Home Decor: ఇకపై పాత చున్నీలు పారేయకండి..ఇలా చేస్తే ఇంటికి లగ్జరీ ఇంటీరియర్ లుక్ గ్యారెంటీ

Home Decor: బట్టలు, డ్రెస్సులు పాతవైతే పడేస్తాం. లేదంటే ఇల్లు తుడుచుకోవడానికో, మరేదానికో వాడేస్తాం. ఒకవేళ పాత డ్రెస్సులకు చున్నీలుంటే మాత్రం ఇకపై పడేయకండి. వాటితోనే ఇంటికి ఓ కొత్త లగ్జరీ ఇంటీరియర్ లుక్ తీసుకురావొచ్చు. దానిపై ఓ లుక్కేయండి.

పాత చున్నీలతోనే ఇంటికి కాస్ట్లీ ఇంటీరియర్ లుక్

మామూలుగా ఇంట్లో పాత బట్టలు, పాత డ్రెస్సులు ఉంటే పడేస్తాం. లేదంటే ఎవరికైనా ఇచ్చేస్తాం, మరీ కాదనుకుంటే ఇంట్లో బూజు దులపడానికి, ఇల్లు తుడవడానికి వాడేస్తాం. పోనీ దాచుకుంటే వాటితోనే సగం బీరువాలు, అల్మరాలు నిండిపోతాయి. అలా కాకుండా కాస్త క్రియేటివిటీ యాడ్ చేస్తే...పాత చున్నీలతోనే ఇంటికి ఒక కాస్ట్లీ ఇంటీరియర్ లుక్ తేవొచ్చు. టీ పాయ్, డైనింగ్ టేబుల్, కిటికీలను కొత్తవాటిలా మార్చేయొచ్చు. అదేలాగో ఇక్కడ చూసేయండి. 

గ్లాస్ జార్‌లను కవర్ చేయండి

పాత చున్నీ క్లాత్‌తో గ్లాస్ జార్ లేదా ఫ్లవర్ వాజ్‌ను కవర్ చేయండి. అందులో ఫెయిరీ లైట్స్ లేదా పువ్వులు పెట్టి టేబుల్‌పై అలంకరిస్తే మరింత అందంగా కనిపిస్తుంది.

కుషన్, టేబుల్ కవర్ మ్యాచింగ్ చేయండి

ఒకే చున్నీతో చిన్న కుషన్ కవర్లు, టేబుల్ కవర్ తయారు చేయండి. ఈ మ్యాచింగ్ సెటప్ మీ లివింగ్ రూమ్‌కు మంచి డిజైనర్ లుక్ ఇస్తుంది. 

ప్లేస్‌మ్యాట్స్ తయారు చేయండి

పాత కాటన్ లేదా సిల్క్ చున్నీని చిన్న చిన్న ముక్కలుగా కట్ చేసి ప్లేస్‌మ్యాట్స్ తయారు చేసుకోండి. ఇవి డైనింగ్ టేబుల్‌కు కలర్‌ఫుల్, యూనిక్ లుక్ ఇస్తాయి. ముఖ్యంగా సిల్క్ చున్నీతో చేసిన ప్లేస్‌మ్యాట్స్ చాలా గ్రాండ్‌గా కనిపిస్తాయి.

టేబుల్ రన్నర్ తయారు చేయండి

మీ దగ్గర బెనారసీ, నెట్ లేదా ప్రింటెడ్ చున్నీ ఉంటే, దాన్ని టేబుల్ రన్నర్‌గా వాడండి. సెంటర్ టేబుల్ లేదా డైనింగ్ టేబుల్‌పై దీన్ని పరిస్తే ఆ ఏరియా మొత్తం చాలా ఎలిగెంట్‌గా కనిపిస్తుంది. చున్నీని కట్ చేసి, దాని అంచులకు లేస్ వర్క్ కూడా చేయొచ్చు.

DIY సెంటర్‌పీస్ తయారు చేయండి

మిర్రర్ వర్క్ లేదా ఎంబ్రాయిడరీ ఉన్న చున్నీతో ఒక ట్రే లేదా చెక్క బాక్స్‌ను అలంకరించండి. దానిపై క్యాండిల్ లేదా ఫ్లవర్ పాట్ పెడితే, ఆకర్షణీయమైన సెంటర్‌పీస్ రెడీ అవుతుంది.