Spicy Boti Curry: తెలంగాణ స్టైల్లో స్పైసీగా బోటీ కర్రీ ఇలా వండితే రుచి అదిరిపోతుంది, రెసిపీ ఇదిగో

Spicy Boti Curry: నాన్ వెజ్ ను ఇష్టపడేవారికి బోటీ కూర, ఇగురు, వేపుడు కూడా నచ్చుతాయి. బోటి కూడా కాస్త కారంగా చేసుకుంటేనే రుచిగా ఉంటుంది. తెలంగాణ స్టైల్లో బోటీ కూర ఎలా వండాలో రెసిపీ ఇక్కడ ఇచ్చాము. 

తెలంగాణా స్టైల్లో బోటీ కర్రీ

తెలంగాణలో అధికంగా తినే వంటకాల్లో బోటీ కర్రీ ఒకటి. దీన్ని స్పైసీగా వండుకుని తింటే ఆ రుచే వారు. మసాలాలు దట్టించి, కారం వేసి చేసే ఈ కూర బగారా రైస్ తో తింటే అద్భుతంగా ఉంటుంది. బోటీని సరైన విధంగా శుభ్రం చేసివండితే కూర చాలా టేస్టీగా ఉంటుంది. రెసిపీ ఎలాగో తెలుసుకోండి.

బోటీ కర్రీ రెసిపీకి కావాల్సిన పదార్థాలు

మటన్ బోటి – అరకిలో

ఉల్లిపాయలు – రెండు

టమాటాలు – రెండు

అల్లం-వెల్లుల్లి పేస్ట్ – ఒక స్పూన్

పసుపు – అర టీస్పూన్

కారం – ఒకటిన్నర టీస్పూన్లు

ధనియాల పొడి – ఒక స్పూను

జీలకర్ర పొడి – అర స్పూన్

గరం మసాలా – అర స్పూన్

దాల్చిన చెక్క, లవంగాలు, మరాఠీ మొగ్గ – గుప్పెడు

ఉప్పు – రుచికి సరిపడా

నూనె – మూడు స్పూన్లు

కొత్తిమీర తరుగు - గుప్పెడు

బోటీ కర్రీ ఇలా వండండి

1. ముందుగా బోటిని చాలా శుభ్రంగా కడగాలి. ఇదే చాలా ముఖ్యమైన పని.

2. బోటీని ఒక గిన్నెలో వేయాలి. అందులో కొద్దిగా ఉప్పు, పసుపు వేసి బాగా రుద్దాలి. అప్పుడు వాసన పోతుంది.

3. ప్రెషర్ కుక్కర్‌లో బోటిని కొద్దిగా నీరు వేసి 3–4 విజిల్స్ వచ్చే వరకు ఉడికించాలి. ఉడికిన తర్వాత చిన్న ముక్కలుగా కట్ చేసుకోవాలి.

4. ఇప్పుడు స్టవ్ మీద కళాయి పెట్టి నూనె వేసి వేడి చేయాలి. అందులో దాల్చిన చెక్క, లవంగాలు, మరాఠీ మొగ్గ వేసి వేయించాలి.

5. అందులో తరిగిన ఉల్లిపాయలు వేసి బంగారు రంగు వచ్చే వరకు వేయించాలి.

6. ఆ తరువాత అల్లం వెల్లుల్లి పేస్ట్ వేసి వేయించాలి. ఇప్పుడు ఉడికించిన బోటి ముక్కలు వేసి వేయించాలి.

7. దీని వల్ల మసాలా బాగా ముక్కలకు పట్టి కర్రీ రుచిగా వస్తుంది.

8. తరువాత పసుపు, కారం, ధనియాల పొడి, జీలకర్ర పొడి వేసి బాగా కలపాలి.

9. తరువాత టమాటా ముక్కలు వేసి అవి మెత్తబడే వరకు ఉడికించాలి.

10. గ్రేవీ కోసం అవసరమైతే కొద్దిగా నీరు వేసి కుక్కర్‌లో మళ్లీ 4–5 విజిల్స్ వచ్చే వరకు ఉడికించాలి.

11. చివరగా గరం మసాలా వేసి కలిపి పైన కొత్తిమీరను చల్లాలి. అంతే టేస్టీ బోటీ మసాల కూర సిద్ధమైనట్టే.

ఇలా తింటే అదిరిపోతుంది

తెలంగాణ బోటి కూర ఎంతో ప్రత్యేకమైనది. దాన్నీ స్పైసీగా చేసుకుని తింటేనే ఆ రుచి తెలుస్తుంది. వేడి అన్నం, జొన్న రొట్టి లేదా బగారా రైస్‌తో ఈ కూర చాలా బాగా సరిపోతుంది.