తులసి టీ ఆరోగ్యానికి ఇంత మేలు చేస్తుందా?

ఉదయం లేవగానే ఒక కప్పు టీ తాగితే ఆ హాయే వేరబ్బా.. ఛాయ్ లవర్స్ కే తెలుసు ఆ ఫీలింగ్ ఎలా ఉంటదో. మనకు చాలా రకాల టీలో అందుబాటులో ఉన్నాయి. కానీ వాటిలో హెల్తీ టీ ఏంటీ? చలికాలంలో బెస్ట్ టీ ఏంటో మీకు తెలుసా?

సాధారణంగా చలికాలంలో రోగనిరోధక శక్తిని బలోపేతం చేసుకోవడం చాలా ముఖ్యం. లేకపోతే, అనారోగ్యానికి గురయ్యే ప్రమాదం ఎక్కువ. మరి ఈ సీజన్‌లో రోగనిరోధక శక్తిని బలోపేతం చేయడానికి 'తులసి టీ' ఎలా ఉపయోగపడుతుందో మీకు తెలుసా?

తులసి టీ తో..

హిందూ సాంప్రదాయంలో తులసిని దేవతగా పూజిస్తారు. అంతేకాదు తులసిలో అనేక ఔషధ గుణాలున్నాయి. తులసి ఆకు జలుబు, దగ్గు, జీర్ణకోశ, తలనొప్పి లాంటి అనేక సమస్యలకు ఔషధంగా పనిచేస్తుంది. ముఖ్యంగా ఇది డయాబెటిస్, ఆస్తమాకు చాలా మంచిది. చాలా మంది తులసిని వివిధ రకాలుగా తీసుకుంటారు. ఈ చలికాలంలో ప్రతిరోజూ ఉదయం తులసి టీ తాగడం వల్ల కలిగే ఆరోగ్య ప్రయోజనాలు ఏంటో ఇప్పుడు చూద్దాం.

తులసి టీ ప్రయోజనాలు

రోగనిరోధక శక్తి పెరుగుతుంది:
చలికాలంలో శరీరం ఆరోగ్యంగా ఉండాలంటే రోగనిరోధక శక్తిని పెంచుకోవడం అవసరం. దీనికి తులసి చాలా ఉపయోగకరంగా ఉంటుంది. తులసిలో యాంటీఆక్సిడెంట్లు ఉండటం వల్ల ఇవి కాలానుగుణ ఇన్ఫెక్షన్ల నుంచి శరీరాన్ని రక్షిస్తాయి.

జలుబు, దగ్గుకు మంచిది:
చలికాలంలో జలుబు, దగ్గు, తలనొప్పి, గొంతు నొప్పి వంటి సమస్యలు రావడం సహజం. తులసి టీ తాగితే దానిలోని బాక్టీరియా నిరోధక లక్షణాలు వీటి నుంచి ఉపశమనం కలిగించడమే కాకుండా, శరీరాన్ని వెచ్చగా ఉంచుతాయి.

బరువు తగ్గడానికి..

తులసి టీని క్రమం తప్పకుండా తాగితే బరువు తగ్గడానికి చాలా సహాయపడుతుంది. తులసిలోని లక్షణాలు శరీరంలోని వ్యర్థ పదార్థాలను బయటకు పంపి, కొవ్వును కరిగించడానికి సాయపడతాయి. పొట్టలోని కొవ్వును ఇట్టే కరిగిస్తాయి.

మానసిక ఒత్తిడిని తగ్గిస్తుంది:
చలికాలంలో తరచుగా మానసిక ఒత్తిడి, ఆందోళన కలుగుతుంది. తులసి టీ తాగితే మానసిక ఒత్తిడిని తగ్గిస్తుంది. ఆందోళన లక్షణాలు కూడా తగ్గుతాయి. తులసిలో మానసిక ఒత్తిడిని తగ్గించే లక్షణాలు ఉన్నాయి.

మోకాళ్ల నొప్పి తగ్గుతుంది:
చలికాలంలో మోకాళ్ల నొప్పి, కీళ్ల నొప్పులు రావడం సాధారణం. కాబట్టి ఈ సీజన్‌లో క్రమం తప్పకుండా తులసి టీ తాగితే మోకాళ్ల నొప్పి నుంచి ఉపశమనం లభిస్తుంది. తులసిలోని అలెర్జీ నిరోధక లక్షణాలు మోకాళ్ల నొప్పిని తగ్గిస్తాయి.

తులసి టీ తయారీ విధానం

దీనికోసం ముందుగా ఒక పాత్రంలో రెండు కప్పుల నీళ్లు పోసి మరిగించాలి. నీళ్లు బాగా మరిగిన తర్వాత, 10-12 తులసి ఆకులు, 1/2 అంగుళం అల్లం (తురిమినది)  4-5 నల్ల మిరియాలు (పగలగొట్టినవి) వేసి బాగా మరిగించాలి. నీళ్లు సగం అయిన తర్వాత, ఒక కప్పులో పోసుకోవాలి. తీపి కోసం తేనె లేదా బెల్లం కలుపుకోవచ్చు. నచ్చితే కొన్ని చుక్కల నిమ్మరసం కూడా కలుపుకోవచ్చు. అంతే తులసి టీ సిద్ధం అవుతుంది.

గమనిక :
తులసి టీ తాగడానికి ముందు మీకు ఏదైనా అనారోగ్యం లేదా అలెర్జీ సమస్య ఉంటే, డాక్టరును సంప్రదించడం ముఖ్యం.