ఏషియన్ అథ్లెటిక్స్ లో భారత్ కు మరో గోల్డ్ మెడల్... మొత్తం ఎన్నంటే..

ఏషియన్ అథ్లెటిక్స్ ఛాంపియన్‌షిప్‌లో భారత్ అదరగొట్టింది. ఏకంగా ఆరు పతకాలు గెలుచుకుంది. 4x400 మీటర్ల మిక్స్‌డ్ రిలే జట్టు బంగారం గెలిచింది. తేజస్విన్ శంకర్ డెకాథ్లాన్‌లో రజతం సాధించాడు.

Asian Athletics Championships : సౌత్ కొరియాలోని గుమిలో జరిగిన ఏషియన్ అథ్లెటిక్స్ ఛాంపియన్‌షిప్‌లో రెండో రోజు భారత్ ఆరు పతకాలు గెలుచుకుంది. భారత 4x400 మీటర్ల మిక్స్‌డ్ రిలే జట్టు బుధవారం బంగారు పతకం గెలిచింది. తేజస్విన్ శంకర్ డెకాథ్లాన్‌లో రజతం సాధించాడు. ఇలా ఆటగాళ్లు రాణించడంతో భారత్ పతకాల పట్టికలో మూడో స్థానంలో ఉంది. రెండు బంగారాలు, నాలుగు రజతాలు, రెండు కాంస్య పతకాలు భారత క్రీడాకారులు గెలుచుకున్నారు. మొదటి స్థానంలో చైనా, రెండో స్థానంలో జపాన్ ఉన్నాయి.

భారత 4x400 మీటర్ల మిక్స్‌డ్ రిలే జట్టు 3:18.20 సెకన్లలో బంగారం గెలిచి తమ టైటిల్ ని నిలబెట్టుకుంది. సంతోష్ కుమార్ తమిళరాసన్, రూపల్ చౌదరి, విశాల్ తెన్నరసు కయాల్విజి, సుభా వెంకటేశన్ అందరూ అద్భుతంగా ఆడారు.

భారత జట్టు చైనా (3:20.52 సెకన్లు), శ్రీలంక (3:21.95 సెకన్లు) జట్లను వెనక్కి నెట్టింది. చైనా రజతం, శ్రీలంక కాంస్యం గెలుచుకున్నాయి. ఛాంపియన్‌షిప్‌లో భారత్ కు ఇది రెండో బంగారం. మొదటి రోజు పురుషుల 10,000 మీటర్ల పరుగులో గుల్వీర్ సింగ్ బంగారం గెలిచాడు.

తేజస్విన్ శంకర్, ప్రవీణ్ చిత్రావెల్ రజతాలు

భారత ప్రవీణ్ చిత్రావెల్ పురుషుల ట్రిపుల్ జంప్‌లో రజతం గెలిచాడు. ప్రవీణ్ 16.90 మీటర్లు దూకాడు. చైనాకు చెందిన జు 17.06 మీటర్లతో బంగారం గెలిచాడు. తేజస్విన్ శంకర్ డెకాథ్లాన్‌లో రజతం సాధించాడు.

రూపల్ చౌదరి రజతం

రూపల్ చౌదరి మహిళల 400 మీటర్ల పరుగులో రజతం గెలిచింది. ఆమె 52.68 సెకన్లలో పరుగు పూర్తి చేసింది. జపాన్ క్రీడాకారిణి నానాకో మత్సుమోటో (52.17 సెకన్లు) బంగారం గెలవగా, ఉజ్బెకిస్తాన్ కు చెందిన జోన్‌బిబి హుక్మోవా (52.79 సెకన్లు) కాంస్యం గెలిచింది.

విశాల్ తెన్నరసు కయాల్విజి పురుషుల 400 మీటర్ల పరుగులో 45.57 సెకన్లతో తన ఉత్తమ సమయాన్ని నమోదు చేసి నాల్గవ స్థానంలో నిలిచాడు. కొద్దిలో పతకం మిస్సయ్యాడు. అయితే అతని ప్రదర్శన భారత 4x400 మీటర్ల రిలే జట్టుకు బాగా ఉపయోగపడింది.

పూజ 1500 మీటర్ల పరుగులో రజతం

భారత క్రీడాకారిణి పూజ మహిళల 1500 మీటర్ల పరుగులో 4:10.83 నిమిషాలతో రజతం గెలిచింది. చైనాకు చెందిన లీ చున్‌హుయ్ (4:10.58) బంగారం గెలవగా, జపాన్ కు చెందిన టోమాకా కిమురా కాంస్యం గెలిచింది.

పురుషుల 1500 మీటర్ల పరుగులో యూనస్ కాంస్యం

యూనస్ షా పురుషుల 1500 మీటర్ల పరుగులో 3:43.03 నిమిషాలతో కాంస్యం గెలిచాడు. జపాన్ కు చెందిన కజుటో లిజావా (3:42.56) బంగారం, సౌత్ కొరియాకు చెందిన జెయుంగ్ లీ (3:42.79) రజతం గెలుచుకున్నారు.