సింధ్ నదిలోకి దూసుకెళ్లిన సీఆర్పీఎఫ్ జవాన్లు ప్రయాణిస్తున్న వాహనం.. 8 మందికి గాయాలు

జమ్మూకాశ్మీర్ లో జవాన్లు ప్రయాణిస్తున్న వాహనం సింధ్ నదిలోకి దూసుకెళ్లింది. దీంతో అందులో ఉన్న 8 మందికి గాయాలు అయ్యాయి. క్షతగాత్రులను పోలీసులు హాస్పిటల్ కు తరలించారు. 

జమ్మూకాశ్మీర్ లో ఘోర ప్రమాదం జరిగింది. గందర్బల్ జిల్లా బల్తాల్ సోన్మార్గ్ ప్రాంతంలోని నీల్ గార్ హెలిప్యాడ్ సమీపంలో సింధ్ నదిలోకి ఓ వాహనం దూసుకెళ్లింది. ఆ సమయంలో అందులో సీఆర్పీఎఫ్ జవాన్లు ప్రయాణిస్తున్నారు. ఈ ఘటనలో ఎనిమింది జవాన్లకు గాయాలు అయ్యాయి. 

వాహనం బల్తాల్ వెళ్తుండగా ఈ ప్రమాదం జరిగింది. క్షతగాత్రులను బల్తాల్ లోని బేస్ క్యాంప్ ఆస్పత్రికి తరలించి చికిత్స అందిస్తున్నారు. ఈ ఘటనకు సంబంధించిన మరిన్ని వివరాలు తెలియాల్సి ఉంది.

మే నెలలో జరిగిన ఇదే జమ్మూ కాశ్మీర్‌లో జరిగిన ప్రమాదంలో సీఆర్పీఎఫ్ జవాన్లకు గాయాలు అయ్యాయి. మే 25వ తేదీన పుల్వామాలోని  పండ్ల లోడ్ తో వెళ్తున్న ఓ ట్రక్కు అదుపు తప్పి.. రోడ్డుకు అవతలి వైపు ఉన్న సీఆర్పీఎఫ్ వాహనానికి ఢీ కొట్టింది. దీంతో ముగ్గురు అందులో ఉన్న సీఆర్పీఎప్ జవాన్లకు గాయాలు అయ్యాయి. ఈ ఘటన అవంతిపొరలోని జాతీయ రహదారిపై చోటు చేసుకుంది.

గాయపడిన ముగ్గురు జవాన్లను చికిత్స నిమిత్తం ఆస్పత్రికి తరలించారు. మరోవైపు ఈ ఘటనపై పోలీసులు దృష్టి సారించారు. ఈ ప్రమాదానికి సంబంధించిన సీసీటీవీ ఫుటేజీ కూడా వెలుగులోకి వచ్చింది. రోడ్డుకు ఒకవైపు సీఆర్పీఎఫ్ వాహనం నిలబడి ఉండగా, అకస్మాత్తుగా మరోవైపు నుంచి వేగంగా వచ్చిన ట్రక్కు సీఆర్పీఎఫ్ వాహనాన్ని బలంగా ఢీకొట్టి.. అనంతరం బోల్తా పడటం కనిపించింది.