School Holidays : తెలంగాణపైనా మురసు తుపాను అటాక్.. ఈ జిల్లాలకు రెడ్ అలర్ట్, స్కూళ్లకి సెలవులు
అర్నబ్ తుపానును మర్చిపోకముందే మురసు తుపాను ముప్పు ముంచుకొస్తోంది. కొత్త తుపాను ఇవాళ రాత్రి లేదా రేపు తెల్లవారుజామున తీరందాటే అవకాశాలున్నాయట. భారీ వర్షాల నేపథ్యంలో ఏపీలోనే కాదు తెలంగాణలోనూ స్కూళ్లకి సెలవులు వస్తున్నాయి.
School Holidays : ఎల్ నినో కారణంగా ఈ వర్షాకాలంలో తెలుగు రాష్ట్రాల్లో పెద్దగా వర్షాలు కురవలేదు.. కానీ ఇప్పుడు వరుస తుపానుల ప్రభావంతో జోరువానలు పడుతున్నాయి. ఇప్పటికే బంగాళాఖాతంలో ఏర్పడిన అర్నబ్ తుపాను ఏ స్థాయిలో బీభత్సం సృష్టించిందో చూశాం... ఇది తీరందాటే సమయంలో ఈదురుగాలులు, భారీ వర్షాలతో అల్లకల్లోలం చేసింది. దీని నుండి ఇంకా తేరుకోకముందే ఇదే బంగాళాఖాతంలో మరో అల్పపీడనం ఏర్పడింది.. అదికాస్త బలపడి మురసు తుపానుగా రూపాంతరం చెందింది. ఇది కూడా ఆంధ్ర ప్రదేశ్ తీరంవైపు దూసుకువస్తోంది.
ప్రస్తుతం మురసు తుపాను నెల్లూరుకు 120 కి.మీ, కావలికు 140 కి.మీ, తిరుపతి 170 కి.మీ, ఒంగోలుకు 180 కి.మీ, బాపట్లకు 200 కి. మీ దూరంలో కేంద్రీకృతం అయివుందని వాతావరణ శాఖ ప్రకటించింది. ఈ తుపాను ఇవాళ (నవంబర్ 2, సోమవారం) రాత్రి లేదా రేపు (నవంబర్ 3, మంగళవారం) తెల్లవారుజామున నెల్లూరు-న‌రసాపురం మ‌ధ్య ఒంగోలు సమీపంలో తీరాన్ని దాటే అవకాశం ఉందని ఏపీ విపత్తు నిర్వహణ సంస్థ (APSDMA) ప్రకటించింది.
ఈ తుపాను ప్రభావంతో ఇప్పటికే ఆంధ్ర ప్రదేశ్ లో భారీ వర్షాలు కురుస్తున్నాయి... దీంతో కొన్నిజిల్లాల్లో విద్యాసంస్థలకు సెలవు ఇచ్చారు. అయితే తెలంగాణపైనా మురుసు తుపాను విరుచుకుపడనుందని... బలమైన ఈదురుగాలులతో కూడిన భారీ నుండి అతిభారీ వర్షాలు కురుస్తాయని హైదరాబాద్ వాతావరణ కేంద్రం హెచ్చరిస్తోంది. దీంతో తుపాను తీవ్రత ఎక్కువగా ఉండే జిల్లాల్లో విద్యాసంస్థలకు సెలవులు ప్రకటిస్తున్నారు.