మనం తీసుకునే ప్రతి ఆహారం ఒకే టైంలో జీర్ణం కాదు. నిపుణుల ప్రకారం ఒక ఆహారం పూర్తిగా జీర్ణం కావడానికి 24 నుంచి 72 గంటల వరకు టైం పడుతుంది. పండ్లు, కూరగాయలు, అన్నం, పప్పులు, మాంసాహారం ఇలా ఒక్కో ఆహారానికి ఒక్కో విధమైన జీర్ణక్రియ ఉంటుంది. సాధారణంగా నీరు కడుపు నుంచి చాలా త్వరగా బయటకు వెళ్లిపోతుంది. అయితే ఘన ఆహార పదార్థాలకు ఎక్కువ సమయం పడుతుంది. పుచ్చకాయ, బొప్పాయి వంటి పండ్లు తేలికగా జీర్ణమయ్యే ఆహారాల్లోకి వస్తాయి. అయితే పండ్లలోని ఫైబర్, వాటిని ఇతర ఆహారాలతో కలిపి తినడం వంటి అంశాల వల్ల జీర్ణక్రియ సమయం మారవచ్చు.
అన్నం, ఇడ్లీ, ఉప్మా వంటి కార్బోహైడ్రేట్లు ఎక్కువగా ఉండే ఆహారాలు సాధారణంగా కడుపు నుంచి చిన్న ప్రేగుల్లోకి వెళ్లడానికి కొన్ని గంటలు పడుతుంది. పప్పులు, శనగలు, రాజ్మా వంటి ప్రోటీన్, ఫైబర్ అధికంగా ఉండే పదార్థాలు కొంత ఎక్కువ సమయం తీసుకోవచ్చు. గుడ్లు, చేపలు, చికెన్, మటన్ వంటి ప్రోటీన్ పదార్థాలు కూడా జీర్ణం కావడానికి వాటి తయారీ విధానం, కొవ్వు శాతం, పరిమాణాన్ని బట్టి సమయం మారుతుంది.