Face Serum: ముఖం మీద ముడతలు, గీతలు తగ్గించే ఫేస్ సీరమ్.. ఇంట్లోనే ఇలా తయారు చేసుకోండి

Face Serum: ముఖంపై ముడతలు, గీతలు కనిపిస్తే అందంగా కనిపించరు. వాటిని తగ్గించుకునేందుకు ఖరీదైన సౌందర్య ఉత్పత్తులను వాడాల్సిన అవసరం లేదు. ఇంట్లోనే ఫేస్ సీరమ్ తయారు చేసుకుంటే ఆ ముడతలు, గీతలు పోతాయి.

ఇంట్లోనే ఫేస్ సీరమ్ తయారీ

ముఖంపై కనిపించే వృద్ధాప్య లక్షణాలను తగ్గించుకోవడానికి చాలా మంది ముఖానికి ఫేస్ సీరమ్ వాడుతూ ఉంటారు. అయితే వీటి ఖరీదు ఎక్కువగా ఉంటుంది. అలాంటి ఖరీదైన సీరమ్‌లను వాడే కన్నా ఇంట్లోనే దాన్ని తయారు చేసుకోవచ్చు. ఇది ముఖంపై ఉన్న సన్నని గీతలు, ముడతలు వంటివి పోయేలా చేస్తుంది. నిద్రలేమి, ఎండలో ఎక్కువగా తిరగడం, తీవ్రమైన ఒత్తిడి, చర్మాన్ని సంరక్షించుకో పోవడం వల్ల చర్మం కాంతిహీనం గా మారుతుంది. దీనివల్లే ముడతలు ముఖంపై ఎక్కువ అవుతాయి. ఫేస్ సీరమ్ తయారుచేసి ప్రతిరోజు ముఖానికి రాసుకుంటే కొన్ని రోజుల్లోనే మీ చర్మం కొత్త మెరుపుతో అందంగా కనిపిస్తుంది.

ఫేస్ సీరమ్ తయారీకి ఏం కావాలి?

ఇంట్లోనే ఫేస్ సీరమ్ తయారు చేయడానికి బియ్యం నీరు, కలబంద, విటమిన్ ఈ క్యాప్సూల్స్ కావాలి. ఈ మూడు కూడా చర్మాన్ని కాంతివంతంగా మారుస్తాయి. అందుకోసం రెండు టీ స్పూన్ల బియ్యం నీరు, రెండు టీ స్పూన్ల కలబంద జెల్, రెండు విటమిన్ ఈ క్యాప్సూల్స్ తీసుకోండి. బియ్యం నీటి కోసం ముందుగా రెండు టేబుల్ స్పూన్ల బియ్యాన్ని అరకప్పు నీటిలో అరగంట పాటు నానబెట్టండి. తర్వాత బియ్యాన్ని చేతులతో నొక్కుతూ కడగండి. దాన్ని వడకట్టి ఆ నీటిని తీసుకోండి.

ఇలా నిల్వచేసుకోండి

ఇప్పుడు శుభ్రమైన గిన్నెను తీసుకుని అందులో రెండు టీ స్పూన్ల బియ్యం నీళ్లు, రెండు టీ స్పూన్ల కలబంద జెల్ వేసి బాగా గిలక్కొట్టాలి. ఇప్పుడు విటమిన్ ఇ క్యాప్సూల్ ను కత్తిరించి దానిలోని నూనె మిశ్రమాన్ని కూడా ఇందులో కలపాలి. బాగా కలిపిన తర్వాత సీరమ్ సిద్ధమైనట్టే. ఎక్కువ మొత్తంలో కావాలంటే ఎక్కువ పదార్థాలను వేసి తయారు చేసుకోవచ్చు. దీన్ని ఒక గాజు సీసాలో నిల్వ చేసుకోవాలి.

సీరమ్ ఎలా వాడాలి?

ఇంట్లో తయారు చేసిన ఈ సీరమ్ ముఖానికి రాసుకోవడం వల్ల మంచి అందాన్ని పొందవచ్చు. రాత్రి పడుకోబోయే ముందు ముఖం శుభ్రంగా కడగాలి. తర్వాత ఈ సీరం ముఖానికి పట్టించి రాత్రంతా అలా వదిలేయాలి. ఉదయం లేచాక శుభ్రమైన నీటితో కడుక్కుంటే సరిపోతుంది. ఇలా మీరు రెండు వారాలు చేసి చూడండి.. మీ చర్మం లో మార్పు స్పష్టంగా కనిపిస్తుంది.