మళ్లీ కుండపోత వర్షం.. అమర్‌నాథ్ యాత్రకు మరోసారి బ్రేక్

అమర్‌నాథ్ యాత్రను అధికారులు మరోసారి నిలిపివేశారు. భారీ వర్షాల కారణంగా ఈ నిర్ణయం తీసుకున్నట్లు అధికారులు తెలిపారు. ఈ క్రమంలో 4 వేల మంది యాత్రికులను అధికారులు సురిక్షిత ప్రాంతాలకు తరలించారు. 

అమర్‌నాథ్ యాత్రకు మళ్లీ అడ్డంకులు ఎదురవుతున్నాయి. అమర్‌నాథ్ యాత్ర మార్గంలో మధ్యాహ్నం 3 గంటల నుంచి భారీ వర్షం కురుస్తుండటంతో యాత్రను నిలిపివేశారు అధికారులు. 4 వేల మంది యాత్రికులను అధికారులు సురక్షితంగా తరలించారు. ఇక ... గత శుక్రవారం కూడా అమర్‌నాథ్ యాత్రను అధికారులు నిలిపివేసిన సంగతి తెలిసిందే. జమ్మూ- శ్రీనగర్ జాతీయ రహదారిపై వాతావరణం అనుకూలించకపోవడంతోనే ఈ నిర్ణయం తీసుకున్నట్లు అధికారులు తెలిపారు. శుక్రవారం రాంబన్ జిల్లాలో భారీ వర్షాల కారణంగా పలు చోట్ల కొండ చరియలు విరిగిపడ్డాయి. 

దక్షిణ కాశ్మీర్ హిమాలయాలలోని 3,880 మీటర్ల ఎత్తైన గుహ పుణ్యక్షేత్రానికి 43 రోజుల సుదీర్ఘ యాత్ర జూన్ 30న జంట ట్రాక్‌ల నుండి ప్రారంభమైంది.  దక్షిణ కాశ్మీర్‌లోని అనంత్‌నాగ్ జిల్లాలో సాంప్రదాయ 48-కిమీ నున్వాన్-పహల్గామ్ మార్గం, 14-కిమీ పొట్టి బల్తాల్,  మధ్య కాశ్మీర్‌లోని గందర్‌బాల్ జిల్లా మ‌ధ్య యాత్ర కొన‌సాగ‌నుంది. ఇప్పటివరకు 1.20 లక్షల మంది యాత్రికులు అమర్‌నాథ్ గుహ క్షేత్రాన్ని సందర్శించారు. ఆగస్ట్ 11న రక్షా బంధన్‌తో పాటు 'శ్రావణ పూర్ణిమ' సందర్భంగా ఈ పాదయాత్ర ముగియనుంది.