ముగ్గురు కలిసి ఏ పనిచేయకూడదని ఎందుకు అంటారు? దీని వెనకాల ఏమైనా శాస్త్రీయత ఉందా..

ప్రపంచంలో చాలా దేశాల్లో ఎన్నో ఆచారాలు, మరెన్నో విశ్వాసాలు ఉంటాయి. కొందరు వీటిని మూఢా నమ్మకాలని కొట్టేస్తే మరికొందరు మాత్రం తమ పెద్దలు చెప్పిన విషయాలను ఇప్పటికీ తూచాతప్పకుండా పాటిస్తుంటారు. అలాంటి ఒక నమ్మకం గురించి ఈరోజు తెలుసుకుందాం..   

'ముగ్గురు మూడిపడదు' చాలా మంది ఈ మాటను ఏదో ఒక సమయంలో వినే ఉంటాం. ముఖ్యంగా పెద్దలు ఈ విషయాన్ని పదే పదే చెబుతుంటారు. పెద్దలు చెప్పే అనేక విశ్వాసాల్లో ఇదీ ఒకటి. 3 అనే సంఖ్యను శుభప్రదంగా పరిగణించరు. శుభ కార్యాలలో 5, 7, 11, 21 మొదలైన బేసి సంఖ్యలు శుభప్రదంగా పరిగణిస్తారు. అయితే 3 సంఖ్యను మాత్రం అశుభంగా భావిస్తుంటారు. 

ఏదైనా పని విషయంలో బయటకు వెళ్లే సమయంలో ముగ్గురు కలిసి వెళ్లకూడదని పెద్దలు చెబుతుంటారు. హిందూ మతంలో ఈ సంఖ్యను అశుభమైందిగా పరిగణిస్తారు. వ్యక్తుల విషయంలోనే కాదు. ప్లేట్‌లో మూడు చపాతీలు వేసుకోవడం, పూజ సమయంలో ముగ్గురు వ్యక్తులు కలిసి ఒకే చోట కూర్చోవడం వంటివన్నీ అశుభంగా పరిగణిస్తారు. ఇంతకీ పెద్దలు 3 సంఖ్యను అశుభంగా భావించడంలో నిజంగానే నిజం ఉందా? ఇప్పుడు తెలుసుకుందాం. 

అయితే జ్యోతిష్య నిపుణుల అభిప్రాయం ప్రకారం 3 సంఖ్య అశుభం కాదని చెబుతున్నారు. నిజానికి సృష్టి అనేది మూడు ప్రాథమిక స్తంభాలపై ఆధారపడి ఉంటుందని అంటారు. త్రిమూర్తులకు 3 సింబాలిక్‌గా చెబుతుంటారు. పరిక్రమ ప్రధాన సంఖ్య కూడా 3. ముల్లోకాలను ఏలే శివుడి త్రిశూలం కూడా 3 భాగాలుగా విభజించి ఉంటుంది. 3 గ్రహాలు ముఖ్యమైనవిగా పరిగణిస్తారు. అంతెందుకు వివాహంలో మూడు మూళ్ల బంధంతోనే జంటలు ఒక్కటవుతారు. 

గంగా, యమున, సరస్వతి నదులు మూడు కలిసే చోటును కూడా కోట్లాది మంది శుభంగా పరిగణిస్తారు. అందుకే మూడు నెంబర్‌ను నెగిటివ్‌గా భావించకూడదని నిపుణులు చెబుతున్నారు. అందుకే 3 నెగిటివిటికీ సంబంధించి ఎలాంటి శాస్త్రీయ ఆధారాలు లేవని ఈ విషయం గురించి పెద్దగా ఆలోచించకపోవడమే ఉత్తమం.