TVK Vijay : విజయ్ ను గెలిపించింది వీళ్లే..!

ఎన్నికల్లో పోటీ తమకూ, డీఎంకేకు మధ్యేనని నటుడు విజయ్ మొదటి నుంచి చెబుతూ వస్తున్నాడు. ఇప్పుడు దాన్ని నిజం చేసి చూపించాడు. డీఎంకే ఓటు బ్యాంకును పూర్తిగా కొల్లగొట్టాడు. డిఎంకే నుండి టివికేకు షిప్ట్ అయ్యిందెవరో తెలుసా..?

టివికె ఓటుబ్యాంక్ ఇదే..

తమిళనాడు అసెంబ్లీ ఎన్నికల ఓట్ల లెక్కింపు కొనసాగుతోంది. నటుడు విజయ్ 'తమిళగ వెట్రి కళగం' (టీవీకే) పార్టీ భారీ విజయం దిశగా దూసుకెళ్తోంది. 234 స్థానాల్లో ఒంటరిగా పోటీ చేసిన టీవీకే ఇప్పటికే సెంచరీ సీట్లలో ఆధిక్యంలో ఉంది… మ్యాజిక్ ఫిగర్ కు చేరువలో ఉంది. ఇక రెండో స్థానంలో అన్నా డీఎంకే ఉండగా అధికార డీఎంకే మూడో స్థానంలో కొనసాగుతోంది. 

ఎన్నికల ప్రచార సమయంలో టివికే అధినేత విజయ్ డిఎంకే ను, సీఎం స్టాలిన్ నే టార్గెట్ చేశాడు… టివికే పోటీ అధికార పార్టీతోనే అనేలా గట్టిగా ప్రచారం చేశాడు. డిఎంకే కు ప్రత్యామ్నాాయం తామే అని ప్రజల్లోకి గట్టిగా తీసుకోళ్లాడు. ఇలా ప్రచారంలో విజయ్ చెప్పిన మాటలే ఇప్పుడు నిజమయ్యాయి. డీఎంకే ఓటు బ్యాంకుకు టీవీకే భారీగా గండి కొట్టింది... యూత్, ఇస్లామిక్, క్రిస్టియన్ మైనారిటీ ఓట్లు ఈసారి టీవీకే వైపు మళ్లాయి.

దళిత మైనారిటీ ఓటుబ్యాంకు టివికే వైపే..

ఈసారి మైనారిటీలు ఎక్కువగా నివసించే నియోజకవర్గాల్లో టీవీకే ఆధిక్యం కనబరుస్తోంది. క్రిస్టియన్లు అధికంగా ఉండే నాగర్‌కోయిల్, విళవంకోడ్, కుళచల్ వంటి నియోజకవర్గాల్లో టీవీకే ముందంజలో ఉంది. చెన్నైలోని మైలాపూర్, పెరంబూర్, ఆలందూర్, తాంబరం వంటి క్రిస్టియన్లు నివసించే ప్రాంతాల్లోనూ టీవీకే ఆధిక్యంలో కొనసాగుతోంది. అంతేకాదు తిరునల్వేలి, పాళయంకోట్టై, రాధాపురంలలో కూడా టీవీకే గెలుపు ఖాయంగా కనిపిస్తోంది. త్రిచీ తూర్పు నియోజకవర్గంలో విజయ్ స్వయంగా భారీ మెజార్టీతో గెలవబోతున్నారు.

ఇక ఇస్లామిక్‌ ఓటర్లు ఎక్కువగా ఉండే వేలూరు జిల్లాలోని వాణియంబాడి, ఆంబూర్, వేలూరు, గుడియాత్తంలలో కూడా టీవీకే హవా నడుస్తోంది. చెన్నైలోని చేపాక్-తిరువల్లిక్కేని, హార్బర్, విల్లివాక్కంలలో డీఎంకే ఓటు బ్యాంకును టీవీకే చీల్చేసింది. ఇలా డిఎంకే దళితులు, ముస్లిం మైనారిటీ ఓట్లను తమవైపు తిప్పుకోవడంతో విజయ్ టివికే విజయం సాధించింది.

ముస్లింలు టివికే వైపే...

ముస్లిం ఓటుబ్యాంకు ఎక్కువగా గల రామనాథపురం, కీళకరై, కడయనల్లూరు నియోజకవర్గాల్లోనూ టీవీకే గెలుపు దిశగా సాగుతోంది. దశాబ్దాలుగా మైనారిటీ ఓట్లతో గెలుస్తూ వస్తున్న డీఎంకేకు ఈసారి గట్టి దెబ్బ తగిలింది. ఈ ఓట్లన్నింటినీ టీవీకే తన ఖాతాలో వేసుకోవడమే డీఎంకే ఘోర పరాజయానికి ప్రధాన కారణంగా రాజకీయ విశ్లేషకులు భావిస్తున్నారు.

టివికే విజయంలో యువత పాత్ర

ఇక తమిళనాడు యువతీయువకులు కూడా విజయ్ కే సపోర్ట్ చేసినట్లు ఈ ఎన్నికల పలితాలు స్పష్టం చేస్తున్నాయి. విద్యారంగంలో మార్పులు తీసుకువస్తానని... యువతకు ఉద్యోగాలు, ఉపాధి అవకాశాలు కల్పిస్తానని విజయ్ హామీ ఇచ్చారు. ఇలా యువతను టార్గెట్ గా చేసుకుని టివికే ముందుకువెళ్ళడం కలిసివచ్చింది.

ఇక సినిమాల ద్వారా విజయ్ కు యువతలో మంచి క్రేజ్ ఉంది... దీన్ని కూడా టివికే పార్టీ  అనుకూలంగా మార్చుకుంది. విజయ్ పాపులారిటీని మరింత పెంచేలా సోషల్ మీడియా ద్వారా ప్రచారం చేసింది టివికె. ఇలా పొలిటికల్ గానే కాదు సినిమాల పరంగా విజయ్ యువతకు దగ్గరయ్యాడు... ఓట్లన్ని గంపగుత్తగా ఆయన పార్టీకే పడ్డాయి.

అధికారం విజయ్ దే..

తమిళనాడులో మొత్తం 234 అసెంబ్లీ స్థానాలుండగా మ్యాజిక్ ఫిగర్ 118. అంటే ఏ పార్టీ ఈ మెజారిటీ సాధిస్తే వారిదే అధికారం. ఈ దిశగా విజయ్ పార్టీ టివికె దూసుకుపోతోంది.. ఇప్పటివరకు వెలువడిన పలితాల ప్రకారం టివికే కు 110 స్థానాలు, అన్నా డిఎంకే 70 స్థానాల్లో, డిఎంకే 54 స్థానాల్లో ఆధిక్యంలో ఉంది. తుది ఫలితం కాస్త అటుఇటుగా ఉన్నా విజయ్ విజయం ఖాయంగా కనిపిస్తోంది... టివికే అతిపెద్ద పార్టీగా అవతరించనుంది. పార్టీ స్థాపించిన రెండేళ్లలోనే అధికారంలోకి వచ్చిన పార్టీగా టివికే చరిత్రలో నిలిచిపోనుంది..