Yellow Sweat Stains: తెల్ల చొక్కాలు ధరించడం చాలామందికి ఇష్టం. కానీ కొంతకాలం వాడిన తర్వాత చంకల దగ్గర పసుపు మచ్చలు కనిపించడం సాధారణ సమస్య. సాధారణంగా ఉతికినా ఈ మరకలు పూర్తిగా పోవు. దీంతో చొక్కా పాతదిలా కనిపిస్తుంది. అయితే ఈ మరకలు ఎందుకు వస్తాయంటే..
చాలామంది చెమట వల్లే ఈ మరకలు వస్తాయని అనుకుంటారు. కానీ అది పూర్తిగా నిజం కాదు. చెమటలో ఉండే ఉప్పు, ఖనిజాలు (మినరల్స్) డియోడరెంట్ లేదా యాంటీ-పర్స్పిరెంట్లో ఉండే అల్యూమినియం పదార్థాలతో కలిసినప్పుడు రసాయన చర్య జరుగుతుంది. ఈ కారణంగా చంకల దగ్గర పసుపు రంగు మరకలు ఏర్పడతాయి. కాలక్రమేణా అవి మరింత గట్టిపడి సాధారణ ఉతుకుతో పోకుండా ఉంటాయి.
తెల్ల బట్టలపై ఉన్న పసుపు మరకలను తొలగించడంలో బేకింగ్ సోడా, హైడ్రోజన్ పెరాక్సైడ్ మంచి ఫలితాన్ని ఇస్తాయి. దీనికోసం ఒక చిన్న గిన్నెలో పావు కప్పు హైడ్రోజన్ పెరాక్సైడ్, పావు కప్పు బేకింగ్ సోడా, కొద్దిగా నీరు వేసి చిక్కటి మిశ్రమాన్ని తయారు చేయాలి. ఆ మిశ్రమాన్ని మరక ఉన్న ప్రాంతంలో రాసి, పాత టూత్ బ్రష్ లేదా స్పాంజ్తో మెల్లగా రుద్దాలి. సుమారు 30 నిమిషాలు అలాగే ఉంచి తర్వాత చల్లటి లేదా గోరువెచ్చని నీటితో శుభ్రంగా కడగాలి. దీంతో మరకలు క్రమంగా తగ్గిపోతాయి.
35
వెనిగర్, నిమ్మరసం కూడా మంచి పరిష్కారమే
హైడ్రోజన్ పెరాక్సైడ్ అందుబాటులో లేకపోతే తెల్ల వెనిగర్ను కూడా ఉపయోగించవచ్చు. మరక ఉన్న చోట వెనిగర్ రాసి అరగంట తర్వాత సాధారణంగా ఉతికితే మంచి ఫలితం కనిపిస్తుంది. అలాగే నిమ్మరసంలో కొద్దిగా బేకింగ్ సోడా కలిపి పేస్ట్ తయారు చేసి మరకపై రాయాలి. 30 నిమిషాల తర్వాత కడిగితే పసుపు మరకలు తగ్గే అవకాశం ఉంటుంది. ఇవి సహజమైన పద్ధతులు కావడంతో బట్టలకు కూడా పెద్దగా హాని ఉండదు.
మరకలు తొలగించిన తర్వాత సాధారణ డిటర్జెంట్తో బట్టను శుభ్రంగా ఉతకాలి. మరక పూర్తిగా పోకముందే డ్రైయర్లో వేయకూడదు. అధిక వేడి వల్ల మరక మరింత గట్టిపడే అవకాశం ఉంటుంది. కాబట్టి సహజ గాలిలోనే ఆరబెట్టడం మంచిది. ఒకవేళ మరక పూర్తిగా తొలగకపోతే అదే విధానాన్ని మరోసారి చేయవచ్చు. మరకలు కొత్తగా ఉన్నప్పుడే శుభ్రం చేస్తే త్వరగా పోతాయి. ఎక్కువ రోజులు వదిలేస్తే వాటిని తొలగించడం కష్టమవుతుంది.
55
ఈ చిన్న అలవాట్లు పాటిస్తే తెల్ల చొక్కాలు ఎక్కువకాలం కొత్తలా ఉంటాయి
తెల్ల చొక్కాలు ధరించిన తర్వాత ఎక్కువ రోజులు ఉతకకుండా ఉంచకండి. చెమట పట్టిన వెంటనే ఉతికితే మరకలు ఏర్పడే అవకాశం తగ్గుతుంది. డియోడరెంట్ రాసిన వెంటనే చొక్కా ధరించకుండా, అది పూర్తిగా ఆరిన తర్వాత వేసుకోవడం మంచిది. అలాగే అధిక నాణ్యత కలిగిన డియోడరెంట్లను ఉపయోగించడం, బట్టలను ఎప్పటికప్పుడు శుభ్రంగా ఉతకడం వల్ల చంకల దగ్గర పసుపు మరకలు పడకుండా నివారించవచ్చు. ఇలా చిన్నచిన్న జాగ్రత్తలు తీసుకుంటే మీ తెల్ల చొక్కాలు ఎక్కువకాలం కొత్తవాటిలా మెరిసిపోతాయి.
