Rent A Boyfriend : ఏమిటీ.. అమ్మాయిలకు అద్దె భాయ్ ఫ్రెండ్ సర్వీసా.! రెంట్ ఎంతో తెలుసా..?

ఇది నిజంగా కలికాలమే... ఆన్ లైన్ లో అహార పదార్థాలు దొరికినంత ఈజీగా అమ్మాయిలకు అబ్బాయిలు అద్దెకు దొరుకుతున్నారు. అమెరికా వంటి దేశాల్లో కూడా పెద్దగా కనిపించని భాయ్ ఫ్రెండ్ రెంట్ కల్చర్ మనదగ్గర వచ్చేసింది. 

ఇండియాలో అద్దె భాయ్ ఫ్రెండ్ సర్వీస్..

బాయ్‌ఫ్రెండ్ లేడని బాధపడే అమ్మాయిలకు గుడ్ న్యూస్..! రోజువారీ అద్దెకు బాయ్‌ఫ్రెండ్‌ను ఇచ్చే సర్వీస్ ఇప్పుడు మన దేశంలోనూ వచ్చేసింది. వినడానికి షాకింగ్‌గా ఉన్నా ఇది నిజం. రోజుకు కేవలం 1500 రూపాయలు చెల్లిస్తే చాలు, మీకు నచ్చినట్టుగా తోడుండే బాయ్‌ఫ్రెండ్‌ను పొందొచ్చు. జపాన్‌లో వైరల్ అయిన ఈ కాన్సెప్ట్ ఇప్పుడు ఇండియాలో, ముఖ్యంగా ఢిల్లీలో మొదలైనట్లు తెలుస్తోంది. ఇన్‌స్టాగ్రామ్ కంటెంట్ క్రియేటర్ ఇషా భల్లా ఈ సర్వీస్‌కు సంబంధించిన తన అనుభవాన్ని షేర్ చేయడంతో ఈ విషయం బయటపడింది.

భాయ్ ఫ్రెండ్ ని ఎలా అద్దెకు తీసుకోవాలి..?

ఇంతకీ ఈ సర్వీస్ ఎలా పనిచేస్తుందంటే.. Kopartner.in అనే వెబ్‌సైట్ ద్వారా ఒక అబ్బాయిని ఫ్రెండ్‌గా బుక్ చేసుకున్నట్లు ఇషా తన వీడియోలో చెప్పింది. ఈ వెబ్‌సైట్‌ 'రెంట్-ఎ-బాయ్‌ఫ్రెండ్' అని నేరుగా చెప్పకపోయినా కాన్సెప్ట్ మాత్రం అదే. ఇషా చెప్పిన దాని ప్రకారం, ముందుగా Kopartner.in వెబ్‌సైట్‌లో లాగిన్ అయి ఒక ప్రొఫైల్ క్రియేట్ చేసుకోవాలి. ఆ తర్వాత మన అవసరాన్ని బట్టి వేర్వేరు కేటగిరీల నుంచి ఎంచుకోవచ్చు.

ఉదాహరణకు వృద్ధులను చూసుకోవడానికి, టైమ్ పాస్ చేయడానికి, క్లబ్బింగ్, సినిమా, షాపింగ్, ట్రావెల్ వంటి వాటికి పార్ట్‌నర్‌గా, మెడికల్ సపోర్ట్ కోసం, ఇంటి పనుల కోసం... ఇలా రకరకాల ఆప్షన్లు ఉంటాయి. వీటిలో మనకు ఏ అవసరానికి మనిషి కావాలో ఆ ఆప్షన్‌ను ఎంచుకోవచ్చు. ఒక రోజుకు సుమారు 1,000 నుంచి 1,500 రూపాయల వరకు ఖర్చవుతుంది. చేసే పనిని బట్టి ఈ రేటులో మార్పులు ఉండొచ్చు. ఆన్‌లైన్‌లో బుక్ చేసుకుని, లొకేషన్ ఇస్తే చాలు... మనకు కావాల్సిన పార్ట్‌నర్ ఆ లొకేషన్‌కు వచ్చేస్తాడు.

ఇలాగే ఇషా భల్లా షాపింగ్ కోసం ఒక కో-పార్ట్‌నర్‌ను బుక్ చేసుకుంది. ఆన్‌లైన్‌లో బుక్ చేశాక, చెప్పిన లొకేషన్‌లో ఆ పార్ట్‌నర్ తనను కలిశాడని, షాపింగ్‌లో సహాయం చేశాడని, బ్యాగులు మోశాడని, తను చెప్పేదంతా శ్రద్ధగా విన్నాడని ఇషా తన ఇన్‌స్టాగ్రామ్ వీడియోలో పంచుకుంది.

అద్దె భాయ్ ఫ్రెండ్ సర్వీస్ పై నెటిజన్ల రియాక్షన్...

కంటెంట్ క్రియేటర్ ఇషా భల్లా అద్దె భాయ్ ఫ్రెండ్ వీడియో వైరల్ అవ్వడంతో, నెటిజన్లు రకరకాలుగా కామెంట్లు పెడుతున్నారు. ఇండియాలో ఇలాంటి సర్వీస్ రావడంపై చాలామంది ఆశ్చర్యం వ్యక్తం చేస్తున్నారు. "ఇదంతా నిజమేనా?", "గర్ల్‌ఫ్రెండ్‌ను కూడా అద్దెకు ఇస్తారా?", "మేం రెడీ, మా సీవీ ఎక్కడికి పంపాలి?" అంటూ కొందరు సరదాగా అడుగుతున్నారు. "అంట్లు తోమడానికి, బట్టలు ఉతకడానికి కూడా బాయ్‌ఫ్రెండ్ దొరుకుతాడా?" అని కొందరు ట్రోల్ చేస్తుంటే, మరికొందరు ఈ సర్వీస్ ఎంతవరకు నమ్మదగినది అని సందేహాలు వ్యక్తం చేస్తున్నారు.