తింటే మంచిది.  వారానికి 2 నుంచి 3 సార్లు చికెన్ తినవచ్చు.  ఉడకబెట్టి, గ్రిల్ చేసి లేదా ఆవిరిపై వండి తినడం అన్ని  విధాలా ఆరోగ్యకరం. ఎక్కువ నూనెలో వేయించిన , ప్రాసెస్ చేసిన చికెన్ వంటకాలను తినడం ఏమాత్రం మంచిది కాదు. కూరగాయలు, తృణధాన్యాలు, పండ్లతో కలిపి తింటే అది సంపూర్ణ సమతుల్య ఆహారం అవుతుంది.