తెలంగాణలో ఇంజనీరింగ్ అద్భుతాలు... ఏపీని మించిన ఆదాయం, ఎంతో తెలుసా?
ఉమ్మడి ఆంధ్ర ప్రదేశ్ నుండి విడిపోయిన తెలంగాణ అద్భుత ప్రగతి సాధిస్తోంది. ఏపీని వెనక్కినెట్టి మరీ అభివృద్ధిలో దూసుకుపోతోంది. ఇంజనీరింగ్ ఎగుమతుల్లో అయితే అందనంత ఎత్తుకు ఎదిగింది.
Telangana Growth: భారతదేశంలో అతి తక్కువ వయసుగల రాష్ట్రం తెలంగాణ. ఈ రాష్ట్రం ఏర్పడి పది పదకొండేళ్లు మాత్రమే అవుతోంది... ఇంత తక్కువ కాలంలోనే వ్యాపారాభివృద్ధిలో దూసుకుపోతోంది. 2024–25 ఆర్థిక సంవత్సరంలో తెలంగాణ రాష్ట్రం ఎగుమతుల రంగంలో విశేష విజయాన్ని సాధించింది. భారత వాణిజ్య మంత్రిత్వ శాఖ వెల్లడించిన గణాంకాల ప్రకారం ఈ ఏడాది తెలంగాణ నుంచి 19.1 బిలియన్ డాలర్ల విలువైన సరుకులు ఎగుమతి అయ్యాయి. గత ఆర్థిక సంవత్సరం (2023–24)లో ఇది కేవలం 14.01 బిలియన్ డాలర్లుగా ఉంది… ఈసారి 36 శాతం వృద్ధి సాధించింది. 2020–21 తర్వాత ఎగుమతుల్లో ఇంత భారీ వృద్ధి సాధించడం ఇదే తొలిసారి.
భారతదేశంలో ఎగుమతుల పరంగా తెలంగాణ ఏడవ స్థానంలో నిలిచింది. గుజరాత్, మహారాష్ట్ర, తమిళనాడు, కర్ణాటక, ఉత్తరప్రదేశ్, ఆంధ్రప్రదేశ్ రాష్ట్రాల తర్వాత తెలంగాణ స్థానాన్ని దక్కించుకుంది. తెలంగాణ నుండి ముఖ్యంగా ఇంజనీరింగ్ గూడ్స్, ఔషధాలు, ఫార్మాస్యూటికల్స్, ఆర్గానిక్–ఇనార్గానిక్ కెమికల్స్, ఎలక్ట్రానిక్ వస్తువులు ఎగుమతి అవుతున్నాయి. ఆసక్తికర విషయం ఏమిటంటే 2024–25లో తెలంగాణ నుంచి ఇంజనీరింగ్ గూడ్స్ ఎగుమతుల విలువ 7.54 బిలియన్ డాలర్లకు చేరుకుంది. ఈ విషయంలో ఏపీకంటే ముందుంది తెలంగాణ.