య‌ల్లో, గ్రీన్‌, బ్లూ, ఆరెంజ్‌.. రోడ్డు ప‌క్క‌న క‌నిపించే మైలురాళ్ల రంగుల‌కు అర్థం ఏంటో తెలుసా.?

Facts: రోడ్ల పక్కన మైలురాళ్లు (Milestones) కనిపిస్తాయి. ఇవి గమ్యస్థానం ఎంత దూరంలో ఉందో మాత్రమే కాకుండా, మీరు ప్రయాణిస్తున్న రహదారి ఏ రకానికి చెందినదో కూడా తెలియజేస్తాయి. మైలురాళ్లపై కనిపించే రంగులకు ప్రత్యేకమైన అర్థం ఉంటుంది. 

పసుపు-తెలుపు మైలురాళ్లు – జాతీయ రహదారులకు గుర్తు

మైలురాయిపై పైభాగం పసుపు రంగులో, కింది భాగం తెలుపు రంగులో ఉంటే అది జాతీయ రహదారి (National Highway - NH) అని అర్థం. ఇవి దేశంలోని ప్రధాన నగరాలు, రాష్ట్రాలను కలుపుతూ ఉంటాయి. సుదూర ప్రయాణాలు, భారీ వాహనాల రాకపోకల కోసం ఈ రహదారులను నిర్మిస్తారు. జాతీయ రహదారుల నిర్వహణ బాధ్యత నేషనల్ హైవేస్ అథారిటీ ఆఫ్ ఇండియా (NHAI) వద్ద ఉంటుంది. ఉదాహరణకు శ్రీనగర్ నుంచి కన్యాకుమారి వరకు వెళ్లే NH-44, ఢిల్లీ నుంచి కోల్‌కతా వరకు వెళ్లే NH-19 వంటి రహదారులు జాతీయ రహదారులే. అన్ని వాతావరణ పరిస్థితుల్లో స్పష్టంగా కనిపించేలా పసుపు రంగును ఉపయోగిస్తారు.

ఆకుపచ్చ-తెలుపు మైలురాళ్లు – రాష్ట్ర రహదారుల సూచిక

మైలురాయిపై పైభాగం ఆకుపచ్చ రంగులో, కింది భాగం తెలుపు రంగులో ఉంటే అది స్టేట్ హైవే (State Highway - SH) అని గుర్తించాలి. ఇవి ఒకే రాష్ట్రంలోని వివిధ జిల్లాలు, పట్టణాలు, నగరాలను అనుసంధానిస్తాయి. ఈ రహదారుల నిర్వహణ ఆయా రాష్ట్ర ప్రభుత్వాల బాధ్యత. ఉదాహరణకు తెలంగాణలో SH-1, ఆంధ్రప్రదేశ్‌లో SH-48 వంటి రహదారులు రాష్ట్ర రహదారుల కిందకు వస్తాయి. రాష్ట్ర స్థాయి రవాణా అనుసంధానాన్ని సూచించేలా ఆకుపచ్చ రంగును ఉపయోగిస్తారు.

నీలం లేదా నలుపు-తెలుపు మైలురాళ్లు – నగర, జిల్లా రహదారులు

మైలురాయిపై పైభాగం నీలం లేదా నలుపు రంగులో, కింది భాగం తెలుపు రంగులో ఉంటే అది నగర రహదారి లేదా జిల్లా రహదారి అని అర్థం. ఈ రహదారులు పట్టణాలు, నగరాలు, మున్సిపల్ ప్రాంతాలతో పాటు జిల్లాల మధ్య స్థానిక రవాణా కోసం ఉప‌యోగిస్తారు. ప్రధానంగా నగరాల్లో ట్రాఫిక్ నిర్వహణ, సమీప ప్రాంతాలకు అనుసంధానం కల్పించడం వీటి లక్ష్యం. రోజువారీ ప్రయాణాలు చేసే ప్రజలు ఎక్కువగా ఈ రహదారులనే ఉపయోగిస్తారు.

నారింజ-తెలుపు మైలురాళ్లు – గ్రామీణ రహదారుల గుర్తింపు

మైలురాయిపై పైభాగం నారింజ రంగులో, కింది భాగం తెలుపు రంగులో ఉంటే అది గ్రామీణ రహదారి (Village Road) అని గుర్తించాలి. ఇవి గ్రామాలను సమీప పట్టణాలు లేదా ఇతర గ్రామాలతో అనుసంధానించే రహదారులు. దేశవ్యాప్తంగా అమలు చేస్తున్న ప్రధాన్ మంత్రి గ్రామ సడక్ యోజన (PMGSY) వంటి పథకాల కింద అనేక గ్రామీణ రహదారులు నిర్మించారు. గ్రామీణాభివృద్ధి, గ్రామాల మధ్య అనుసంధానానికి ప్రతీకగా రెంజ్ క‌ల‌ర్‌ను ఉపయోగిస్తారు.

మైలురాళ్ల రంగులు ఎందుకు ముఖ్యమైనవి?

మైలురాళ్ల రంగులు తెలుసుకోవడం వల్ల మీరు ఏ రహదారిపై ప్రయాణిస్తున్నారో వెంటనే అర్థం చేసుకోవచ్చు. అంతేకాకుండా ఆ రహదారిని ఏ శాఖ నిర్వహిస్తుందో కూడా తెలుసుకునే అవకాశం ఉంటుంది. ఉదాహరణకు మీరు పొరపాటున జాతీయ రహదారి బదులుగా రాష్ట్ర రహదారిలోకి వెళ్లినా, మైలురాయి రంగును చూసి వెంటనే గుర్తించవచ్చు. డ్రైవింగ్ లైసెన్స్ పరీక్షల్లో కూడా ఈ సమాచారం అడిగే అవకాశం ఉంటుంది. అందువల్ల ప్రతి వాహనదారుడు ఈ రంగుల అర్థాలను తెలుసుకోవడం అవసరం.

భారతదేశంలో మైలురాళ్ల రంగులను ఎవరు నిర్ణయిస్తారు?

దేశవ్యాప్తంగా మైలురాళ్ల రంగుల ప్రమాణాలను నేషనల్ హైవేస్ అథారిటీ ఆఫ్ ఇండియా (NHAI), రాష్ట్ర ప్రజా నిర్మాణ శాఖలు (PWD), ఇతర రహదారి నిర్వహణ సంస్థలు నిర్ణయిస్తాయి. దేశమంతటా ఒకే విధమైన రంగుల విధానం ఉండటం వల్ల ప్రయాణికులు, వాహనదారులు రహదారి రకాన్ని సులభంగా గుర్తించగలుగుతున్నారు.

ఇక‌పై ప్రయాణం చేసే సమయంలో రోడ్డు పక్కన కనిపించే మైలురాళ్లను ఒకసారి గమనించండి. అవి కేవలం దూరాన్ని మాత్రమే కాదు, మీరు ప్రయాణిస్తున్న రహదారి గురించి కూడా చాలా సమాచారం చెబుతాయి.