పాకిస్థాన్ లోని దాసు డ్యామ్ ప్రాజెక్ట్ లో భారీ అగ్ని ప్రమాదం.. చైనా ఇంజనీర్లు,కార్మికుల శిబిరాలు ధగ్దం..
సారాంశం
పాకిస్తాన్ లోని దాసు జలవిద్యుత్ ప్రాజెక్ట్ నిర్మాణంలో నిమగ్నమైన చైనా ఇంజనీర్ల శిబిరంలో మంటలు చెలరేగాయి. మంటలను పూర్తిగా ఆర్పేందుకు ఐదు గంటల సమయం పట్టిందని, షార్ట్సర్క్యూట్ వల్ల మంటలు చెలరేగినట్లు భావిస్తున్నామని పోలీసులు తెలిపారు.
వాయువ్య పాకిస్థాన్లో జలవిద్యుత్ డ్యామ్ నిర్మాణాన్ని చేపట్టిన చైనా కంపెనీ నివాస శిబిరాల్లో భారీ అగ్నిప్రమాదం జరిగింది. అంతర్జాతీయ మీడియా నివేదికల ప్రకారం.. వాయువ్య పాకిస్థాన్లో రిమోట్ హైడ్రోఎలక్ట్రిక్ డ్యామ్ నిర్మాణం చేస్తున్న చైనా ఇంజనీర్ల శిబిరంలో భారీ అగ్నిప్రమాదం జరిగింది. దిగువ కోహిస్థాన్లోని బార్సిన్ ప్రాంతంలోని చైనా ఇంజనీర్లు , కార్మికుల నివాస శిబిరాలు, దాసు జలవిద్యుత్ ప్రాజెక్టు గోడౌన్లలో మంగళవారం ఉదయం మంటలు చెలరేగాయని డాన్ వార్తాపత్రిక నివేదించింది.
ఎమర్జెన్సీ కాల్ అందుకున్న వెంటనే రెస్క్యూ టీమ్లోని ఫైర్ ఇంజన్లు సంఘటనా స్థలానికి చేరుకుని మంటలను ఆర్పడం ప్రారంభించాయి. మంటలను పూర్తిగా ఆర్పేందుకు ఐదు గంటల సమయం పట్టిందని, షార్ట్సర్క్యూట్ వల్ల మంటలు చెలరేగినట్లు భావిస్తున్నామని పోలీసులు తెలిపారు. ప్రాణ, ఆస్తి నష్టంపై ఎలాంటి సమాచారం లేదు.
ఈ ఘటనపై ఎగువ కోహిస్థాన్లోని రెస్క్యూ 1122 జిల్లా అత్యవసర అధికారి ఖలిక్ డాడ్ మాట్లాడుతూ.. మంటలు మొత్తం ప్రాంతాన్ని చుట్టుముట్టాయి , శిబిరాలు , గోడౌన్లను ధ్వంసం చేశాయని తెలిపారు. ఈ క్రమంలో చైనా ఇంజనీర్లు, కార్మికులను సమీపంలోని సురక్షిత ప్రాంతాలకు తరలించినట్టు తెలిపారు.
ఈ ఘటనపై దాసు డ్యామ్ జనరల్ మేనేజర్ అన్వరుల్ హక్ మీడియాతో మాట్లాడుతూ. "ఈ దుర్ఘటనపై దర్యాప్తు ప్రారంభించాము. ఇది మా ప్రామాణిక ఆపరేటింగ్ విధానాలలో భాగం. కాబట్టి ఇది మూడు రోజుల్లో పూర్తవుతుంది" అని తెలిపారు. 2017లో పాకిస్థాన్ జల మంత్రిత్వ శాఖ చైనా గెజౌబా గ్రూప్ కంపెనీకి దాసు డ్యామ్ నిర్మాణ కాంట్రాక్టును అప్పగించిందని దున్యా న్యూస్ నివేదించింది. ఈ శిబిరంలో చైనీస్ ఇంజనీర్లు, సర్వేయర్లు , మెకానిక్లు నివసించినట్లు నివేదిక పేర్కొంది.