Manipur Violence : మణిపూర్ హింసపై జేఎన్ యూ ప్రొఫెసర్ సంచలన వ్యాఖ్యలు..

Manipur Violence : మణిపూర్ లో 53 శాతం మంది ప్రజలు మైతీ కమ్యూనిటీకి చెందినవారు. వీరు ప్రధానంగా ఇంఫాల్ లోయ సమీపంలో నివసిస్తున్నారు. కొండ ప్రాంతాల్లో గిరిజన, కుకి, నాగా తెగలు నివాసం ఉంటున్నారు. వీరి జనాభాలో 40 శాతం ఉన్నారు. ఇటీవ‌ల రాష్ట్రంలో జరిగిన హింస‌లో దాదాపు 60 మందికి పైగా ప్రాణాలు కోల్పోయారు.

JNU professor's sensational remarks on Manipur Violence: ఇటీవ‌ల మ‌ణిపూర్ లో చోటుచేసుకున్న హింసాత్మ‌క ఘ‌ట‌న‌ల కార‌ణంగా 60 మందికి పైగా ప్రాణాలు కోల్పోయారు. పెద్ద  సంఖ్య‌లో ఆస్తుల న‌ష్టం జ‌రిగింది. ఇప్ప‌టికీ ప‌లు ప్రాంతాల్లో ఉద్రిక్త ప‌రిస్థితులు ఉన్నాయి. ఆర్మీ స‌హా కేంద్ర బ‌ల‌గాలు రంగంలోకి దిగాయి. ఈ క్ర‌మంలోనే మ‌ణిపూర్ హింస‌పై సంచ‌ల‌న వ్యాఖ్య‌లు చేశారు. 

మణిపూర్ లో జరిగిన హింసాకాండ పక్కా ప్రణాళికతో జరిగిందని జవహర్ లాల్ నెహ్రూ విశ్వవిద్యాలయం (జేఎన్ యూ) ప్రొఫెసర్ భగత్ ఓయినం ఆరోపించారు. మణిపూర్ లో జరిగిన హింసాకాండకు సంబంధించి పీపుల్స్ అలయన్స్ ఫర్ పీస్ అండ్ ప్రోగ్రెస్ మణిపూర్, ఢిల్లీ మణిపురి సొసైటీ ఆధ్వర్యంలో మంగళవారం ఢిల్లీలోని ప్రెస్ క్లబ్ ఆఫ్ ఇండియాలో విలేకరుల సమావేశం నిర్వహించారు. భారతీయ జనతా పార్టీ ప్రభుత్వం డ్రగ్ మాఫియాపై కఠిన చర్యలు తీసుకుందనీ అందుకే ఈ ఘటనలో డ్రగ్ మాఫియా క్రియాశీలకంగా మారిందని, ఈ మణిపూర్ హింసలో వారి పాత్ర పెద్దదని ప్రొఫెసర్ భగత్ ఓయినం అన్నారు. మణిపూర్ లో ఎన్నికల రాజకీయాల ద్వారా రాజ్యాంగ విరుద్ధంగా బయటి నుంచి వచ్చి ఓటర్లుగా నమోదైన కుకీల పలుకుబడి లక్ష్యాల్లో ఒకటని, అందుకే ఈ హింస జరిగిందని, ఫలానా సామాజిక వర్గానికి చెందిన వారిని లక్ష్యంగా చేసుకున్నారని ప్రొఫెసర్ భగత్ ఓయినం ఆరోపించారు.

మైతీ సామాజిక వర్గానికి ఎస్టీ హోదా ఇస్తే కుకీ సామాజికవర్గం ఉద్యోగాలు ప్రమాదంలో పడతాయనే భయం కుకి కమ్యూనిటీలో ఉందనీ, ఇది కూడా హింసకు ఒక కారణమని ప్రొఫెసర్ భగత్ ఓయినం అన్నారు. రాజ్యాంగ విరుద్ధంగా మయన్మార్ నుంచి వచ్చిన కుకీ సామాజిక వర్గానికి చెందిన వారికి కూడా కేంద్ర ప్రభుత్వంలో ఉద్యోగాలు వచ్చాయని ప్రొఫెసర్ భగత్ తీవ్రమైన ఆరోపణలు చేస్తూ.. వారు భారతీయులమని పత్రాలను ఎవరు తయారు చేశారనేది దర్యాప్తు చేయాల్సిన అంశమన్నారు. మణిపూర్ లోని కోగ్రూ హిల్స్ లో ఉన్న 200 ఏళ్ల పురాతన శివాలయాన్ని కొందరు బయటి వ్యక్తులు లక్ష్యంగా చేసుకుని ధ్వంసం చేశారు.. మరోవైపు, మణిపూర్ హింసాకాండ సమయంలో తమకు సకాలంలో సహాయం అందించలేదనీ, ప్రభుత్వం సకాలంలో సహాయం చేసి హింసను నియంత్రించి ఉంటే ఇంత పెద్ద సంఘటన జరిగి ఉండేది కాదని మణిపూర్ హింస బాధితురాలు రుబీనా అన్నారు. ఇది రాష్ట్ర ప్రభుత్వ వైఫల్యమన్నారు.

ఈ హింసలో మైతీ సామాజిక వర్గానికి చెందిన వారిని లక్ష్యంగా చేసుకుని వారి ఇళ్లను కూల్చివేశారని రుబీనా ఆరోపించారు. ఇదిలావుండగా, జనరల్ ఆఫీసర్ కమాండింగ్ (జిఒసి) స్పియర్ కార్ప్స్ మణిపూర్ ముఖ్యమంత్రి ఎన్ బీరెన్ సింగ్ తో సమావేశమై రాష్ట్రంలో నెలకొన్న భద్రతా పరిస్థితులపై చర్చించారు. హింసకు కారణమైన వారిని శిక్షించడానికి ఉన్నత స్థాయి విచారణ జరుపుతామనీ, అశాంతిని నియంత్రించడంలో తమ బాధ్యతలను నిర్వర్తించడంలో విఫలమైన వారిపై చర్యలు తీసుకుంటామని తెలియజేస్తూ శాంతిని కాపాడాలని సిఎం బీరెన్ సింగ్ సోమవారం ప్రజలను కోరారు. ఈశాన్య రాష్ట్రాన్ని ఉక్కిరిబిక్కిరి చేసిన జాతి ఘర్షణలపై మణిపూర్ సిఎం తన మొదటి బహిరంగ ప్రతిస్పందనలో, పరిస్థితిని పర్యవేక్షించినందుకు.. సాధ్యమైనంత త్వరగా సాధారణ స్థితిని పునరుద్ధరించడానికి కేంద్ర బలగాలను పంపినందుకు కేంద్ర హోం మంత్రి అమిత్ షాకు కృతజ్ఞతలు తెలిపారు.

హింసాకాండలో చిక్కుకున్న వారికి అత్యుత్తమ చికిత్స అందిస్తున్నామని సీఎం తెలిపారు. కాగా, మ‌ణిపూర్ హింసలో ఇప్పటివరకు 60 మంది ప్రాణాలు కోల్పోగా, 231 మంది గాయపడ్డారని మణిపూర్ సీఎం తెలిపారు. అలాగే, మే 3న జరిగిన దురదృష్టకర ఘటనల్లో (అల్లర్లు) సుమారు 1,700 ఇళ్లు దగ్ధమయ్యాయి. రాష్ట్రంలో శాంతిని పునరుద్ధరించాలని ప్రజలకు విజ్ఞప్తి చేస్తున్నట్టు పేర్కొన్నారు. అలాగే, ప్రజా రవాణాను అడ్డుకోవద్దనీ, శాంతికి విఘాతం క‌లిగించ‌వ‌ద్ద‌ని ప్రజలకు విజ్ఞప్తి చేశారు.