Spinach: పాలకూర ఇలా పెడితే, 10 రోజులైనా తాజాగా ఉంటుంది..!

Spinach:  ఫ్రిజ్ లో పెట్టినా కూడా  పాలకూర పాడైపోతుందా? ఆకులు చాలా త్వరగా పసుపు రంగులోకి మారిపోతున్నాయా? అయితే.. కొన్ని సింపుల్ చిట్కాలు ఫాలో అయితే.. పది రోజులు అయినా ఫ్రెష్ గా ఇప్పుడే కొన్నట్లు ఉంటుంది.

పాలకూర ఎందుకు తినాలి..?

పాలకూర ఆరోగ్యానికి చాలా మేలు చేస్తుంది. పాలకూరలో  చాలా పోషకాలు ఉంటాయి. వారానికి కనీసం రెండు సార్లు అయినా పాలకూర తినాలి. మనం రెగ్యులర్ గా పాలకూర తినడం వల్ల ఐరన్, ఫైబర్, విటమిన్ ఎ వంటి పోషకాలు లభిస్తాయి. 

మార్కెట్లో తాజాగా పాలకూర తెచ్చి ఫ్రిజ్ లో పెట్టినా కూడా రెండు రోజులకే పాడైపోతుంది. ఆకులు పసుపు రంగులోకి మారిపోతే..తినడానికి పనికి రాదు. అదే.. మీరు కొన్ని చిట్కాలు ఫాలో అయితే.. పది రోజులైనా పాలకూర తాజాగా ఉంటుంది. ఆ చిట్కాలు ఏంటో ఇప్పుడు చూద్దాం..

తాజా పాలకూర కొనాలి...

పాలకూర ఎక్కువ కాలం తాజాగా ఉండాలంటే.. కొనేటప్పుడే కొన్ని జాగ్రత్తలు తీసుకోవాలి. ముఖ్యంగా వడలిన ఆకులు ఉంటే కొనకూడదు. ముదురు ఆకుపచ్చ రంగులో.. మచ్చలు కూడా లేకుండా ఉన్న ఆకులను ఎంచుకోవాలి. అప్పటికే పసుపు రంగులోకి మారినా లేదా.. తడిగా ఉన్న ఆకులను పొరపాటున కూడా కొనకూడదు.

2. కడిగే తప్పు చేయొద్దు

చాలా మంది ఆకుకూరలను ఇంటికి తెచ్చిన వెంటనే కడిగి ఫ్రిజ్‌లో పెడతారు. ఇది చాలా పెద్ద తప్పు. ఆకులపై తేమ ఉంటే, బ్యాక్టీరియా త్వరగా పెరిగి ఆకుకూరలు కుళ్లిపోతాయి. కాబట్టి, పాలకూరను కడగకుండా నిల్వ చేయండి. వంట చేసే ముందు మాత్రమే శుభ్రంగా కడగాలి.

3. పేపర్ టవల్ లేదా కాటన్ క్లాత్ వాడకం

పాలకూరను ఎక్కువ కాలం తాజాగా ఉంచడానికి, దాన్ని పొడి పేపర్ టవల్‌లో లేదా కాటన్ క్లాత్‌లో చుట్టాలి. ఇది ఆకుల్లోని అదనపు తేమను పీల్చుకుంటుంది. ఆ తర్వాత, దాన్ని ఒక ఎయిర్-టైట్ డబ్బాలో లేదా జిప్-లాక్ బ్యాగ్‌లో పెట్టి ఫ్రిజ్‌లోని వెజిటబుల్ డ్రాయర్‌లో ఉంచండి.

4. పాడైన ఆకులను వేరు చేయాలి 

పాలకూరను నిల్వ చేసే ముందు, కట్టలో కుళ్లిన లేదా పసుపు రంగులోకి మారిన ఆకులను ఏరి పడేయండి. ఒక్క ఆకు పాడైనా, అది మొత్తం కట్టను త్వరగా పాడు చేస్తుంది.

5. పండ్లకు దూరంగా పెట్టాలి

 పాలకూరను యాపిల్స్, అరటిపండ్లు లేదా పియర్స్ వంటి పండ్ల దగ్గర పెట్టొద్దు. ఈ పండ్ల నుంచి విడుదలయ్యే 'ఇథిలీన్' వాయువు, ఆకుకూరలు త్వరగా వాడిపోయేలా చేస్తుంది.