Traffic Challan: బీ అలర్ట్‌.. హెల్మెట్ పెట్టుకున్నా.. అలా చేస్తే ఫైన్‌ తప్పదు..

Traffic Challan:  రోడ్డు ప్రమాదాలను తగ్గించేందుకు  నూతన మోటారు వాహనాల చట్టాన్ని( New Motor Vehicle Act 2019)  మరింత క‌ఠినంగా అమలు చేయాల‌ని ప్ర‌భుత్వం భావిస్తోంది. ప్ర‌ధానంగా పోలీసులు ద్విచక్రవాహనదారులపై స్పెషల్ ఫోకస్ పెట్టారు.  

Traffic Challan:  రోడ్డు ప్ర‌మాదాలు రోజురోజుకు పెరుగుతుండ‌టంతో నూతన మోటారు వాహనాల చట్టాన్ని(New Motor Vehicle Act 2019) క‌ఠినంగా అమ‌లు చేయాలని కేంద్ర‌, రాష్ట్ర ప్ర‌భుత్వాలు  భావిస్తున్నాయి. రోడ్డు ప్ర‌మాదాలు ఎక్కువ‌గా ద్విచ‌క్ర వాహ‌నాలు నడిపించే వారికే కావ‌డంతో వారిపై స్పెష‌ల్ ఫోక‌స్ పెట్టింది ప్రభుత్వం. 

చాలామంది వాహనాదారులు హెల్మెట్‌ ఉన్నా.. పెట్టడం లేదు. మ‌రికొంత మంది స్టైల్‌ కోసం పెట్టుకోవ‌డం లేదు. ఈ క్ర‌మంలో ద్విచక్ర వాహనం నడిపే సమయంలో తప్పనిసరిగా హెల్మెట్ ధరించాలని సూచించింది. హెల్మెట్ లేకుండా డ్రైవింగ్ చేయడం ట్రాఫిక్ నిబంధనలను ఉల్లంఘించడమే కాకుండా ఇకపై భారీ మొత్తంలో చలాన్ విధించ‌వ‌చ్చు. కొత్త మోటారు వాహన చట్టం ప్ర‌కారం ద్విచక్రవాహనంపై ప్రయాణించే ఇద్దరికీ హెల్మెట్ తప్పనిసరి. కాగా.. చాలామంది దీనిని తరచూ ఉల్లంఘిస్తున్నారు. బైక్‌ నడిపే వ్యక్తులు కూడా హెల్మెట్‌ ధరించడం లేదు. మ‌రికొంద‌రూ హెల్మెట్ ధరించినా ట్రాఫిక్ నిబంధనలను ఉల్లంఘిస్తున్నారు. దీనివల్ల రూ.2000 ట్రాఫిక్ చలాన్ పడుతుంది. ఆ వివరాలేంటో తెలుసుకుందాం..

 నూతన మోటారు వాహనాల చట్టం( New Motor Vehicle Act 2019) ప్రకారం.. ద్విచక్ర వాహనం నడిపితే ప్ర‌తి రైడ‌ర్ హెల్మెట్ త‌ప్ప‌నిస‌రిగా ధ‌రించాలి. హెల్మెట్ ధరించకపోతే, రూల్ 194D MVA ప్రకారం రూ.1000 జరిమానా విధించబడుతుంది. అలాగే.. ద్విచ‌క్ర వాహ‌నం నడుపుతున్నప్పుడు హెల్మెట్ స్ట్రిప్ ధరించకపోతే రూల్ 194D MVA ప్రకారం అతనికి రూ.1000 చలాన్ విధించ‌బ‌డుతుంది. ఇది మాత్రమే కాదు. నాసిరకం హెల్మెట్ ధరించినా.. లేదా BIS రిజిస్ట్రేషన్ లేకపోయినా ఆ రైడర్‌కు 194D MVA ప్రకారం మరో రూ.1000 చలాన్‌ చెల్లించాల్సి ఉంటుంది.

నూత‌న మోటారు వాహనాల చట్టం ప్రకారం.. ప్ర‌తి ద్విచ‌క్ర వాహ‌నాదారుడు బ్యూరో ఆఫ్ ఇండియన్ స్టాండర్డ్స్ (బీఐఎస్) సర్టిఫైడ్ హెల్మెట్‌లను మాత్రమే విక్రయించాలని రెండేళ్ల క్రితం కేంద్రం ఆదేశించింది. సుప్రీంకోర్టు ఆదేశాల మేరకు రోడ్డు భద్రతపై ఏర్పాటు చేసిన కమిటీ మార్చి 2018లో దేశంలో తేలికపాటి హెల్మెట్‌లను సిఫార్సు చేసింది. దీంతోపాటు బీఐఎస్‌ సర్టిఫైడ్‌ తప్పనిసరి చేసింది.

పిల్లలు కూర్చోవడానికి నియమాలు

రోడ్డు రవాణా మరియు రహదారుల మంత్రిత్వ శాఖ ఇటీవల నాలుగు సంవత్సరాల కంటే తక్కువ వయస్సు ఉన్న పిల్లలను ద్విచక్ర వాహనాలపై తీసుకెళ్లడానికి భద్రతా నియమాలను మార్చింది. కొత్త ట్రాఫిక్ నిబంధనల ప్రకారం.. పిల్లలను రవాణా చేసేటప్పుడు ద్విచక్ర వాహనదారులు హెల్మెట్ మరియు బెల్ట్‌లను ఉపయోగించడం తప్పనిసరి. దీనితో పాటు, వాహనం యొక్క వేగాన్ని కూడా కేవలం 40 కిలోమీటర్లకు పరిమితం చేయాలి. కొత్త ట్రాఫిక్ నియమాన్ని ఉల్లంఘిస్తే రూ. 1,000 జరిమానా విధించవచ్చు. అలాగే డ్రైవర్ డ్రైవింగ్ లైసెన్స్‌ను మూడు నెలల పాటు సస్పెండ్ చేయవచ్చు

నూత‌న మోటారు వాహనాల చట్టం ప్రకారం.. ఒకవేళ సిగ్నల్స్ (రెడ్ లైట్‌) క్రాస్‌ చేయడం లేదా ఓవర్ రైడింగ్ లేదా ఎదురుగా రావడం.. ఇంకా పలు ట్రాఫిక్ నిబంధనలను ఉల్లంఘిస్తే.. రూ. 2,000 వ‌ర‌కూ జరిమానా విధించ‌వ‌చ్చు. 

అలా చేస్తే.. రూ.20వేలు ఫైన్‌..

నూత‌న మోటార్ వాహ‌నదారుల చ‌ట్టం ప్ర‌కారం.. వాహనాన్ని ఓవర్‌లోడ్ చేసినందుకు రూ.20,000 భారీ జరిమానాను ఎదుర్కోవలసి ఉంటుంది. ఇలాంటి సమయంలో టన్నుకు రూ.2,000 అదనపు జరిమానా కూడా చెల్లించాల్సి ఉంటుంది.

చలాన్ చెల్లించే విధానం: 

మీ ఇ-చలాన్ చెల్లించ‌డానికి లేదా తెలుసుకోవడానికి రవాణా శాఖ అధికారిక వెబ్‌సైట్ https://echallan.parivahan.gov.in/ని సందర్శించాలి. దీని తర్వాత, చెక్ ఆన్‌లైన్ సేవలలో చెక్ చలాన్ స్థితి ఎంపికను ఎంచుకోవాలి. ఆ తర్వాత.. డ్రైవింగ్ లైసెన్స్ నంబర్, వాహనం నంబర్ లేదా చలాన్ నంబర్ వివరాలను నమోదు చేయడం ద్వారా మీ చలాన్‌ను కనుగోవ‌చ్చు. ఇలా కాకుండా.. మీ వాహ‌న‌ ఇంజిన్ నంబర్ లేదా ఛాసిస్ నంబర్‌లోని చివరి ఐదు నంబర్‌లను నమోదు చేయడం ద్వారా కూడా ఈ చ‌లాన్ వివ‌రాల‌ను తెలుసుకోవ‌చ్చు. ఆ తర్వాత Get Detail అనే ఆప్షన్‌ను ఎంచుకోండి.

ఇప్పుడు చలాన్ వివరాలన్నీ మీ స్క్రీన్‌పై కనిపిస్తాయి. చలాన్ చెల్లించడానికి, మీరు చలాన్ ప్రక్కన వ్రాసిన పే నౌ ఆప్షన్‌ను ఎంచుకోవాలి. మీ సౌలభ్యం ప్రకారం చెల్లింపు మోడ్‌ను ఎంచుకుని, చెల్లింపు చేయండి. ఇ-చలాన్ చెల్లింపు తర్వాత, మీ రిజిస్టర్డ్ మొబైల్ నంబర్‌కు లావాదేవీ ID సందేశం వస్తుంది.