Dehydration: డీ హైడ్రేషన్ వల్ల చనిపోతారా?

వాటర్ శరీరానికి ఎంత అవసరమో ప్రత్యేకంగా చెప్పనవసరం లేదు. సరిపడా నీళ్లు తాగితే సగం జబ్బులు తగ్గిపోతాయి అంటున్నారు నిపుణులు. శరీరంలో నీటిశాతం తగ్గిపోతే చాలా ప్రమాదమని చెబుతున్నారు. శరీరంలో కనిపించే కొన్ని సంకేతాల ద్వారా డీహైడ్రేషన్ సమస్యను గుర్తించవచ్చట. అవి ఏంటో ఇక్కడ తెలుసుకుందాం.

ఆరోగ్యంగా ఉండటానికి నీరు ఎంత ముఖ్యమో అందరికీ తెలుసు. ప్రతిరోజూ తగినంత నీరు తాగితే సగం ఆరోగ్య సమస్యలు తగ్గుతాయి. శరీరం తీసుకునే దానికంటే ఎక్కువ నీటిని కోల్పోయినప్పుడు డీహైడ్రేషన్ సమస్య వస్తుంది. దీని కారణంగా చాలా సార్లు తలనొప్పి, అలసట, మైకం లాంటి సమస్యలు వస్తాయి. డీహైడ్రేషన్ కారణంగా చనిపోయే ప్రమాదం కూడా ఉందటంటున్నారు నిపుణులు.

వేసవిలో డీ హైడ్రేషన్ సాధారణ సమస్య. శరీరంలో నీటి కొరత ఉంటే, దాన్ని కొన్ని సంకేతాల ద్వారా గుర్తించవచ్చు. అవి ఏమిటో ఇక్కడ చూద్దాం.

దాహం

బాగా దాహం అనిపించినప్పుడు శరీరానికి నీరు అవసరమని అర్థం. అప్పుడు వెంటనే నీరు తాగాలి. ఈ సంకేతాన్ని విస్మరించినా లేదా మరచిపోయినా ఎంతమాత్రం మంచిది కాదు. ఈ అలవాటును సరిదిద్దుకోండి. లేకపోతే అనేక సమస్యలను ఎదుర్కోవాల్సి వస్తుంది.

మూత్రం రంగు మారుతుంది

సాధారణంగా ఏదైనా వ్యాధితో బాధపడుతుంటే, మూత్రం ద్వారా తెలుసుకోవచ్చు. అదేవిధంగా శరీరంలో నీటి కొరత ఉంటే, మూత్రం రంగు మారుతుంది. మూత్రం ముదురు పసుపు రంగులో ఉంటే, డీహైడ్రేషన్ కి గురవుతున్నారని అర్థం. మూత్రం లేత పసుపు రంగులో ఉంటే, ఇప్పటికే డీహైడ్రేషన్ తో బాధపడుతున్నారని అర్థం.

అలసట:

రోజంతా అలసిపోయినట్లు అనిపిస్తే, అది శరీరంలో నీటి కొరతకు సంకేతం. కాబట్టి ఎక్కువ నీరు తాగండి. ఇది శరీరం బాగా పనిచేయడానికి సహాయపడుతుంది.

తలనొప్పి, మైకం:
డీ హైడ్రేషన్ తలనొప్పి, మైగ్రేన్, మైకం లాంటి సమస్యలకు కారణమవుతుంది. తరచుగా తలనొప్పితో బాధపడుతుంటే, ఎక్కువ నీరు తాగాలి. అకస్మాత్తుగా మైకం వస్తే, శరీరానికి ఎక్కువ నీరు అవసరమని అర్థం. కాబట్టి ఈ సంకేతాలను విస్మరించకూడదు.

నోరు పొడిబారడం:

శరీరంలో తగినంత నీరు లేకపోతే, నోరు పొడిబారడం, నోటిలో జిగట అనుభూతి కలుగుతుంది. ఇంకా చెప్పాలంటే, లాలాజలం కూడా ఉత్పత్తి కాదు. ఇది మీకు పదే పదే జరిగితే తగినంత నీరు తాగండి.

చర్మం పొడిబారడం:

శరీరంలో తగినంత నీరు లేకపోతే, దాని ప్రభావం చర్మంపై కనిపిస్తుంది. అంటే, చర్మం పొడిబారుతుంది. చర్మం పొడిబారితే మాయిశ్చరైజర్‌ని ఉపయోగించడానికి బదులుగా, ఎక్కువ నీరు తాగండి.

మలబద్ధకం

శరీరంలో నీటి కొరత ఏర్పడినప్పుడు, మలబద్ధకం, జీర్ణ సమస్యలు కూడా సంభవిస్తాయి. కాబట్టి మలబద్ధకంతో బాధపడుతుంటే, ఎక్కువ నీరు తాగడం ప్రారంభించండి. మార్పును మీరే గమనిస్తారు.