SRH vs KKR: ఆరెంజ్ ఆర్మీ ఊచకోత.. కేకేఆర్ కోటను షేక్ చేశారు !

SRH vs KKR : ఐపీఎల్ 2026లో సన్‌రైజర్స్ హైదరాబాద్ ఊచకోత మొదలైంది. ట్రావిస్ హెడ్, అభిషేక్ శర్మ మెరుపులతో కేకేఆర్‌పై 65 పరుగుల తేడాతో ఎస్‌ఆర్‌హెచ్ ఘనవిజయం సాధించింది.

ఈడెన్ గార్డెన్స్‌లో సిక్సర్ల సునామీ : కేకేఆర్‌ను చిత్తు చేసిన సన్‌రైజర్స్ హైదరాబాద్

ఆరంభంలోనే హెడ్, అభిషేక్ విధ్వంసం రేపారు. ఈ మ్యాచ్ లో టాస్ ఓడి బ్యాటింగ్‌కు దిగిన సన్‌రైజర్స్ హైదరాబాద్‌కు ఓపెనర్లు అభిషేక్ శర్మ, ట్రావిస్ హెడ్ కళ్లు చెదిరే ఆరంభాన్ని ఇచ్చారు. పవర్‌ప్లేలోనే ఈ జోడీ కేకేఆర్ బౌలర్లపై విరుచుకుపడి 84 పరుగులు రాబట్టింది, ఇది ఈ సీజన్‌లోనే అత్యధిక పవర్‌ప్లే స్కోరు కావడం విశేషం. వీరిద్దరి దూకుడుతో స్టేడియం మొత్తం హోరెత్తిపోయింది. కేకేఆర్ బౌలర్లు ఎంత ప్రయత్నించినా వీరి సిక్సర్ల వర్షాన్ని అడ్డుకోలేకపోయారు.

క్లాసెన్ మెరుపులు.. హైదరాబాద్ భారీ స్కోరు

ఓపెనర్లు పెవిలియన్ చేరిన తర్వాత హెన్రిచ్ క్లాసెన్ తన మార్కు బ్యాటింగ్‌తో చెలరేగి అర్ధ సెంచరీ సాధించాడు. అతనికి తోడుగా నితీష్ కుమార్ రెడ్డి 39 పరుగులతో విలువైన సహకారాన్ని అందించడంతో హైదరాబాద్ స్కోరు బోర్డు 226 పరుగులకు చేరుకుంది. కోల్‌కతా బౌలర్లలో ఎవరూ కూడా హైదరాబాద్ బ్యాటర్లను కట్టడి చేయలేకపోయారు. నిర్ణీత 20 ఓవర్లలో హైదరాబాద్ 8 వికెట్లు కోల్పోయి భారీ లక్ష్యాన్ని ఉంచింది.

కోల్‌కతా పోరాటం.. ఫిన్ అలెన్ మెరుపులు

227 పరుగుల భారీ లక్ష్యంతో బరిలోకి దిగిన కోల్‌కతా నైట్ రైడర్స్‌కు ఫిన్ అలెన్ అదిరిపోయే ఆరంభాన్ని ఇచ్చాడు. డేవిడ్ పేన్ వేసిన తొలి ఓవర్లోనే 4, 4, 6, 6, 4 బాదిన అలెన్ కేవలం 7 బంతుల్లోనే 28 పరుగులు చేశాడు. అయితే హర్ష్ దూబే తెలివైన బంతితో అతడిని అవుట్ చేసి కేకేఆర్‌కు షాక్ ఇచ్చాడు. ఆ తర్వాత వచ్చిన రఘువంశీ 27 బంతుల్లోనే 52 పరుగులు చేసి వరుసగా రెండో హాఫ్ సెంచరీ నమోదు చేశాడు.

ఉనద్కత్ స్పెల్.. కేకేఆర్ కు వరుస షాక్ లు

ఒకానొక దశలో కేకేఆర్ 11 ఓవర్లలో 120/3 తో బలంగా కనిపించింది. కానీ జయదేవ్ ఉనద్కత్ తన అనుభవంతో కోల్‌కతాను కోలుకోలేని దెబ్బ తీశాడు. అజింక్య రహానే (8) ను అవుట్ చేయడంతో పాటు కీలక సమయంలో వికెట్లు తీసి కేకేఆర్ పతనాన్ని శాసించాడు. కోల్‌కతా చివరి 7 వికెట్లను కేవలం 41 పరుగుల వ్యవధిలోనే కోల్పోయింది. ఉనద్కత్ 3 వికెట్లతో చెలరేగగా, నితీష్, మలింగ చెరో రెండు వికెట్లు తీశారు.

హైదరాబాద్ సీజన్ తొలి విజయం

చివరికి కోల్‌కతా 16 ఓవర్లలో 161 పరుగులకు ఆలౌట్ కావడంతో హైదరాబాద్ 65 పరుగుల భారీ విజయాన్ని అందుకుంది. ఈ సీజన్‌లో సన్‌రైజర్స్‌కు ఇదే తొలి విజయం. మరోవైపు కేకేఆర్ 2012 తర్వాత తొలిసారి సీజన్లో మొదటి రెండు మ్యాచ్‌ల్లోనూ ఓటమి పాలైంది. పర్పుల్ క్యాప్ దక్కించుకున్న ఉనద్కత్, అనుభవం ఎప్పుడూ పనికివస్తుందని ఈ మ్యాచ్‌తో నిరూపించాడు.