Trisha and Vijay: తమిళగ వెట్రి కళగం (టీవీకే) అధ్యక్షుడు విజయ్ విజయానికి చేరువలో ఉన్నారు. అతని నివాసానికి నటి త్రిష అకస్మాత్తుగా రావడంతో అందరూ ఆశ్చర్యపడుతున్నారు. ఎన్నికల ఫలితాల్లో టీవీకే దూసుకుపోతున్న వేళ త్రిష ఎందుకు విజయ్ కలిసేందుకు వెళ్లారు?
తమిళనాడు అసెంబ్లీ ఎన్నికల ఓట్ల లెక్కింపు సోమవారం సాగుతోంది. ఇప్పటివరకు వచ్చిన సమాచారం ప్రకారం, తమిళగ వెట్రి కళగం (టీవీకే) అతిపెద్ద పార్టీగా అవతరించే అవకాశాలు కనిపిస్తున్నాయి. దీంతో విజయ్ అభిమానులు ఆనందం పట్టలేకపోతున్నారు. చెన్నైలోని పార్టీ ప్రధాన కార్యాలయం ముందు టీవీకే కార్యకర్తలు భారీగా గుమిగూడి సంబరాలు చేసుకుంటున్నారు. పార్టీ జెండాలు ఊపుతూ, ప్రజలకు స్వీట్లు పంచుతూ తమ ఆనందాన్ని వ్యక్తం చేస్తున్నారు. విజయ్ పార్టీకి ఈ స్థాయిలో సీట్లు దక్కుతాయని ఎవరూ ఊహించలేదు. ఇదే సమయంలో నటి త్రిష విజయ్ ఇంటికి చేరుకున్నారు.
24
త్రిష ఎందుకు వెళ్లారు?
ఎన్నికల సంఘం ఇచ్చిన సమాచారం ప్రకారం మొత్తం 234 స్థానాల్లో టీవీకే ప్రస్తుతం 111 స్థానాల్లో ఆధిక్యంలో ఉంది. టీవీకే ప్రధాన కార్యాలయం ముందు కార్యకర్తలు తరలివచ్చి, నినాదాలు చేస్తూ, నృత్యాలు చేస్తూ సంబరాలు చేసుకుంటున్నారు. ఓట్ల లెక్కింపు ఒక వైపు సాగుతుండగా, టీవీకే అధ్యక్షుడు విజయ్ నీలాంగరై నివాసానికి నటి త్రిష వచ్చారు. విజయ్కు శుభాకాంక్షలు తెలిపేందుకే ఆమె అక్కడికి వెళ్లినట్లు తెలుస్తోంది. ఈరోజు ఉదయం తిరుపతిలో వెంకటేశ్వర స్వామి దర్శనం చేసుకున్న త్రిష.. అక్కడ్నించి నేరుగా విజయ్ ఇంటికి వెళ్లారు. ఈరోజు ఆమె పుట్టినరోజు కావడం విశేషం.
34
ఏ పార్టీకి ఎన్ని సీట్లు?
తిరుచ్చి తూర్పు అసెంబ్లీ నియోజకవర్గంలో పోటీ చేస్తున్న టీవీకే అధ్యక్షుడు విజయ్, తొలి రౌండ్ ఓట్ల లెక్కింపు ముగిసేసరికి 6,499 ఓట్ల ఆధిక్యంలో ఉన్నారు. ఎన్నికల సంఘం ప్రస్తుత సరళి ప్రకారం, టీవీకే 111, అఖిల భారత అన్నా ద్రవిడ మున్నేట్ర కళగం (ఏఐఏడీఎంకే) 63, ద్రవిడ మున్నేట్ర కళగం (డీఎంకే) 60 స్థానాల్లో ఆధిక్యంలో ఉన్నాయి.
ఓట్ల లెక్కింపు ఇంకా కొనసాగుతున్నందున, తుది ఫలితాలను ఎన్నికల సంఘం అధికారికంగా ప్రకటించడానికి కొన్ని గంటల సమయం పడుతుంది. ఈ ఎన్నికల్లో టీవీకే ఒంటరిగా పోటీ చేస్తోంది. ఏఐఏడీఎంకే నేతృత్వంలోని జాతీయ ప్రజాస్వామ్య కూటమిలో బీజేపీ, డీఎంకే నేతృత్వంలోని కూటమిలో కాంగ్రెస్ ఉన్నాయి. ఈ నేపథ్యంలో, టీవీకే అధ్యక్షుడు విజయ్ తమిళనాడు రాజకీయాల్లో ఒక ముఖ్యమైన శక్తిగా అవతరించారు. రాష్ట్రవ్యాప్తంగా ఉన్న టీవీకే కార్యకర్తలు, విజయ్ 'విజిల్ పోడు' పాటను ప్లే చేస్తూ సంబరాల్లో మునిగిపోయారు. ఆయనపై పోటీ చేసిన డీఎంకే అభ్యర్థి ఇనిగో ఇరుదయరాజ్, ప్రాథమిక ఓట్ల లెక్కింపులో వెనుకంజలో ఉన్నారు.
