ఇళ్లలోకి పాములు రావడం సర్వసాధారణమైన విషయం. మరీ ముఖ్యంగా వర్షాకాలం, వేసవిలో పాములు పెద్ద ఎత్తున ఇళ్లలోకి దూరుతుంటాయి. పాము కనిపించగానే గుండె ఆగిపోయినంత పని అవుతుంది. అయితే ఇంట్లోకి వచ్చిన పాములను క్షేమంగా బయటకు తీసుకువెళ్లేందుకు ఓ సంస్థ పనిచేస్తోందని మీకు తెలుసా.? జస్ట్ ఒక సింగిల్‌ కాల్‌తో మీ ఇంట్లోకి వచ్చిన పామును బయటకు తీసుకెళ్తారు. ఇంతకీ ఏంటా సంస్థ.? వారిని ఎలా సంప్రదించాలో ఇప్పుడు తెలుసుకుందాం..
పట్టణీకరణ పెరుగుతోంది. దీంతో ఒకప్పుడు అడవుల్లా ఉన్న ప్రాంతాలు కూడా ఇప్పుడు నగరంగా మారిపోతున్నాయి. దీంతో అప్పటి వరకు అక్కడ నివసించిన వన్యప్రాణుల మనుగడ ప్రశ్నార్థకంగా మారింది. ముఖ్యంగా హైదరాబాద్ శివారుల్లో ఈ సమస్య ఎక్కువవుతోంది.
ఈ కారణంగానే తరచూ పాములు ఇళ్లలోకి వస్తున్నాయి. దీంతో చాలా మంది భయపడడమో, లేదా పాములను చంపడమే చేస్తున్నారు. అయితే ఈ సమస్యకు పరిష్కారం చూపుతోంది ఫ్రెండ్స్ స్నేక్ సొసైటీ. వీరికి ఒక్క కాల్‌ చేస్తే చాలు పాములను ఇంటికి వచ్చి మరీ తీసుకెళ్తారు.
ఫ్రెండ్స్ స్నేక్ సొసైటీ పేరుతో ఏర్పాటు చేసిన ఈ సంస్థలో 120 మందికిపైగా వాలంటీర్లు ఉన్నారు. హైదరాబాద్ నగరంలో ఎక్కడ పాము వచ్చినట్లు కాల్‌ వచ్చినా వెంటనే సంఘటన స్థలానికి చేరుకుంటారు.
కేవలం 30 నిమిషాల్లోనే ఇంటికి చేరుకొని పామును క్షేమంగా బయటకు తీసుకెళ్లి, ప్రజలు లేని చోట దూరంగా వదిలిపెడుతున్నారు. ఈ సంస్థను 2015లో ప్రారంభించారు. నగరంలో ఎక్కడ ఎవరూ కాల్‌ చేసినా వెంటనే సంఘటనా స్థలానికి చేరుకొని పాములను తీసుకెళ్తున్నారు.
ఇందుకోసం వారు ఒక టోల్‌ ఫ్రీ నెంబర్‌ను ఏర్పాటు చేశారు. 8374933366 కాల్‌ చేసి మీ ఇంట్లోకి పామును వచ్చిన విషయాన్ని తెలపొచ్చు. తెలుగు, హిందీ, ఇంగ్లిష్‌లో కాల్స్ మాట్లాడే అవకాశం ఉంది. ఇంట్లోకి పాము వచ్చిన విషయాన్ని తెలియజేయడానికి మాత్రమే పరిమితం కాకుండా. పాములు కాటేస్తే ఏం చేయాలి.? లాంటి ఇతర విషయాలను సైతం వీరు అందిస్తున్నారు. వెబ్‌సైట్ ద్వారా ఈ సంస్థ సేవలు అందిస్తోంది. ఫ్రెండ్స్ ఆఫ్‌ స్నేక్స్‌.ఓఆర్‌జీ.ఇన్‌ వెబ్ సైట్‌ ద్వారా పాముల ఆవష్యకత, పాములకు సంబంధించిన వివరాలను అందిస్తున్నారు.
ఇదిలా ఉంటే ఫ్రెండ్స్ స్నేక్ సొసైటీ సంస్థ జనరల్‌ సెక్రెటరీ సంస్థ మాట్లాడుతూ.. పాముల అవసరాల గురించి వివరించారు. పాములు ఇంట్లోకి వస్తే అనవసరంగా చంపకూడదని సూచించారు. పాములు ఇంట్లోకి, ఆఫీసుల్లోకి రావడానికి పరిసరాలు అపరిశుభ్రంగా ఉండడమే కారణంగా చెబుతున్నారు. ముఖ్యంగా ఎలుకలు, కీటకాలు లేకుండా చూసుకోవాలని చెబుతున్నారు. వీటివల్లే పాములు వస్తాయని అంటున్నారు. ఈ సంస్థ ఒక్క 2024లోనే సుమారు 13,000 పాములను సంరక్షించింది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి