Suryakumar Yadav ankle injury: భారత్-దక్షిణాఫ్రికా జట్ల మధ్య జరురిగి 3 మ్యాచ్ ల టీ20ల సిరీస్‌లో చివరి, నిర్ణయాత్మక మ్యాచ్ లో భారత్ 106 పరుగుల తేడాతో విజయం సాధించి సిరీస్‌ను 1-1తో సమం చేసింది. అదే మ్యాచ్‌లో కెప్టెన్ సూర్యకుమార్ యాదవ్ ఫీల్డింగ్ చేస్తున్నప్పుడు తీవ్రంగా గాయపడ్డాడు.
Suryakumar Yadav’s injury update: దక్షిణాఫ్రికా పర్యటనలో భారత టీ20 జట్టు పగ్గాలు చేపట్టిన సూర్యకుమార్ యాదవ్ గురించి ఓ బ్యాడ్ న్యూస్ బయటకు వచ్చింది. గురువారం (డిసెంబర్ 14) దక్షిణాఫ్రికాతో జరిగిన మ్యాచ్ లో తన అద్బుత బ్యాటింగ్ తో సెంచరీ బాదిన సూర్యకుమార్ ఫిల్డింగ్ చేస్తుండ‌గా తీవ్రంగా గాయపడ్డాడు. కాలికి గాయం కావడంతో నడవలేని స్థితికి చేరుకున్నాడు.
సూర్య కుమార్ యాదవ్ ను వైద్య, ఇతర సిబ్బంది ప‌ట్టుకుని గ్రౌండ్ నుంచి తీసుకెళ్లారు. సూర్య మైదానం వీడిన తర్వాత స్టార్ ఆల్ రౌండర్ రవీంద్ర జడేజా ఈ మ్యాచ్ లో కెప్టెన్సీ బాధ్యతలు చేపట్టాడు. ఈ మ్యాచ్ లో సూర్య సెంచరీ బాదాడు. అంతర్జాతీయ టీ20ల్లో సూర్యకు ఇది నాలుగో సెంచరీ.
ఈ మ్యాచ్ లో 202 పరుగుల విజయలక్ష్యంతో బరిలోకి దిగిన ఆఫ్రికా జట్టు రెండో ఓవర్‌లోనే తొలి వికెట్‌ను కోల్పోయింది. అయితే ఇది జరిగిన వెంటనే సూర్యకు గాయం అయింది. బౌండరీ లైన్ దగ్గర ఫీల్డింగ్ చేస్తున్నప్పుడు, బాల్ ను ఆపి విసురుతున్న సమయంలో అతని ఎడమ కాలు చీలమండ దగ్గర బాగా మెలితిరిగి గాయపడ్డాడు.
బౌండరీకి వెళుతున్న బంతిని ఆపడానికి, సూర్య వేగంగా పరుగెత్తాడు. ఈ సమయంలో అతను క్రిందికి వంగి బంతిని తీయడానికి ప్రయత్నించిన స‌మ‌యంలోనే అతని చీలమండ మెలితిరిగింది. గాయం తీవ్రంగా కావడంతో అక్క‌డే ప‌డిపోయాడు. జట్టు వైద్య, ఇతర సిబ్బంది వ‌చ్చి గ్రౌండ్ నుంచి తీసుకెళ్లారు. వెంటనే ఫిజియో, వైద్య బృందం రంగంలోకి దిగి చికిత్స అందించారు. దీనికి సంబంధించిన చాలా ఫోటోలు, వీడియోలు కూడా వైరల్ అయ్యాయి.
ఈ గాయం కార‌ణంగా సూర్యకుమార్ యాదవ్ ఐపీఎల్ 2024కు కూడా దూరంగా ఉండవచ్చున‌నే వార్తలు వినిపిస్తున్నాయి. ఐసీసీ టీ20 బ్యాటింగ్ ర్యాంకింగ్స్‌లో సూర్య ప్రస్తుతం నంబర్-1 స్థానంలో ఉన్నాడు. ఆఫ్ఘనిస్థాన్‌తో స్వదేశంలో టీ20 సిరీస్ భారత్ ఆడాల్సి ఉంది. అలాగే, ఇండియన్ ప్రీమియర్ లీగ్ (ఐపీఎల్) కూడా సూర్య ఆడాల్సి ఉంది.
ఆ తర్వాత భారత జట్టు 2024లో టీ20 ప్రపంచకప్ ఆడాల్సి ఉంది. అయితే గాయాన్ని చూస్తుంటే, సూర్య ఐపీఎల్‌కు దూరంగా ఉండవచ్చున‌ని స‌మాచారం. గాయం త‌గ్గితే గ‌న‌క టోర్నీ మధ్యలో ముంబై ఇండియన్స్ జట్టులో చేరవచ్చున‌ని స‌మాచారం. సూర్యకు గాయం కావడం, రాబోయే కీలక సిరీస్ లకు దూరం అవుతాడనే వార్తలు క్రికెట్ ప్రియులకు బ్యాడ్ న్యూస్ అనే చెప్పాలి.