Parenting Tips: నేటి బిజీ జీవితంలో చాలామంది తండ్రులు కుటుంబం కోసం రోజంతా ఉద్యోగం లేదా వ్యాపారంలో గడిపేస్తున్నారు. అయితే పిల్లలకు తండ్రి సంపాదన ఎంత అవసరమో, ఆయనతో గడిపే సమయం కూడా అంతే ముఖ్యం. మరి తండ్రి, పిల్లలకి ఎంత టైం కేటాయించాలో ఇక్కడ చూద్దాం.
నిపుణుల ప్రకారం పిల్లల పెంపకంలో తల్లి పాత్ర ఎంత ముఖ్యమో, తండ్రి పాత్ర కూడా అంతే ముఖ్యం. ప్రస్తుత కాలంలో చాలామంది తండ్రులు ఉద్యోగం, వ్యాపారం లేదా ఇతర బాధ్యతలతో బిజీగా ఉండటం వల్ల పిల్లలతో గడిపే సమయం తగ్గిపోతోంది. అయితే పిల్లల మానసిక, భావోద్వేగ, సామాజిక ఎదుగుదలలో తండ్రితో గడిపే సమయం కీలక పాత్ర పోషిస్తుంది. పిల్లల వయసును బట్టి వారికి అవసరమైన శ్రద్ధ, ప్రేమ, మార్గదర్శకత్వం మారుతూ ఉంటుంది. అందుకే ప్రతి వయసులో తండ్రి పిల్లలతో ఎంత సమయం గడపాలి? ఆ సమయంలో ఏం చేయాలి వంటి విషయాలు ఇక్కడ తెలుసుకుందాం.
25
3 సంవత్సరాలలోపు పిల్లలు
3 సంవత్సరాలలోపు వయసున్న పిల్లలు తమ తల్లిదండ్రులతో ఎక్కువ సమయం గడపాలని కోరుకుంటారు. ఇది పిల్లలలో భద్రతా భావం, ఆత్మవిశ్వాసం, భావోద్వేగ అనుబంధం ఏర్పడే దశ. అందువల్ల తండ్రులు రోజుకు సుమారు 3 నుంచి 5 గంటల వరకు పిల్లలతో గడపడానికి ప్రయత్నించాలి. వారిని ఎత్తుకోవడం, ఆటలు ఆడించడం, బయటకు తీసుకెళ్లడం లేదా కాసేపు వారితో మాట్లాడటం వంటివి చేయాలి. ఇవి పిల్లల అభివృద్ధికి ఎంతో ఉపయోగపడతాయి. ఈ సమయంలో పిల్లలు తండ్రి ప్రేమను ఎక్కువగా అనుభవిస్తారు.
35
4-7 సంవత్సరాల పిల్లలు
4 నుంచి 7 సంవత్సరాల వయసు వచ్చే సరికి పిల్లల్లో ఊహాశక్తి, నేర్చుకునే ఆసక్తి మరింత పెరుగుతుంది. ఈ వయసులో తండ్రి, పిల్లల కోసం రోజుకు 2 నుంచి 3 గంటల సమయం కేటాయించడం మంచిది. కథలు చెప్పడం, కలిసి ఆటలు ఆడటం, కొత్త విషయాలు నేర్పించడం వంటివి పిల్లల ఆలోచనా శక్తిని పెంచుతాయి. తండ్రి పిల్లలతో కలిసి సమయం గడపడం వల్ల పిల్లల్లో కమ్యూనికేషన్ నైపుణ్యాలు కూడా మెరుగుపడతాయి.
8 నుంచి 12 సంవత్సరాల వయసులో పిల్లలు చదువుపై ఎక్కువ దృష్టి పెట్టడం ప్రారంభిస్తారు. ఈ దశలో తండ్రి పాత్ర మార్గదర్శకుడిగా మారుతుంది. కాబట్టి తండ్రి రోజుకు కనీసం 2 గంటల పాటు పిల్లలతో గడపడం మంచిది. హోంవర్క్ చేయడంలో సహాయం చేయడం, స్కూల్లో జరిగిన విషయాలు అడిగి తెలుసుకోవడం, వారి స్నేహితులు, ఆసక్తుల గురించి మాట్లాడటం వంటివి చేయాలి. ఇలా చేయడం వల్ల పిల్లలు తమ సమస్యలను తండ్రితో పంచుకునే అలవాటు పెంచుకుంటారు.
55
13 సంవత్సరాలు దాటిన పిల్లలు
13 సంవత్సరాల కంటే ఎక్కువ వయసు ఉన్న పిల్లలు యుక్త వయస్సులోకి అడుగుపెడతారు. ఈ సమయంలో వారికి స్వేచ్ఛ కావాలనిపించినా, తల్లిదండ్రుల మార్గదర్శకత్వం అవసరమే. కాబట్టి తండ్రి రోజుకు కనీసం ఒక గంట సమయాన్ని పిల్లల కోసం కేటాయించడం మంచిది. స్నేహితుడిలా మాట్లాడటం, వారి అభిప్రాయాలను వినడం, చదువులు, కెరీర్, జీవిత లక్ష్యాల గురించి చర్చించడం ద్వారా తండ్రి, పిల్లల మధ్య బంధం మరింత బలపడుతుంది.
