జమ్మూ కాశ్మీర్ సరిహద్దుల్లో ప్రశాంతత

కొద్ది రోజులుగా ఉద్రిక్తత నెలకొన్న జమ్మూ కాశ్మీర్ సరిహద్దుల్లో ప్రశాంతత నెలకొంది. భారత సైన్యం ప్రకారం, మే 11, 12 తేదీల్లో ఎలాంటి కాల్పుల ఘటనలు జరగలేదు.

శ్రీనగర్ : భారత్, పాకిస్తాన్ మధ్య గత కొన్ని రోజులుగా కొనసాగుతున్న ఉద్రిక్తతల నడుమ మే 11, 12 తేదీల రాత్రులు ప్రశాంతంగా గడిచినట్లు భారత సైన్యం వెల్లడించింది. అంతర్జాతీయ సరిహద్దు వెంబడి జమ్మూ కాశ్మీర్ సహా ఇతర ప్రాంతాల్లో ఎటువంటి కాల్పులు, ఉల్లంఘనలూ జరగలేదని సైనిక అధికారులు తెలిపారు.ఏప్రిల్ 22న ఉగ్రవాదులు జరిపిన దాడులకు ప్రతిగా భారత్ చేపట్టిన ఆపరేషన్ సింధూర్ ద్వారా పాక్ మరియు పాక్ ఆక్రమిత కాశ్మీర్‌లోని ప్రధాన ఉగ్రవాద స్థావరాలను ధ్వంసం చేయడం జరిగింది. ఆపరేషన్ తర్వాత పాకిస్తాన్ బలగాలు ఎదురుదాడులు చేపట్టినా, తాజాగా రెండు రాత్రులు శాంతియుతంగా గడవడం గమనార్హం.

భారత వాయుసేన, నావికా దళం, భూసేన అధిపతులు మే 12న నిర్వహించిన సంయుక్త మీడియా సమావేశంలో ఈ వివరాలు వెల్లడించారు. ఈ సందర్భంగా, మే 7న జరిపిన సర్జికల్ దాడుల్లో 100 మందికి పైగా ఉగ్రవాదులు హతమయ్యారని తెలిపారు. 1999లో ఐసీ-814 విమాన హైజాక్, 2019 పుల్వామా దాడుల్లో పాత్ర ఉన్న తీవ్రవాదులు కూడా ఇందులో చనిపోయినట్లు వెల్లడించారు.పాకిస్తాన్ జరిపిన డ్రోన్ దాడులను భారత వైమానిక రక్షణ బలగాలు సమర్థంగా ఎదుర్కొన్నాయని ఎయిర్ మార్షల్ ఎ.కె. భారతి తెలిపారు. లక్ష్య స్థావరాలపై దాడులు జరిగినా, పౌరులకు ఎటువంటి నష్టం కలగకుండా చర్యలు తీసుకున్నామని వివరించారు. చక్లా, రఫీక్, రహీం యార్ ఖాన్ వంటి ప్రదేశాల్లోని ఉగ్రవాద కేంద్రాలపై దాడులు చేసి, పాక్‌కు స్పష్టమైన హెచ్చరిక పంపినట్లు చెప్పారు.

వాస్తవానికి, పాకిస్తాన్ వైపు నుండి భారీ ఫిరంగులు, కాల్పులు, డ్రోన్ ప్రయోగాలు దేశ సరిహద్దుల్లో అశాంతిని పెంచేలా మారాయి. అందుకే, భారత సైన్యం సమన్వయంతో ప్రతీకార చర్యలు తీసుకోవాల్సి వచ్చింది. కానీ లక్ష్యం శత్రువుల ప్రాణాలు తీసే కంటే, ఆ ఉగ్రశక్తుల మౌలిక మౌలిక సదుపాయాలను నేలమట్టం చేయడమేనని భారత రక్షణ రంగ అధిపతులు స్పష్టం చేశారు.మొత్తంగా చూస్తే, భారత్ చేపట్టిన ఆపరేషన్ సింధూర్ పాక్ ఉగ్రవాద శక్తులకు గట్టి హెచ్చరికగా మారింది. దాని ప్రభావంగా ఇప్పటివరకు అల్లకల్లోలంగా ఉన్న సరిహద్దుల్లో ప్రశాంతత కనిపించడం విశేషం.