సాధారణంగా మనలో ప్రతి ఒక్కరూ ముందుకే నడుస్తారు. కానీ వెనక్కి నడవడం వల్ల మనం బోలెడు లాభాలను పొందుతాం తెలుసా? అవును వెనక్కి నడవడం వల్ల మోకాళ్ల నొప్పులు తగ్గడం నుంచి ఎన్నో లాభాలను పొందుతామంటున్నారు ఆరోగ్య నిపుణులు.
వాకింగ్ మన ఆరోగ్యానికి చేసే మేలు అంతా ఇంతా కాదు. ప్రతిరోజూ వాకింగ్ చేయడం వల్ల మనం బరువు తగ్గుతాం. శరీరం ఆరోగ్యంగా, ఫిట్ గా ఉంటుంది. ఇందుకోసం మనం ముందుకు నడుచుకుంటూ వెళ్లిపోతాం.
కానీ ముందుకి కాకుండా.. వెనక్కి నడిస్తే ఏమౌతుందని ఎప్పుడైనా ఆలోచించారా? ఆరోగ్య నిపుణుల ప్రకారం.. ముందుకి కాకుండా వెనక్కి నడవడం వల్ల ఎన్నో ఆరోగ్య ప్రయోజనాలు కలుగుతాయి.అవేంటో మనం ఇప్పుడు తెలుసుకుందాం పదండి.
పలు పరిశోధనల ప్రకారం.. ముందుకు నడవడం కంటే వెనక్కి నడవడం వల్లే ఎక్కువ ఆరోగ్య ప్రయోజనాలు కలుగుతాయి. వెనక్కి నడవడం వల్ల బరువు తగ్గడం నుంచి మోకాళ్ల నొప్పులు తగ్గడం వరకు ఎన్నో వ్యాధులు దూరమవుతాయని నిపుణులు అంటున్నారు. అసలు వెనక్కి నడవడం వల్ల ఎలాంటి జబ్బులు తగ్గిపోతాయంటే?
వెనక్కి నడవడం వల్ల కలిగే ఆరోగ్య ప్రయోజనాలు:
మోకాళ్ల నొప్పులు తగ్గిపోతాయి:
ఒక వయసు వచ్చిన తర్వాత మోకాళ్ల నొప్పులు రావడం చాలా సహజం. కానీ ఈ మోకాళ్ల నొప్పుల వల్ల నడవడమే కాదు.. కూర్చోవడం, పడుకోవడం కూడా కష్టంగా ఉంటుంది. అయితే మీరు రోజూ కాసేపు ముందుకి కాకుండా వెనక్కి నడిస్తే గనుక మోకాళ్ల నొప్పులు చాలా వరకు దూరమవుతాయి.
వెనక్కి నడవడం వల్ల మోకాళ్ల వాపు, నొప్పి వంటి సమస్యలు తగ్గిపోతాయని పరిశోధనలు కనుగొన్నాయి. కాళ్లకు గాయలు లేదా కీళ్లవాతం ఉన్నవారు ఇలా వెనక్కి నడిస్తే మంచి జరుగుతుందని పరిశోధకులు వెల్లడిస్తున్నారు.
నడుము నొప్పి తగ్గుతుంది:
నడుము నొప్పి చిన్న సమస్య అయితే కాదు. దీనివల్ల ఎంతో ఇబ్బంది పడాల్సి వస్తుంది. అయితే నడుము నొప్పితో బాధపడేవారికి కూడా రివర్స్ వాకింగ్ ఎంతో ప్రయోజనకరంగా ఉంటుందని ఆరోగ్య నిపుణులు చెబుతున్నారు. రోజూ కొన్ని నిమిషాలు వెనక్కి నడిస్తే నడుము నొప్పి నుంచి మంచి ఉపశమనం కలుగుతుంది. ఇది నడుము కండరాలకు మంచి వ్యాయామం కూడా అవుతుంది. వెనక్కి నడవడం వల్ల వెన్నెముకకు తక్షణ ఉపశమనం అందుతుంది.
కాళ్లను బలంగా చేస్తుంది:
ప్రతిరోజూ కొన్ని నిమిషాల పాటు మీరు వెనక్కి నడవడం వల్ల కాళ్లు బలంగా అవుతాయి. ఈ రివర్స్ వాకింగ్ మీ కాళ్ల వెనుక భాగంలో ఉన్న కండరాలకు మంచి వ్యాయామం అవుతుంది. ఇది కాళ్లపై ఎక్కువ ఒత్తిడిని కలిగిస్తుంది. ముందుకు నడవడం కంటే వెనక్కి నడవడమే మీ కాళ్లకు మంచి ప్రయోజనకరమైన వ్యాయామం అవుతుంది.
బరువు తగ్గిస్తుంది:
రివర్స్ వాకింగ్ బరువు తగ్గాలనుకుంటున్న వారికి కూడా ప్రయోజనకరంగా ఉంటుంది. మీరు ముందుకు నడవడం కంటే వెనక్కి నడిస్తేనే ఎక్కువ బరువు తగ్గుతారని నిపుణులు చెబుతున్నారు.
ఈ వాకింగ్ మీ శరీరంలో వెనుక భాగంలో పేరుకుపోయే కొవ్వును బాగా తగ్గిస్తుంది.మీరు గనుక ప్రతిరోజూ 15 నిమిషాల పాటు వెనక్కి నడిస్తే చాలా తొందరగా బరువు తగ్గుతారు.
మానసిక ఆరోగ్యంలో మెరుగుదల:
మీరు వెనక్కి నడుస్తున్నప్పుడు మీ మనసు దృష్టిని ఎక్కువ పెడుతుంది. అంటే ఇది మీ మెదడుకు మంచి వ్యాయామం కూడా అవుతుంది. అందుకే మీరు ప్రతిరోజూ కొన్ని నిమిషాల పాటు వెనక్కి నడిస్తే మీ మానసిక ఒత్తిడి, ఆందోళన వంటి సమస్యలు తగ్గిపోతాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి