జేఎంఐ యూనివర్సిటీకి కొత్త ఛాన్సలర్.. ఎవరు ఈ సైయదనా ముఫద్దల్ సైఫుద్దీన్..? ఆయ‌న గురించి వివ‌రాలు ఇవిగో

New Delhi: జామియా మిలియా ఇస్లామియా విశ్వవిద్యాలయం ఛాన్సలర్ (అమీర్-ఎ-జామియా)గా డాక్టర్ సైయదనా ముఫద్దల్ సైఫుద్దీన్ ను ఐదేళ్ల కాలానికి కోర్టు (అంజుమన్) సభ్యులు సోమవారం ఏకగ్రీవంగా ఎన్నుకున్నారు. 2023 మార్చి 14 నుంచి కొత్త ఛాన్సలర్ గా ఆయ‌న పదవీకాలం ప్రారంభం కానుంది.  

Jamia Millia Islamia (JMI): జేఎంఐ యూనివర్సిటీ ఛాన్సలర్ గా జామియా మిలియా ఇస్లామియా అంజుమన్ (కోర్టు) సభ్యులు డాక్టర్ సైయదనా ముఫద్దల్ సైఫుద్దీన్  ను ఏకగ్రీవంగా ఎన్నుకున్నారు. మార్చి 14 నుంచి ఐదేళ్ల కాలానికి ఆయన ఎన్నికయ్యారు. నజ్మా హెప్తుల్లా స్థానంలో సైఫుద్దీన్ బాధ్యతలు చేపట్టనున్నారు. యూనివర్సిటీ ఛాన్సలర్ గా హెప్తుల్లా ఐదేళ్ల పదవీకాలాన్ని గత ఏడాది పూర్తి చేసుకున్నారు. సోమవారం సమావేశమైన కోర్టు (అంజుమన్) ఈ కీలక నిర్ణయం తీసుకుంది. జామియా కోర్టులో ముగ్గురు ఎంపీలు సహా 45 మంది సభ్యులు ఉన్నారు. అనేక రంగాల్లో విశేష కృషి చేస్తున్న ముఫద్దల్ సైఫుద్దీన్ విద్య, పర్యావరణం, సామాజిక-ఆర్థిక అంశాలపై ప్రత్యేక దృష్టి సారించి సమాజ శ్రేయస్సు కోసం తన జీవితాన్ని అంకితం చేశారని జామియా యూనివర్శిటీ అడ్మినిస్ట్రేషన్ తెలిపింది. 

ముఫద్దల్ సైఫుద్దీన్ ఆధ్వర్యంలో అనేక కార్యక్రమాలు.. 

ముఫద్దల్ సైఫుద్దీన్ పర్యవేక్షించిన అత్యంత ప్రశంసనీయమైన ప్రపంచ కార్యక్రమాలలో సైఫీ బుర్హానీ అప్లిఫ్ట్ ప్రాజెక్ట్, టర్నింగ్ ది టైడ్, ప్రాజెక్ట్ రైజ్, ఆకలి నిర్మూలన, ఆహార వ్యర్థాలను తగ్గించడం, పర్యావరణాన్ని రక్షించడం వంటి ఎఫ్ఎంబి కమ్యూనిటీ కిచెన్ కు కృషి చేసినవి ఉన్నాయి. అంతర్జాతీయంగా ప్రశంసలు పొందిన ఆయన సమాజానికి సానుకూల సహకారం అందించడానికి, ఆదర్శ పౌరులను తయారు చేయడానికి, సుహృద్భావం, శాంతి, సామరస్యాన్ని నెలకొల్పడానికి కట్టుబడి ఉన్నారని అధికార వ‌ర్గాలు తెలిపాయి. 

సైఫుద్దీన్ కు పలు ప్రతిష్టాత్మక అవార్డులు..

ముఫద్దల్ సైఫుద్దీన్ కు పలు ప్రతిష్టాత్మక అవార్డులు, రివార్డులు లభించాయి. ప్ర‌పంచంలో అత్యంత ప్రభావవంతమైన 500 మంది ముస్లింల జాబితాలో చోటు దక్కించుకున్నారు. యూఎస్ క్యాపిటల్ లోని యూఎస్ హౌస్ ఆఫ్ రిప్రజెంటేటివ్స్ లో ఆయన చేసిన కృషిని పురస్కరించుకుని ప్రశంసాపత్రాన్ని అందుకున్నారు. పలు దేశాల్లో ఆయనకు ప్రభుత్వ అతిథిగా స్వాగతం ప‌లికాయి. ముఫద్దల్ సైఫుద్దీన్ 2014 నుండి బలమైన ప్రపంచ దావూదీ బోహ్రా ముస్లిం కమ్యూనిటీకి అధిపతిగా ఉన్నారు. 

ప్రఖ్యాత అల్-అజహర్ విశ్వవిద్యాలయం, కైరో వర్సిటీ పూర్వ విద్యార్థిగా..

సూరత్ లోని చారిత్రాత్మక దావూదీ బోహ్రా విద్యాసంస్థ అల్-జామియా-తుస్-సైఫియాకు ఆయన విశిష్ట సేవ‌లు అందించిన పూర్వ విద్యార్థి. ప్రపంచ ప్రఖ్యాత అల్-అజహర్ విశ్వవిద్యాలయం, ఈజిప్టులోని కైరో విశ్వవిద్యాలయం పూర్వ విద్యార్థి కూడా. 2023 ఫిబ్రవరి 10న ముంబ‌యిలో అల్-జామియా-టుస్-సైఫియా కొత్త క్యాంపస్ ను ఆయన ప్రారంభించారు.

గొప్ప ర‌చ‌యిత‌గా గుర్తింపు.. 

ముఫద్దల్ సైఫుద్దీన్ కు గొప్ప రచయిత గుర్తింపు ఉంది. గత ఐదు సంవత్సరాలుగా వార్షిక గ్రంథాన్ని రచించారు. ఆయన అద్భుతమైన, గుర్తింపు పొందిన‌ అరబిక్, ఉర్దూ కవితలను రాశారు. సాహిత్య వ్యాసాలు, కవితలు రాశారు. ప్రపంచవ్యాప్తంగా అనేక దాతృత్వ కార్యక్రమాలు చేస్తున్నారు. కాగా, జేఎంఐ యూనివర్సిటీ ఛాన్సలర్ గా తదుపరి 5 సంవత్సరాల పాటు ఆయన ఈ పదవిలో ఉంటారు.