TS News: సూపర్ బ్యాంకు, ఒక్క పైసా కూడా చేతికి రాలేదు: బ్యాంకుపై ఓ దొంగ ప్రశంసలు.. ఖాళీ చేతులతో వెనక్కి

మంచిర్యాల జిల్లాలోని ఓ తెలంగాణ గ్రామీణ బ్యాంకులో చోరీకి విఫలయత్నం జరిగింది. గురువారం రాత్రి దోపిడీకి వెళ్లిన ఓ దొంగ ఎంత ప్రయత్నించినా బ్యాంకులోకి దూరలేకపోయాడు. దీంతో బ్యాంకు భద్రత గురించి ఓ లేఖ రాసి వెళ్లిపోయాడు.  

హైదరాబాద్: ఓ దొంగ తెలంగాణ గ్రామీణ బ్యాంకు పై కన్నేశాడు. ఎలాగైనా దోచేయాలని ప్లాన్ వేశాడు. అనుకున్నట్టే ఓ రోజు రాత్రి ముసుగు ధరించి బ్యాంకు వద్దకు వెళ్లాడు. కానీ, ఎంతకూ లోపలికి వెళ్లలేకపోయాడు. ఎన్ని ప్రయత్నాలు చేసినా ఒక్క రూపాయి కూడా దొంగతనం చేయలేకపోయాడు. దీంతో ఒక వైపు నిరాశ.. మరో వైపు బ్యాంకు సెక్యూరిటీ పైనా విశ్వాసం తన్నుకువచ్చింది. ఆ బ్యాంకు సెక్యూరిటీ సిస్టమ్‌ను మెచ్చుకుంటూ ఓ లేఖ రాసి అక్కడే పెట్టి ఒట్టి చేతులతో వెనుదిరిగాడు. అంతేకాదు.. తనకు ఒక్క రూపాయి కూడా దక్కలేదని, కాబట్టి.. తనను పట్టుకునే ప్రయత్నం చేయవద్దని విజ్ఞప్తి చేశాడు. ఈ ఘటన ఎక్కడో మరే రాష్ట్రంలోనో కాదు.. మన తెలంగాణలోనే చోటుచేసుకుంది. 

మంచిర్యాల జిల్లా నెన్నాల్ మండలంలోని తెలంగాణ గ్రామీణ బ్యాంకు బ్రాంచ్‌లో ఈ చోరీ విఫలయత్నం జరిగింది. ఓ దొంగ అన్ని జాగ్రత్తలు తీసుకుని బ్యాంకు దోపిడీకి గురువారం రాత్రి (ఆగస్టు 31వ తేదీ) బయల్దేరాడు. బ్యాంకు వద్దకు వెళ్లాడు. అక్కడ సీసీటీవీలు ఉన్నాయి. అయినా.. ముఖానికి ముసుగు వేసుకుని చోరీకి విఫలయత్నం చేశాడు. ఆ బ్యాంకు ఏర్పాటు చేసుకున్న దుర్బేధ్య భద్రతా వ్యవస్థను లొంగదీసుకునే పని చేసి విఫలమయ్యాడు. దీంతో ఓటమిని అంగీకరించి వెనుదిరగడానికి సిద్ధమయ్యాడు. అదే సమయంలో ఓ చిట్టి రాసి బ్యాంకు ముందు ఉంచాడు.

‘నా వేలి ముద్రలు ఇక్కడ ఉండవు. మంచి బ్యాంకు. నేను ఒక్క రూపాయి కూడా చోరీ చేయలేకపోయాను. కాబట్టి. నన్ను పట్టుకోవద్దు’ అంటూ ఆ చిట్టిలో దొంగ రాసి వెళ్లిపోయాడు. శుక్రవారం ఉదయం యథావిధిగా బ్యాంకు సిబ్బంది విధుల కోసం వచ్చారు. అప్పటి వరకు అక్కడ చోరీకి ప్రయత్నం జరిగిందన్న విషయం వారికి తెలియదు. కానీ, వారు బ్యాంకు వద్దకు రాగానే.. ఆ దొంగ రాసి పెట్టిన చిట్టి దొరికింది. 

వెంటనే సీసీటీవీ నిఘా కెమెరాలను పరిశీలించారు. అందులో ఓ దొంగ కదలికలను గుర్తించారు. ముఖానికి ముసుగు వేసుకుని ఆ దొంగ కనిపించాడు. పోలీసులకు సమాచారం ఇచ్చారు. ఆ దొంగ స్థానికుడే అయి ఉంటాడని పోలీసులు అనుమానిస్తున్నారు. అయితే.. బ్యాంకు ఉద్యోగి కాకపోవచ్చని స్పష్టం చేశారు. బ్యాంకులో విలువై నవన్నీ ఉన్నాయని, ఏదీ చోరీ కాలేదని ఉద్యోగులు చెప్పారు. పోలీసులు కేసు దర్యాప్తు చేస్తున్నారు.