అదానీకి ప్ర‌భుత్వ సొమ్మును పంచుతున్న మోడీజీ.. : కేంద్రంపై కాంగ్రెస్ చీఫ్ మ‌ల్లికార్జున ఖ‌ర్గే ఫైర్

Ranchi: కాంగ్రెస్ జాతీయ అధ్యక్షుడు మ‌ల్లికార్జున ఖ‌ర్గే మ‌రోసారి కేంద్ర ప్ర‌భుత్వం, ప్ర‌ధాని న‌రేంద్ర మోడీని టార్గెట్  చేస్తూ తీవ్ర స్థాయిలో విమ‌ర్శ‌లు గుప్పించారు. ప్ర‌ధాని మోడీకి తీవ్ర‌మైన అహంకారముంద‌ని ఆరోపించారు. అలాగే, దేశంలో భావ ప్రకటన స్వేచ్ఛ కరువైందని పేర్కొన్నారు. ప్రభుత్వాన్ని విమర్శిస్తే వారిని జైళ్లలో పెడుతున్నారని ఆరోపించారు.   

Congress chief Mallikarjun Kharge: కాంగ్రెస్ అధ్యక్షుడు మల్లిఖార్జున ఖర్గే శనివారం జార్ఖండ్ లో హ‌త్ సే హ‌త్ జోడో యాత్ర‌ ప్రచారాన్ని ప్రారంభించారు. ఈ సందర్భంగా ఆయన ప్రసంగిస్తూ మ‌రోసారి కేంద్ర ప్ర‌భుత్వం, ప్ర‌ధాని న‌రేంద్ర మోడీని టార్గెట్ చేస్తూ తీవ్ర స్థాయిలో విమ‌ర్శ‌లు గుప్పించారు. ప్ర‌ధాని మోడీకి తీవ్ర‌మైన అహంకారముంద‌ని ఆరోపించారు. అలాగే, అదానీ వ్యవహారంపై కేంద్ర ప్రభుత్వంపై తీవ్రస్థాయిలో విరుచుకుపడ్డారు. "అదానీ విషయాన్ని పార్లమెంటులో లేవనెత్తాం. 2019లో కేవలం లక్ష కోట్ల ఆదాయం ఉన్న ఆయన ఆస్తులు రెండున్నరేళ్లలో రూ.13 లక్షల కోట్లకు పెరిగాయి. 2 లక్షలు సంపాదిస్తున్న వ్యక్తి సంపద ఇంతగా పెరుగుతుందా?.." అని ఖర్గే ప్రశ్నించారు. "ఏం మ్యాజిక్ చేసింది? కేంద్రంలోని ప్ర‌ధాని న‌రేంద్ర మోడీ స‌ర్కారు అదానీకి ప్రభుత్వ సొమ్ము పంచిపెడుతోంది. ఎల్ఐసీ డబ్బు.. మోడీ అదానీని 13 లక్షల కోట్ల మనిషిని చేశారు. మోడీ ఎప్పుడూ అబద్ధాలు చెబుతుంటారు. రాహుల్ గాంధీ పార్ల‌మెంట్ ప్రసంగాన్ని అప్రజాస్వామికంగా తొలగించారు" అని మ‌ల్లికార్జున ఖ‌ర్గే అన్నారు. 

ప్రధాని మోడీకి చాలా అహంకారం.. 

ప్రధాని మోడీలో అహంకారం చాలా ఉందనీ, కానీ ఈ అహం ఎవరికీ ఉండదని ఆయన అన్నారు. "దేశంలో ద్రవ్యోల్బణం అంతకంతకూ పెరుగుతోంది. 2014లో మా ప్రభుత్వం అధికారంలోకి వచ్చాక ద్రవ్యోల్బణాన్ని తగ్గిస్తామని మోడీ చెప్పేవారు. ప్రధాని మోడీని అడుగుతున్నాను, ఇప్పుడు ఎక్కడున్నారు?  మీరు ఇచ్చిన హామీలు ఏమ‌య్యాయి" అని ప్ర‌శ్నించారు. జార్ఖండ్ ప్రభుత్వం బాగా పనిచేస్తోందని కాంగ్రెస్ అధ్యక్షుడు మల్లికార్జున ఖర్గే ప్రశంసించారు. రైతుల కోసం త‌మ పోరాటం కొన‌సాగుతుంద‌ని కూడా ఆయ‌న పేర్కొన్నారు. 

అదానీ వ్యవహారంపై ప్రభుత్వాన్ని ప్రశ్న‌లు.. 

అంతకు ముందు కేంద్రాన్ని టార్గెట్ చేస్తూ ఖర్గే మాట్లాడుతూ అదానీ వ్య‌వ‌హారంపై దేశానికి సమాధానాలు కావాలని అన్నారు. "అదానీ కుంభకోణంపై విచారణ జరగకూడదా? అదానీ కంపెనీల్లో పెట్టుబడులు పెట్టిన ఎల్ఐసీ డబ్బుల ధరలు పడిపోవడం ప్రశ్నించకూడదా? అదానీకి ఎస్బీఐ, ఇతర బ్యాంకులు ఇచ్చిన రూ.82,000 కోట్ల రుణం గురించి ప్రశ్నలు అడగకూడదా? అదానీ అనే పదాన్ని కూడా పార్లమెంటులో ఉచ్చరించడానికి మోడీ, మొత్తం ప్రభుత్వం అనుమతించకపోవడానికి కారణం ఏమిటి?.." అని మ‌ల్లికార్జున ఖ‌ర్గే ప్ర‌శ్నించారు.

దేశంలో భావ ప్రకటనా స్వేచ్ఛ క‌రువైంది.. 

కేంద్రంలోని బీజేపీ ప్రభుత్వంపై కాంగ్రెస్ అధ్యక్షుడు మల్లిఖార్జున ఖర్గే తీవ్రస్థాయిలో విరుచుకుప‌డుతూ.. జార్ఖండ్ లోని సాహెబ్ గంజ్ జిల్లాలో జరిగిన ర్యాలీలో పార్లమెంటులో తన ప్రసంగంలోని కొన్ని భాగాలను తొలగించారని ఆవేదన వ్యక్తం చేశారు. పార్లమెంటు లోపల గానీ, బయట గానీ భావ ప్రకటనా స్వేచ్ఛ లేదన్నారు. ధైర్యంగా మాట్లాడేవారిని జైళ్లలో పెడుతున్నారని ఆరోపించారు. ద్రవ్యోల్బణాన్ని కట్టడి చేస్తామన్న హామీతో 2014లో బీజేపీ అధికారంలోకి వచ్చిందని, కానీ అధికారంలోకి వచ్చినప్పటి నుంచి నిత్యావసర వస్తువుల ధరలు, పేదరికం పెరిగిపోతున్నాయన్నారు. దేశ మౌలిక సదుపాయాలను అభివృద్ధి చేసి భారత స్వాతంత్య్రం కోసం పోరాడింది కాంగ్రెస్ పార్టీయేనని ఖర్గే అన్నారు. రాష్ట్రంలో పార్టీ 60 రోజుల 'హాత్ సే హాత్ జోడో' కార్యక్రమాన్ని ప్రారంభించిన అనంతరం పాకూర్ లోని గుమానీ మైదానంలో కాంగ్రెస్ అధ్యక్షుడు ప్రసంగించారు.