ఆప్ ఖాతాల్లోకి 16 మిలియన్ డాలర్లు: కేజ్రీవాల్ పై ఖలీస్తానీ పన్నూన్ సంచలన ఆరోపణలు

ఖలీస్తానీ ఉగ్రవాది గురుపత్వంత్ సింగ్ పన్నూన్ ఆప్ పై ఆరోపణలు చేశారు. ఇప్పటికే ఢిల్లీ లిక్కర్ స్కాంలో అరెస్టైన  అరవింద్ కేజ్రీవాల్ పై ఈ ఆరోపణలు ప్రాధాన్యత సంతరించుకున్నాయి.

న్యూఢిల్లీ:  ఖలీస్తానీ ఉగ్రవాది గురుపత్వంత్ సింగ్  పన్నూన్  ఢిల్లీ ముఖ్యమంత్రి అరవింద్ కేజ్రీవాల్ పై ఆరోపణలు చేశారు.  2014, 2022 మధ్య ఖలీస్తానీ గ్రూపులు  ఆప్ ఖాతాలో  16 మిలియన్ డాలర్లను జమ చేశారని  ఆరోపణలు చేశారు. ఈ మేరకు సోషల్ మీడియా వేదికగా పన్నూన్  ఓ వీడియోను విడుదల చేశారు.

దేవిందర్ పాల్ సింగ్ భుల్లర్ ను విడుదల చేయాలని  ప్రతిపాదన చేసినట్టుగా పన్నూన్  తెలిపారు. ఇందుకు గాను  ఈ నగదునుఇచ్చారని ఆయన ఆరోపించారు.1993 లో ఢిల్లీ బాంబ్ పేలుడు ఘటనలో  భుల్లర్ చిక్కుకున్నాడు.

2014లో న్యూయార్క్ లోని గురుద్వారా రిచ్ మండ్ హిల్స్ లో కేజ్రీవాల్, ఖలిస్తాన్ అనుకూల సిక్కుల మధ్య రహస్య సమావేశం జరిగిందని  పన్నూన్ ఆరోపించారు. ఈ సమావేశంలోనే ఈ విషయమై ప్రతిపాదన జరిగిందని ఆయన ఆరోపించారు.  భుల్లర్ ను విడుదలకు కేజ్రీవాల్ హామీ ఇచ్చారని పన్నూన్  చెప్పారు.  ఈ మేరకు ఆర్ధిక సహాయం కోరినట్టుగా పన్నూన్ పేర్కొన్నారు.

ఇప్పటికే ఢిల్లీ లిక్కర్ స్కాంలో అరవింద్ కేజ్రీవాల్ ను ఈడీ అరెస్ట్ చేసిన విషయం తెలిసిందే. ఈ తరుణంలో ఈ అంశం వెలుగు చూసింది. జైలులో ఉన్న అరవింద్ కేజ్రీవాల్ కు మద్దతుగా  ఆప్  త్వరలోనే మేన్ భి కేజ్రీవాల్ ప్రచారాన్ని ప్రారంభించాలని నిర్ణయం తీసుకుంది. మరో వైపు ఈ నెల  31న ఇండియా కూటమి ఢిల్లీలోని రాంలీలా మైదాన్ లో ర్యాలీ చేయాలని తలపెట్టింది.  ఈ ర్యాలీని విజయవంతం చేసేందుకు గాను  ఈ నెల  26న అన్ని అసెంబ్లీ నియోజకవర్గాల్లో సన్నాహక సమావేశాలను నిర్వహించాలని ఆప్ నిర్ణయం తీసుకుంది.

ఈ నెల  27,28 తేదీల్లో  ఎమ్మెల్యేలు, ఇతర ప్రజా ప్రతినిధులు  జోనల్ స్థాయి సమావేశాలు నిర్వహించనున్నారు.ఈ నెల  31న రామ్ లీలా మైదానంలో నిర్వహించే  ర్యాలీలో  ప్రతి పోలింగ్ బూత్ నుండి  10 మంది పాల్గొనేలా చూడాలని ఆప్ నిర్ణయం తీసుకుంది.