కొందరికే కోపం ఎందుకు ఎక్కువ వస్తుంది.? ఇంత‌కీ ఆ స‌మ‌యంలో వారి శ‌రీరంలో ఏం జ‌రుగుతుంది

Anger: కొందరు ఎంతటి క్లిష్ట పరిస్థితుల్లోనైనా ప్రశాంతంగా ఉంటారు. మరికొందరికి మాత్రం చిన్న విషయానికే కోపం వచ్చేస్తుంది. నియంత్రణ కోల్పోతారు. అయితే కోపం వ‌చ్చిన స‌మ‌యంలో మన శరీరంలో పలు మార్పులు చోటుచేసుకుంటాయని మీకు తెలుసా.? 

కోపానికి కార‌ణం అదే

మన మెదడులో "అమిగ్డాలా" (Amygdala) అనే చిన్న భాగం ఉంటుంది. దీనిని శరీరంలోని ప్రమాద హెచ్చరిక వ్యవస్థగా చెప్పవచ్చు. మనకు ఏదైనా ఇబ్బంది కలిగించే పరిస్థితి ఎదురైనప్పుడు లేదా ఎవరైనా మనల్ని బాధించేలా మాట్లాడినప్పుడు ఈ భాగం వెంటనే స్పందిస్తుంది. అమిగ్డాలా అత్యంత చురుకుగా పనిచేసే వ్యక్తుల్లో కోపం ఎక్కువగా కనిపిస్తుంది. ఇది పనిచేయడం ప్రారంభించినప్పుడు మెదడులోని ఆలోచన, నిర్ణయాలు తీసుకునే భాగం తాత్కాలికంగా ప్రభావితమవుతుంది. దీంతో కొందరు ఆలోచించకుండా మాట్లాడటం లేదా హఠాత్తుగా స్పందిస్తారు.

కోపం వచ్చిన వెంటనే శరీరంలో జరిగే మార్పులు

అమిగ్డాలా స్పందించిన వెంటనే శరీరంలో ఒత్తిడికి సంబంధించిన హార్మోన్లు విడుదల అవుతాయి. ముఖ్యంగా అడ్రినలిన్ (Adrenaline), కార్టిసోల్ (Cortisol) అనే హార్మోన్లు వేగంగా పెరుగుతాయి. ఈ హార్మోన్ల ప్రభావంతో గుండె వేగంగా కొట్టుకోవడం ప్రారంభిస్తుంది. రక్తపోటు ఒక్కసారిగా పెరుగుతుంది. శరీర కండరాలు బిగుసుకుపోతాయి. శ్వాస వేగంగా మారుతుంది. చేతులు, ముఖం వైపు రక్తప్రసరణ పెరగడంతో ముఖం ఎర్రబడినట్లు కనిపిస్తుంది. అందుకే కోపంగా ఉన్న వ్యక్తి ముఖంలో, శరీర భాషలో స్పష్టమైన మార్పులు కనిపిస్తాయి.

తరచూ కోపం రావడం ఆరోగ్యానికి ప్రమాదమా?

తరచూ కోపపడటం శారీరక, మానసిక ఆరోగ్యంపై ప్రతికూల ప్రభావం చూపుతుంది. నిరంతరం ఒత్తిడిలో ఉండటం వల్ల గుండె సంబంధిత సమస్యలు వచ్చే ప్రమాదం పెరుగుతుంది. అలాగే అధిక రక్తపోటు, గుండెపోటు, స్ట్రోక్, నిద్రలేమి వంటి సమస్యలకు కూడా ఇది కారణమవుతుంది. కొందరిలో డిప్రెషన్, ఆందోళన, తీవ్రమైన మానసిక ఒత్తిడి, నిద్రలేమి వంటి పరిస్థితులు కూడా అధిక కోపానికి దారితీస్తాయి.

కోపం వెనుక దాగి ఉండే ఇతర కారణాలు

కోపం రావడానికి కేవలం వ్యక్తిత్వమే కారణం కాదు. జీవనశైలి, పని ఒత్తిడి, కుటుంబ సమస్యలు, ఆర్థిక ఇబ్బందులు, తగినంత నిద్ర లేకపోవడం వంటి అంశాలు కూడా ప్రభావం చూపుతాయి. కొన్ని సందర్భాల్లో మానసిక ఆరోగ్య సమస్యలు, హార్మోన్ల అసమతుల్యత, దీర్ఘకాలిక ఒత్తిడి కూడా కోపాన్ని పెంచుతాయి. అందుకే తరచూ అదుపు తప్పే స్థాయిలో కోపం వస్తుంటే వైద్య నిపుణులను సంప్రదించడం మంచిది.

కోపాన్ని ఎలా నియంత్రించుకోవాలి?

కోపాన్ని పూర్తిగా తొలగించడం సాధ్యం కాకపోయినా, దాన్ని నియంత్రించడం మాత్రం సాధ్యమే. కోపం వచ్చిన వెంటనే లోతుగా శ్వాస తీసుకోవడం, కొన్ని సెకన్లు నిశ్శబ్దంగా ఉండటం ఉపయోగపడుతుంది. 1 నుంచి 10 వరకు నెమ్మదిగా లెక్కపెట్టడం కూడా మనసును ప్రశాంతపరుస్తుంది. అదే విధంగా ఆ పరిస్థితి నుంచి కొద్దిసేపు దూరంగా వెళ్లడం, చల్లటి నీరు తాగడం, న‌డ‌వ‌డం వంటి పద్ధతులు కోపాన్ని తగ్గించడంలో సహాయపడతాయి. రోజూ యోగా, ధ్యానం, వ్యాయామం చేయడం వల్ల ఒత్తిడి తగ్గి భావోద్వేగాలపై నియంత్రణ పెరుగుతుంది.