తాబేళ్ల అక్రమ రవాణాను ఎందుకు నేరంగా పరిగణిస్తారు.? దీని వెనకాల ఉన్న అసలు కారణం ఏంటి..

'తాబేళ్లను అక్రమంగా తరలిస్తున్న ముఠాను గుట్టురట్టు చేసిన పోలీసులు'.. ఇలాంటి వార్తలను ఎప్పుడో ఒకప్పుడు చూసే ఉంటాం. అయితే తాబేళ్లను అక్రమ రవాణా ఎందుకు చేస్తారో ఎప్పుడైనా ఆలోచించారా.? దీని వెనకాల ఉన్న అసలు కథ ఏంటో ఇప్పుడు తెలుసుకుందాం..   

భారతదేశంలో తేబేళ్లను స్మగ్లింగ్ చేయడం నేరంగా పరిగణిస్తారు. ఇలా చేస్తూ పట్టుబడితే శిక్ష విధిస్తారు. భారతదేశం సహా ప్రపంచమంతా తాబేళ్లను అక్రమంగా రవాణా చేస్తుంటారు. అంతర్జాతీయ మార్కెట్‌కు వీటిని దొంగతనంగా రవాణా చేస్తున్నారు. ఈ తాబేళ్లను అమ్మడం ద్వారా కేటుగాళ్లు లక్షల రూపాయలు సంపాదిస్తున్నారు. వీటిలో కొన్ని తాబేళ్లకు మార్కెట్లో డిమాండ్‌ ఎక్కువగా ఉంటుంది. 

వీటిలో నక్షత్ర తాబేలు ముఖ్యమైంది. నక్షత్ర తాబేలు వెనుక పసుపు, నలుపు మచ్చల వంటి అందమైన ఆకారం ఉంటుంది. నిజానికి ఇది పిరమిడ్ లాగా ఉంటుంది. వన్యప్రాణి సంరక్షణ చట్టం 1972 ప్రకారం భారతీయ జంతువులను అక్రమంగా రవాణా చేయడం, నిల్వ చేయడం నేరంగా పరిగణిస్తారు. వన్యప్రాణుల అక్రమ రవాణా లేదా కొనుగోలు, అమ్మకం గురించి ఏదైనా సమాచారం అందితే, వన్యప్రాణుల రక్షణ చట్టంలోని సెక్షన్ 9(44) కింద నేరం నమోదు చేస్తారు. 

ఇందులో శిక్ష విధించే నిబంధన కూడా ఉంది. అదేవిధంగా, అంతరించిపోతున్న వృక్షజాలం, జంతుజాలంలో అంతర్జాతీయ వాణిజ్యంపై అంతర్జాతీయ కన్వెన్షన్ ప్రకారం, ఏ జంతువును కొనడం, అమ్మడంపై నిషేధం ఉంది. విదేశీ జంతువుల రాకతో స్థానిక జంతువులు ప్రమాదంలో పడతాయనే ఉద్దేశంతో నిషేధించారు. ఇక తాబేలును అక్రమ రవణా చేసిన వారిని పట్టుకుంటే ఏడేళ్ల జైలు శిక్ష పడుతుంది. 

ఎందుకు అక్రమ రవాణా చేస్తున్నారు.? 

తాబేళ్లకు ఉన్న డిమాండ్‌ కారణంగానే వీటిని అక్రమంగా రవాణా చేస్తున్నారు. ఆగ్నేయాసియాతో సహా అనేక ప్రదేశాల్లో, నక్షత్ర తాబేళ్లు అదృష్టానికి సంకేతంగా ప్రజలు నమ్ముతారు. వీటిని పెంచుకుంటే మంచి జరుగుతుందని కొందరు విశ్వసిస్తారు. ఈ కారణంగా వీటికి విపరీతమైన డిమాండ్ ఉంది. ఇక నక్షత్ర తాబేళ్ల నుంచి లైంగిక శక్తిని పెంచే మందులు తయారు చేస్తారు. దీంతో అంతర్జాతీయ మార్కెట్‌లో వీటికి మంచి డిమాండ్‌ ఉంది. తాబేళ్లు వైద్యంలో ఉపయోగించడం వల్ల ప్రపంచవ్యాప్తంగా అక్రమ రవాణా జరుగుతోంది.