పోరాటం లేకుండానే చైనాకు మోడీ 1,000 చ‌ద‌ర‌పు మీట‌ర్లు భూభాగాన్ని ఇచ్చేశారు - రాహుల్ గాంధీ

ఎలాంటి పోరాటమూ లేకుండానే ప్రధాని నరేంద్ర మోడీ చైనాకు కొంత భూభాగాన్ని ఇచ్చేశారని కాంగ్రెస్ నాయకుడు, ఎంపీ రాహుల్ గాంధీ ఆరోపించారు. మన భారత భూభాగాన్ని ఎలా తిరిగి స్వాధీనం చేసుకుంటుందో ప్రభుత్వం చెప్పాలని డిమాండ్ చేశారు. 

ప్రధాని నరేంద్ర మోడీ చైనాకు 1,000 చదరపు కిలోమీటర్ల భారత భూభాగాన్ని ఎలాంటి పోరాటం లేకుండానే ఇచ్చారని కాంగ్రెస్‌ నేత రాహుల్‌గాంధీ బుధవారం ఆరోపించారు. ఏప్రిల్ 2020 నాటికి సరిహద్దులో ఉన్న యథాతథ స్థితిని పునరుద్ధరించాలన్న భారత్ డిమాండ్‌ను అంగీకరించడానికి చైనా నిరాకరించిందని ఆయ‌న చెప్పారు. 

తూర్పు లడఖ్‌లోని గోగ్రా-హాట్‌స్ప్రింగ్స్ ప్రాంతంలోని పెట్రోలింగ్ పాయింట్ 15 వద్ద భారత్, చైనా సైన్యాలు తమ దళాలను ఉపసంహరించుకున్న నేప‌థ్యంలో రాహుల్ గాంధీ ఈ వ్యాఖ్య‌లు చేశారు. ఈ సంద‌ర్భంగా కేంద్ర ప్ర‌భుత్వాన్ని విమ‌ర్శిస్తూ ఆయ‌న ట్విట్ట‌ర్ లో ఓ పోస్ట్ చేశారు. ‘‘ ఏప్రిల్ 2020 నాటి యథాతథ స్థితిని పునరుద్ధరించాలనే భారతదేశం డిమాండ్‌ను అంగీకరించడానికి చైనా నిరాకరించింది. ఎలాంటి పోరాటమూ లేకుండా చైనాకు ప్రధాని 1,000 చదరపు కిలోమీటర్ల భూభాగాన్నిఇచ్చారు. ’’ అని ఆయన ట్వీట్ చేశారు.

ఈ భూభాగాన్ని ఎలా తిరిగి పొందుతారో భారత ప్రభుత్వం వివరించగలదా ? అని ఆయ‌న రాహుల్ గాంధీ ప్ర‌శ్నించారు. కాగా.. మే 5, 2020న పాంగోంగ్ సరస్సు ప్రాంతంలో జరిగిన హింసాత్మక ఘర్షణ తర్వాత తూర్పు లడఖ్ సరిహద్దులో ప్రతిష్టంభన ఏర్పడింది.ఇరుపక్షాలు క్రమంగా తమ మోహరింపును పెంచాయి. సైనిక, దౌత్యపరమైన చర్చల పరంపర ఫలితంగా, పాంగోంగ్ సరస్సు ఉత్తర, దక్షిణ ఒడ్డున గోగ్రా ప్రాంతంలో గత సంవత్సరం ఇరుపక్షాలు వియోగం ప్రక్రియను పూర్తి చేశాయి. గోగ్రాలోని పెట్రోలింగ్ పాయింట్ 17 (ఎ)లో దళాలు, సామగ్రిని ఉపసంహరించుకోవడం గత ఏడాది ఆగస్టులో జరగగా, పాంగోంగ్ సరస్సు ప్రాంతంలో విచ్ఛేదనం గత ఏడాది ఫిబ్రవరిలో జరిగింది.

రాహుల్ గాంధీ చేప‌ట్టిన భార‌త్ జోడో యాత్ర కేర‌ళ‌లో కొన‌సాగుతోంది. బుధ‌వారం ఎనిమిదో రోజు నవాయిక్కుళం నుండి ఈ యాత్ర ప్రారంభ‌మైంది. ఈ యాత్ర‌లో ఉన్న స‌మ‌యంలోనే ఆయ‌న ఈ వ్యాఖ్య‌లు చేశారు.ఉదయం తిరువనంతపురంలోని వర్కాలలోని శివగిరి మఠాన్ని సందర్శించి శ్రీనారాయణ గురు సమాధి వద్ద నివాళులర్పించారు. ఈ సందర్భంగా రాహుల్ గాంధీ మాట్లాడుతూ.. మతం బోధించే మొదటి పదం ‘ఓం శాంతి’ అని, కానీ హిందువుల ప్రతినిధిగా చెప్పుకునే పార్టీ దేశంలో ‘అశాంతి’ని ఎలా వ్యాప్తి చేస్తోందని ఆయ‌న ప్ర‌శ్నించారు.

“హిందువుల ప్రతినిధిగా చెప్పుకునే పార్టీ దేశం మొత్తం మీద అశాంతి ఎలా సృష్టిస్తోందో దయచేసి నాకు వివరించండి? వారు ఎక్కడికి వెళ్లినా సామరస్యాన్ని ధ్వంసం చేస్తున్నారు, ప్రజలపై దాడులు చేస్తున్నారు, ప్రజలను విభజిస్తున్నారు. దుర్వినియోగం చేస్తున్నారు ” అని రాహుల్ గాంధీ అన్నారు. “అన్ని మతాల సారాంశం శాంతి, సామరస్యం, కరుణ. అన్ని మతాలు ఒక‌రినొక‌రు గౌర‌వించుకోవాల‌ని బోధిస్తాయి. మతం, సంఘం, భాష మొదలైన వాటితో సంబంధం లేకుండా భారతీయులందరినీ ఏకం చేయడమే యాత్ర ఉద్దేశం” అని గాంధీ తెలిపారు.