ఉదయం, సాయంత్రం వర్కౌట్లు చేయడం వల్ల వేర్వేరు ప్రయోజనాలు ఉంటాయి. బరువు తగ్గడం, కండరాల బలం, పనితీరు, మీ రోజూవారి అలవాట్లను బట్టి సరైన సమయాన్ని ఎంచుకోవాలి.
చాలామందికి వర్కౌట్ టైమ్పై కన్ఫ్యూజన్ ఉంటుంది. పొద్దున్నే చేస్తే బరువు తగ్గుతారని కొందరు, సాయంత్రం చేస్తే కండరాల బలం పెరుగుతుందని మరికొందరు అంటారు. నిజానికి, అందరికీ ఒకే టైమ్ సెట్ అవ్వదు. మీ లక్ష్యం, రోజూవారీ పనులు, శరీర తత్వాన్ని బట్టి సమయాన్ని ఎంచుకోవాలి.
26
ఉదయం పూట వర్కౌట్ చేస్తే కలిగే లాభాలు
పొద్దున్నే వర్కౌట్ చేస్తే రోజంతా యాక్టివ్గా ఉంటారు. ఉదయాన్నే వ్యాయామం చేయడం వల్ల దాన్ని ఒక అలవాటుగా మార్చుకోవడం చాలామందికి సులభం. ఇది రోజంతా మీ జీవక్రియను కూడా పెంచుతుంది. బరువు తగ్గాలనుకునే వారు డైట్తో పాటు మార్నింగ్ వర్కౌట్ను జతచేయొచ్చు.
36
సాయంత్రం పూట వర్కౌట్ చేస్తే కలిగే లాభాలు
సాయంత్రం పూట మన శరీర ఉష్ణోగ్రత ఉదయం కంటే ఎక్కువగా ఉంటుంది. దీనివల్ల కండరాలు ఫ్లెక్సిబుల్గా, కదలికలకు సిద్ధంగా ఉంటాయి. అందుకే కొందరికి సాయంత్రం పూట ఎక్కువ తీవ్రతతో వర్కౌట్లు చేయడం సులభంగా ఉంటుంది. రోజంతా పడిన ఒత్తిడిని తగ్గించుకోవడానికి కూడా ఇది హెల్ప్ అవుతుంది.
బరువు తగ్గడానికి వర్కౌట్ టైమ్ ఒక్కటే ముఖ్యం కాదు. రోజూ మీరు తీసుకునే కేలరీలు, శారీరక శ్రమ, క్రమం తప్పకుండా వ్యాయామం చేయడం వంటివి చాలా ముఖ్యం. అయితే ఉదయాన్నే ఖాళీ కడుపుతో వర్కౌట్ చేస్తే, శరీరం కొవ్వును శక్తిగా వాడుకుంటుందని కొన్ని అధ్యయనాలు చెబుతున్నాయి. కానీ దీర్ఘకాలంలో డైట్, కన్సిస్టెన్సీనే కీలకం.
56
కండరాల బలం, పనితీరుకు సాయంత్రం మేలా?
ఉదయం నిద్రలేవగానే శరీర ఉష్ణోగ్రత తక్కువగా ఉండటంతో కండరాలు కాస్త బిగుతుగా ఉంటాయి. అందుకే మార్నింగ్ వర్కౌట్ చేసేవాళ్లు సరిగ్గా వార్మప్ చేయడం చాలా అవసరం. సాయంత్రం శరీర ఉష్ణోగ్రత పెరగడం వల్ల కండరాల కదలిక, పనితీరు మెరుగవుతుంది. వెయిట్ లిఫ్టింగ్, స్ట్రెంత్ ట్రైనింగ్కు ఈ టైమ్ బాగుంటుంది.
66
నిద్ర, మీ షెడ్యూల్ను కూడా గమనించండి
ఉదయం వర్కౌట్ చేయాలని నిద్రను తగ్గించుకోకూడదు. శరీరానికి సరైన విశ్రాంతి లేకుండా రోజూ పొద్దున్నే లేచి వ్యాయామం చేయడం దీర్ఘకాలంలో కష్టమవుతుంది. అలాగే రాత్రిపూట మరీ ఆలస్యంగా తీవ్రమైన వర్కౌట్లు చేస్తే కొందరిలో నిద్రకు ఆటంకం కలగవచ్చు. అందుకే మీ నిద్ర, పనులకు సరిపోయే టైమ్ను ఎంచుకోండి.
ఉదయం వర్కౌటా, సాయంత్రం వర్కౌటా అనే దానికంటే.. ఏ టైమ్లో మీరు క్రమం తప్పకుండా చేయగలరు అన్నదే ముఖ్యం. ఉదయం వీలైతే వాకింగ్, జాగింగ్, యోగా చేయండి. సాయంత్రం వీలైతే జిమ్, సైక్లింగ్, స్ట్రెంత్ ట్రైనింగ్ చేయండి. మీ లైఫ్స్టైల్కు సరిపోయే టైమ్ను ఎంచుకుని, దాన్ని అలవాటుగా మార్చుకుంటేనే మంచి ఫలితాలు వస్తాయి.
