ఆర్టిసి బస్సులో చెలరేగిన మంటలు ... 40మందికి తృటిలో తప్పిన ప్రమాదం

విజయవాడ : ప్రయాణికులతో వెళుతున్న ఆర్టిసి బస్సులో ఒక్కసారిగా మంటలు చెలరేగిన ఘటన ఎన్టీఆర్ జిల్లాలో చోటుచేసుకుంది. మంటలను గుర్తించిన డ్రైవర్ అప్రమత్తమై ఎలాంటి ప్రమాదం జరక్కముందే బస్సులోంచి ప్రయాణికులను కిందకు దింపారు. దీంతో పెను ప్రమాదం తప్పింది. 

విజయవాడ నుండి గుడివాడకు 40మంది ప్రయాణికులతో ఆర్టిసి పల్లెవెలుగు బస్సు బయలుదేరింది. పెదపారుపూడి మండలం పులవర్తి గూడెం సమీపంలో బస్సులో ఒక్కసారిగా మంటలు చెలరేగాయి. ఈ మంటలు అంతకంతకు మరింత పెరిగి బస్సు మొత్తాన్ని వ్యాపించాయి. అప్పటికే ప్రయాణికులంతా బస్సులోంచి దిగడంతో పెను ప్రమాదం తప్పింది. బస్సులో భారీగా మంటలు రావడంతో ప్రయాణికులు, స్థానికులు భయాందోళనకు గురయ్యారు.