త్రేతా యుగంలో శ్రీ రాముడు చైత్ర శుక్ల నవమి రోజున జన్మించారు. ఈ రోజునే మనం శ్రీరామ నవమిగా జరుపుకుంటున్నాం. వాల్మీకి రామాయణం ప్రకారం, శ్రీరాముడు కర్కాటక లగ్నం, కర్కాటక రాశిలో జన్మించారు. కర్కాటక రాశికి చంద్రుడు అధిపతి. శ్రీరాముడు జన్మించిన నక్షత్రం పునర్వసు నక్షత్రం. ఈ నక్షత్రానికి గురుడు అధిపతి. చంద్రుడు, గురు గ్రహాల కలయిక గజకేసరి యోగాన్ని ఏర్పరుస్తుంది. జోతిష్య శాస్త్రంలో గజకేసరి రాజయోగం అత్యంత శుభప్రదమైనదిగా పరిగణిస్తారు. ఈ యోగం అపారమైన సంపద, శ్రేయస్సు, కీర్తిని ప్రసాదిస్తుంది.
అంతేకాదు, శ్రీరాముడు కర్కాటక లగ్నంలో జన్మించాడు. అతని రాశి కూడా కర్కాటకమే. అంతేకాకుండా, రాముని జాతకంలో శని తన ఉచ్చరాశి అయిన తుల రాశిలో, కుజుడు తన ఉచ్చ రాశి అయిన మకర రాశిలో ఉన్నారు. కుజుడు శ్రీరాముని వివాహ స్థానంలో ఉన్నాడు. ఈ కారణంగానే ఆయన తన వైవాహిక జీవితంలో అనేక కష్టాలను ఎదుర్కొన్నాడు.