కమల్ హాసన్ 'థగ్ లైఫ్' చిత్రానికి నెట్‌ఫ్లిక్స్‌ ఝలక్, డిజాస్టర్ కావడంతో ఊహించని మెలిక

మణిరత్నం దర్శకత్వంలో కమల్ హాసన్ నటించిన 'థగ్ లైఫ్' చిత్రం ఓటీటీ విడుదలలో కొత్త సమస్య తలెత్తిందని సమాచారం.

థగ్ లైఫ్ మూవీ

ఈ సంవత్సరం ఎంతో ఆసక్తిగా ఎదురుచూసిన చిత్రాలలో 'థగ్ లైఫ్' ఒకటి. కమల్ హాసన్ కథానాయకుడిగా నటించిన ఈ చిత్రంలో సింబు, జోజు జార్జ్, త్రిష, అభిరామి, నాజర్ వంటి అగ్ర నటులు నటించారు. మణిరత్నం దర్శకత్వం వహించిన ఈ చిత్రానికి ఏ.ఆర్.రెహమాన్ సంగీతం అందించగా, రవి కె. చంద్రన్ ఛాయాగ్రహణం అందించారు. జూన్ 5న విడుదలైన ఈ చిత్రం ప్రేక్షకులను నిరాశపరిచింది.

నిరాశ పరిచిన థగ్ లైఫ్

'నాయకుడు' వంటి బ్లాక్ బస్టర్ తర్వాత మణిరత్నం, కమల్ హాసన్ కాంబినేషన్లో వస్తున్న చిత్రం కావడంతో 'థగ్ లైఫ్'పై ఫ్యాన్స్ భారీ అంచనాలు పెట్టుకున్నారు. అయితే, ఈ చిత్రం ప్రేక్షకుల అంచనాలను అందుకోలేకపోయింది.

డిస్ట్రిబ్యూటర్లకు నష్టాలు

విడుదలైనప్పటి నుంచి నెగిటివ్ టాక్ రావడంతో 'థగ్ లైఫ్' బాక్సాఫీస్ వద్ద బోల్తా కొట్టింది. వారం రోజుల్లో కూడా 100 కోట్ల మార్క్ దాటలేకపోయింది. ఈ చిత్రం డిస్ట్రిబ్యూటర్లకు కూడా నష్టాలను మిగిల్చింది.

షాకిచ్చిన నెట్ ఫ్లిక్స్

130 కోట్లకు 'థగ్ లైఫ్' ఓటీటీ హక్కులను నెట్‌ఫ్లిక్స్ కొనుగోలు చేసింది. అయితే, చిత్రం ఫలితం సరిగా లేకపోవడంతో ఆ మొత్తం ఇవ్వలేమని నెట్‌ఫ్లిక్స్ వెనక్కి తగ్గినట్లు తెలుస్తోంది. 30 కోట్లు తగ్గిస్తేనే విడుదల చేస్తామని నెట్‌ఫ్లిక్స్ చర్చలు జరుపుతున్నట్లు సమాచారం.