Same Sex Marriage: కోర్టు చట్టం చేయదు.. స్వలింగ సంపర్కులపై వివక్ష చూపకూడదు: సీజేఐ
By Sumanth Kanukula | First Published Oct 17, 2023, 12:04 PM ISTభారతదేశంలో స్వలింగ సంపర్కుల వివాహాల అంశంపై సుప్రీంకోర్టు నేడు తీర్పు వెలువరించింది. క్వీర్ యూనియన్లలోని వ్యక్తుల హక్కులు, అర్హతలను నిర్ణయించడానికి కేంద్రం కమిటీని ఏర్పాటు చేయాలని సుప్రీం కోర్టు ప్రధాన న్యాయమూర్తి జస్టిస్ డీవై చంద్రచూడ్ తెలిపారు.
న్యూఢిల్లీ: స్వలింగ సంపర్కుల వివాహాలకు చట్టబద్ధ ధ్రువీకరణ కోరుతూ దాఖలైన పిటిషన్లపై సుప్రీంకోర్టు నేడు తీర్పు వెలువరించింది. క్వీర్ యూనియన్లలోని వ్యక్తుల హక్కులు, అర్హతలను నిర్ణయించడానికి కేంద్రం కమిటీని ఏర్పాటు చేయాలని సుప్రీం కోర్టు ప్రధాన న్యాయమూర్తి జస్టిస్ డీవై చంద్రచూడ్ తెలిపారు. రేషన్ కార్డులలో క్వీర్ జంటలను కుటుంబంగా చేర్చడం, జాయింట్ బ్యాంక్ ఖాతా కోసం నామినేట్ చేయడానికి క్వీర్ జంటలను అనుమతించడం, పెన్షన్, గ్రాట్యుటీ మొదలైన వాటి నుండి వచ్చే హక్కులు.. వంటి అంశాలను ఈ కమిటీ పరిశీలించాలని పేర్కొంది. కమిటీ నివేదికను కేంద్ర ప్రభుత్వ స్థాయిలో పరిశీలించాలని పేర్కొన్నారు.
క్వీర్ కమ్యూనిటీకి వస్తువులు, సేవలను పొందడంలో ఎలాంటి వివక్ష లేదని నిర్ధారించాలని కేంద్రం, రాష్ట్ర ప్రభుత్వాలను ప్రధాన న్యాయమూర్తి జస్టిస్ డీవై చంద్రచూడ్ నిర్దేశించారు. క్వీర్ హక్కుల గురించి ప్రజలకు అవగాహన కల్పించారు. క్వీర్ కమ్యూనిటీ కోసం హాట్‌లైన్‌ని సృష్టించడం, హింసను ఎదుర్కొనే క్వీర్ జంటల కోసం సురక్షిత గృహాలను 'గరిమా గృహ్' సృష్టించడం, ఇంటర్-సెక్స్ పిల్లలు బలవంతంగా ఆపరేషన్‌లు చేయించుకోకుండా చూసుకోవాలని చెప్పారు.
Latest Videos
undefined
వారి సంబంధంపై క్వీర్ జంటపై ఎఫ్ఐఆర్ నమోదు చేయడానికి ముందు పోలీసులు ప్రాథమిక విచారణ జరపాలని సీజేఐ పేర్కొన్నారు. ‘‘లైంగిక ధోరణి ఆధారంగా యూనియన్‌లోకి ప్రవేశించే హక్కును పరిమితం చేయలేము. భిన్న లింగ సంబంధాలలో ఉన్న లింగమార్పిడి వ్యక్తులు వ్యక్తిగత చట్టాలతో సహా ప్రస్తుత చట్టాల ప్రకారం వివాహం చేసుకునే హక్కును కలిగి ఉంటారు. క్వీర్ జంటలతో సహా అవివాహిత జంటలు సంయుక్తంగా బిడ్డను దత్తత తీసుకోవచ్చు’’ అని సీజేఐ పేర్కొన్నారు. భిన్న లింగ జంటలే మంచి తల్లిదండ్రులుగా ఉంటారని చట్టం భావించట్లేదని అన్నారు.
ఇక, ఈ విషయంలో నాలుగు వేర్వేరు తీర్పులు ఉన్నాయని సీజేఐ డీవై చంద్రచూడ్ చెప్పారు. స్వలింగ సంపర్కుల వివాహాలపై భిన్నాభిప్రాయాలు ఉన్నాయని అన్నారు. ‘‘ప్రాథమిక హక్కులను పరిరక్షించడానికి కోర్టు ఆదేశాలు జారీ చేయడాన్ని అధికార విభజన సిద్ధాంతం అడ్డుకోదు. న్యాయస్థానం చట్టం చేయదు, కానీ దానిని అర్థం చేసుకుని అమలు చేయగలదు’’ అని సీజేఐ అన్నారు. స్వలింగ సంపర్కం, హోమో సెక్సువాలిటీ అనేది పట్టణ భావన కాదని.. సమాజంలోని ఉన్నత వర్గానికి మాత్రమే పరిమితం కాదని తెలిపారు. వివాహం స్థిరమైన, మార్పులేని సంస్థ అని చెప్పడం సరికాదని అన్నారు. ప్రత్యేక వివాహ చట్టాన్ని కొట్టివేస్తే.. అది దేశాన్ని స్వాతంత్య్ర పూర్వ యుగానికి తీసుకెళ్తుందని ఆయన అన్నారు.
ప్రత్యేక వివాహ చట్టం యొక్క పాలనలో మార్పు అవసరమా లేదా అనేది పార్లమెంటు నిర్ణయించాలని పేర్కొన్నారు. ఈ న్యాయస్థానం శాసనసభ పరిధిలోకి రాకుండా జాగ్రత్తపడాలి అని చెప్పారు. లైంగిక ధోరణి ఆధారంగా వ్యక్తుల పట్ల వివక్ష చూపకూడదని సమానత్వం డిమాండ్ చేస్తుందని సీజేఐ పేర్కొన్నారు. జీవిత భాగస్వామిని ఎన్నుకునే సామర్థ్యం.. ఆర్టికల్ 21 ప్రకారం జీవించే హక్కు, స్వేచ్ఛ మూలానికి వెళ్తుతుందని చెప్పారు. ‘‘జీవిత భాగస్వామిని ఎన్నుకోవడం అనేది ఒకరి జీవిత గమనాన్ని ఎంచుకోవడంలో అంతర్భాగం. కొందరు దీనిని తమ జీవితంలో అత్యంత ముఖ్యమైన నిర్ణయంగా భావించవచ్చు. ఈ హక్కు ఆర్టికల్ 21 ప్రకారం జీవించే హక్కు, స్వేచ్ఛ మూలానికి వెళుతుంది’’ అని పేర్కొన్నారు.
ఇక, ఈ అంశంపై సీజేఐ నేతృత్వంలోని ధర్మాసనం.. 10 రోజుల విచారణ తర్వాత తీర్పును మే 11న రిజర్వ్ చేసింది. ఈ విచారణ సందర్భంగా పిటిషనర్లు తమ వివాహాన్ని చట్టబద్ధంగా గుర్తించాలని పట్టుబట్టారు. స్వలింగ సంపర్కులకు వివాహ హోదా ఇవ్వకుండా వారికి కొన్ని హక్కులను కల్పించడాన్ని పరిగణించవచ్చని కేంద్ర ప్రభుత్వం తెలిపింది. తీర్పును రిజర్వ్ చేసిన 5 నెలల తర్వాత సర్వోన్నత న్యాయస్థానం నేడు తీర్పును వెలువరించింది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి