పదేళ్లలో ఎంత మార్పు..! భారతీయులు వాడే ప్రతి మొబైల్ తయారయ్యేది ఇక్కడే
ప్రస్తుతం సెల్ ఫోన్ అనేది నిత్యావసర వస్తువుగా మారిపోయింది... కూడు,గూడు, గుడ్డ జాబితాలో మొబైల్ చేరింది. ఇలా భారతీయులు ఉపయోగించే కోట్లాది మొబైల్స్ ఇప్పుడు ఎక్కడ తయారవుతున్నాయో తెలుసా?
భారతదేశం శాస్త్ర సాంకేతిక రంగాల్లో అద్భుతమైన ప్రగతిని సాధించింది. మరీముఖ్యంగా స్మార్ట్ ఫోన్లు అందుబాటులోకి వచ్చాక సాంకేతికత, టెక్నాలజీ వినియోగం మరింత పెరిగింది. అయితే గతంలో భారత్ లోని మార్కెట్ ను దృష్టిలో వుంచుకుని విదేశీ కంపనీలు ఎక్కడో తయారుచేసి మొబైల్స్ ను ఇక్కడికి సరఫరా చేసేవారు. కానీ ప్రస్తుతం ఈ పరిస్థితి పూర్తిగా మారిపోయిందని స్వయంగా కేంద్ర ఎలక్ట్రానిక్స్ ఆండ్ ఇన్ఫర్మేషన్ టెక్నాలజీ మంత్రి జితిన్ ప్రసాద్ తెలిపారు.
భారతదేశం ప్రస్తుతం మొబైల్స్ తయారీ విషయంలో రికార్డులు సృష్టిస్తోంది... దేశప్రజలు ఉపయోగించే ఫోన్లలో 99 శాతం దేశీయంగా తయారైనవేనని మంత్రి వెల్లడించారు. దేశీయ ఎలక్ట్రానిక్స్ రంగం గత కొన్నేళ్లలో ఊహించని స్థాయిలో అభివృద్ది చెందిందని... దీని ఫలితంగానే ప్రస్తుతం మొబైల్ తయారీలో ముందున్నామని అన్నారు. దేశంలో మొబైల్స్ వినియోగం చాలా ఎక్కువ... అయినా అందుకు తగ్గట్లుగా అన్ని రకాల ఫోన్లు అందుబాటులో వుంటున్నాయి. ఇలా ఎలక్ట్రానిక్స్ రంగంలో దేశం సాధించిన అభివృద్ది గురించి కేంద్ర మంత్రి జితిన్ ప్రసాద్ పార్లమెంట్ వేదికన వివరించారు.