మహిళా యజమాని బెడ్ రూంలో స్పై కెమెరా.. ప్రైవేట్ వీడియోలతో బ్లాక్ మెయిల్.. ఓ పనివాడి ఘాతుకం...

ఇంట్లో పనిచేయడం కోసం వచ్చి.. ఏకంగా యజమానురాలి బెడ్రూంలోనే స్పై కెమెరా పెట్టాడో పనివాడు. ఆ వీడియోలతో యజమానిమీద బ్లాక్ మెయిలింగ్ కు పాల్పడుతున్నాడు. 

గురుగ్రాం : ఇంట్లో పని చేసే వ్యక్తి ఏకంగా యజమాని బెడ్ రూమ్ లోనే సీక్రెట్ కెమెరా అమర్చిన షాకింగ్ ఘటన గురుగ్రాంలో వెలుగు చూసింది. ఈ మేరకు ఆ మహిళ యజమానురాలు పోలీసులకు ఫిర్యాదు చేసింది. ఆ తర్వాత బెడ్ రూమ్ కు సంబంధించిన ప్రైవేట్ వీడియోలను సేకరించిన ఆ పనిమనిషి వాటిని సోషల్ మీడియాలో పెడతానని బ్లాక్ మెయిలింగ్ కు దిగాడు. రూ.లక్షలు ఇవ్వాలని లేకుంటే వాటిని వైరల్ చేస్తానని  బెదిరించాడు. 

దీంతో ఏం  చేయాలో తోచని ఆ మహిళ పోలీసులకు ఫిర్యాదు చేసింది.. ఆమె ఫిర్యాదు మేరకు పోలీసులు విచారణ చేపట్టారు. ఫిర్యాదులో ఆమె పేర్కొన్న వివరాలు ఇలా ఉన్నాయి… పనిమనిషి కోసం ఓ ప్లేస్మెంట్ ఏజెన్సీ ద్వారా కొద్ది రోజుల క్రితం ప్రస్తుతం ఉన్న వ్యక్తిని నియమించుకున్నారు. అతను ఇంట్లో ఎవరూ లేని సమయంలో బెడ్రూంలో స్పై కెమెరాను ఫిక్స్ చేశాడు. ఆ తర్వాత వారి ప్రైవేటు వీడియోలను సేకరించాడు. ఈ విషయం యజమానికి తెలియదు. గతవారం ఇల్లు శుభ్రం చేద్దామని చేస్తుండగా.. సీక్రెట్ కెమెరా యజమానురాలి కంట పడింది. 

దీంతో వెంటనే పనిమనిషిని ఆరా తీసి..  పనిలో నుంచి తీసేసింది. ఈ విషయం ఎవరికైనా తెలిస్తే బాగుండదని, పరువు పోతుందన్న భయంతో పోలీసులకు కూడా ఫిర్యాదు చేయలేదు. అయితే, పని మానేసి వెళ్లిపోయిన పనిమనిషి.. ఆ వీడియోలతో యజమానిని బ్లాక్మెయిల్ చేయడం మొదలుపెట్టాడు. తనకు రూ. రెండు లక్షలు  ఇవ్వాలని లేకపోతే ఆ వీడియోలను సోషల్ మీడియాలో పెట్టి వైరల్ చేస్తానని బెదిరింపులకు దిగాడు. దీంతో, ఆ మహిళ పోలీసులను ఆశ్రయించింది. ఆమె ఫిర్యాదు మేరకు కేసు నమోదు చేసుకున్న పోలీసులు.. నిందితుడైన పనిమనిషి శుభం కుమార్ ను  అరెస్టు చేయడానికి సిద్ధపడ్డారు.