ల్యాప్ టాప్ ముందు పని చేసి అలసిపోతున్నారా? కచ్చితంగా చేయాల్సిన వ్యాయామాలు

లాప్‌టాప్ ముందు ఎక్కువ సేపు కూర్చుని పనిచేసేవారికి మెడ, భుజాలు, మణికట్టు, వెన్నునొప్పి వంటి సమస్యలు వస్తాయి. ఈ నొప్పుల నుండి ఉపశమనం పొందడానికి కొన్ని సులభమైన వ్యాయామాలు ఇక్కడ ఉన్నాయి.

ల్యాప్ టాప్ ముందు ఎక్కువసేపు పని చేస్తే వచ్చే సమస్యలు..

ఈ రోజుల్లో దాదాపు అందరివీ కూర్చొని చేసే పనులే. రోజుకి 8 నుంచి 10 గంటల వరకు  ల్యాప్ టాప్ ముందు కూర్చొని పని చేస్తూ ఉండాల్సిన పరిస్థితి. దీని వల్ల  చాలా ఆరోగ్య సమస్యలు వచ్చే అవకాశం ఉంది.

మెడ, భుజాల నొప్పి: లాప్‌టాప్ వాడకం వల్ల మెడ, భుజాల నొప్పులు వస్తాయి.

వెన్నునొప్పి: సరిగ్గా కూర్చోకపోవడం వల్ల వెన్నునొప్పి వస్తుంది.

మణికట్టు నొప్పి: మౌస్, కీబోర్డ్ వాడకం వల్ల మణికట్టు నొప్పులు వస్తాయి.

కళ్ళు అలసిపోవడం: స్క్రీన్ ఎక్కువసేపు చూడటం వల్ల కళ్ళు అలసిపోతాయి.

తలనొప్పి:  ఎక్కువ సేపు స్క్రీన్ చూస్తూ పని చేయడం వల్ల తలనొప్పి కూడా వస్తుంది.

మానసిక ఒత్తిడి: శారీరక నొప్పుల వల్ల మానసిక ఒత్తిడి పెరుగుతుంది.

నొప్పులు తగ్గించే వ్యాయామాలు..

నేరుగా కూర్చొని తలను నెమ్మదిగా ఒక భుజం వైపు వంచాలి. తర్వాత మెల్లగా ముందుకు వంచి, రెండో భుజం వైపు వంచాలి. ఇలా ఐదు సార్లు చేయాలి.

వృత్తాకారంలో కూడా తిప్పవచ్చు. ఒక భుజం వైపు వంచి, వెనుకకు వంచి, రెండో భుజం వైపు వంచి, ముందుకు తీసుకురావాలి. ఇలా ఐదు సార్లు ఒక దిశలో, ఐదు సార్లు వ్యతిరేక దిశలో చేయాలి.

భుజం నొప్పి తగ్గించే వ్యాయామం.

భుజాలను పైకి లేపి, కిందకి దించాలి. 10 సార్లు చేయాలి. ముందుకు, వెనుకకు వృత్తాకారంలో తిప్పాలి (5 సార్లు).

భుజాలను సాగదీయడం:

చేతులను వెనుకకు కలిపి పట్టుకోవాలి. పైకి లేపి భుజాలను సాగదీయాలి. 15-20 సెకన్లు ఉంచాలి. ఒక చేతిని ఎదురు భుజం మీద ఉంచి, రెండో చేతితో పట్టుకుని లాగాలి. 15-20 సెకన్లు ఉంచి, రెండో చేతితో చేయాలి.

ఛాతిని వెడల్పు చేయాలి

 ఫోటోలో చూపించినట్లుగా.. చేతులు వెనక్కి పట్టుకుని ముందుకు వంగి ఛాతీని సాగదీయాలి. 20-30 సెకన్లు ఉంచాలి. లేదా చేతులను వెనుకకు కలిపి పట్టుకుని భుజాలను వెనక్కి లాగి ఛాతీని వెడల్పు చేయాలి.

వెన్నెముక నొప్పి తగ్గాలంటే..

కుర్చీలో కూర్చొని ఒక వైపు తిరగాలి. ఒక చేత్తో కుర్చీని, రెండో చేత్తో తొడను పట్టుకోవాలి. 20-30 సెకన్లు ఉంచి, రెండో వైపు చేయాలి. ఇలా రెగ్యులర్ గా చేయడం వల్ల వెన్నెముక నొప్పి నుంచి ఉపశమనం లభిస్తుంది.

చేతులకు వ్యాయామం..

చేతిని చాచి, అరచేతిని పైకి తిప్పాలి. రెండో చేతితో వేళ్ళను పట్టుకుని కిందకి వంచాలి. 15-20 సెకన్లు ఉంచాలి. అరచేతిని కిందకి తిప్పి, వేళ్ళను పైకి వంచాలి. 15-20 సెకన్లు ఉంచి, రెండు చేతులతో 2-3 సార్లు చేయాలి.

వేళ్ళ వ్యాయామం:

చేతులను చాచి, వేళ్ళను వీలైనంత వెడల్పుగా విస్తరించాలి. తర్వాత వేళ్ళను ముడి వేయాలి. 10-15 సార్లు చేయాలి. ప్రతి వేలును ఇతర వేళ్ళతో కలిపి నెమ్మదిగా లాగాలి.

కంటికి వ్యాయామం..

దూరంగా ఉన్న వస్తువును 20 సెకన్లు చూడాలి. తర్వాత దగ్గరగా ఉన్న వస్తువును 20 సెకన్లు చూడాలి. 5 సార్లు చేయాలి. కళ్ళను వృత్తాకారంలో తిప్పాలి (5 సార్లు కుడివైపు, 5 సార్లు ఎడమవైపు). కళ్ళను వేగంగా రెప్పవేయాలి (20 సార్లు).

నడక..

ప్రతి 30-45 నిమిషాలకు ఒకసారి లేచి కొన్ని నిమిషాలు నడవాలి. నీళ్ళు తాగడానికి, బాత్రూంకి వెళ్ళడానికి లేవాలి.

ఇతర సూచనలు:

సరిగ్గా కూర్చోవడం: వెన్నెముక నిటారుగా, భుజాలు వదులుగా ఉండాలి. కాళ్ళు నేల మీద ఉండాలి.

మానిటర్ ఎత్తు: మానిటర్ కళ్ళకు సమానంగా ఉండాలి. తలను ఎక్కువగా వంచాల్సిన అవసరం లేదు.

తగినంత వెలుతురు: పనిచేసే చోట తగినంత వెలుతురు ఉండాలి.

నీళ్ళు త్రాగాలి: శరీరంలో నీటి శాతం సరిగ్గా ఉండాలి.

తగినంత విశ్రాంతి: రాత్రి 7-8 గంటలు నిద్రపోవాలి.