Oats Storage Tips: ఓట్స్‌ ఎక్కువ కాలం ఫ్రెష్ గా ఉండాలంటే ఏం చేయాలి

Oats Storage Tips: మీకు ఓట్స్ అంటే ఇష్టమా? మీ ఇంట్లో ఎక్కువ మంది ఓట్స్ తింటారా? అయితే కచ్చితంగా మీరు ఈ టిప్ తెలుసుకోవాలి. ఓట్స్ చెడిపోకుండా ఎక్కువ కాలం ఫ్రెష్‌గా ఉండాలంటే ఏం చేయాలో ఇప్పుడు తెలుసుకుందాం. 

బ్రేక్ ఫాస్ట్ లో ఓట్స్ తినడం చాలా ఆరోగ్యం. ఎందుకంటే అందులో ఫైబర్ ఎక్కువగా ఉంటుంది. బరువు తగ్గడానికి ప్రయత్నిస్తున్న వారికి ఇది ఇంకా మంచిది. అందుకే చాలా మంది దీన్ని బల్క్ గా కొని స్టోర్ చేసుకుంటారు. కానీ ఓట్స్ కూడా ఇతర ఆహార పదార్థాల మాదిరిగానే సరిగ్గా నిల్వ చేయకపోతే త్వరగా చెడిపోతుంది. కాబట్టి ఓట్స్ చెడిపోకుండా ఎక్కువ కాలం ఫ్రెష్‌గా ఉండాలంటే ఏం చేయాలో ఇక్కడ తెలుసుకుందాం.

గాలి, వెలుతురు, ఎక్కువ వేడికి గురైతే ఓట్స్ చెడిపోయి రుచి, పోషకాలను కోల్పోతాయి. అంతేకాకుండా ఓట్స్‌ని సరిగ్గా నిల్వ చేయకపోతే ఫంగస్ రావచ్చు. కీటకాలు కూడా చేరొచ్చు. దీంతో అసలు రుచిని కోల్పోయి చేదుగా మారతాయి. 

ఓట్స్ చెడిపోకుండా ఉండాలంటే అవి బాగా ఎండినవై ఉండాలి. ఎండిన ఓట్స్‌లో తేమ తక్కువగా ఉంటుంది. అందువల్ల అవి చెడిపోయే అవకాశం చాలా తక్కువ.

మూత ఉన్న డబ్బాలు బెటర్

గాలి చొరబడని గాజు డబ్బాలో నిల్వ చేయడం ద్వారా ఓట్స్‌ని ఎక్కువ కాలం ఫ్రెష్‌గా ఉంటాయి. గాలిలో ఉండే తేమ వల్ల ఓట్స్‌లోకి కూడా తేమ చేరుతుంది. అందుకే మీరు ఓట్స్ ని గాజు జార్, ప్లాస్టిక్ డబ్బా లేదా జిప్ లాక్ బ్యాగ్‌లో వేసి నిల్వ చేయండి. ఇలా చేయడం వల్ల కీటకాలు కూడా చేరవు. 

చల్లని, పొడి ప్రదేశంలో నిల్వ చేయండి

ఓట్స్‌పై సన్ లైట్ డైరెక్ట్ గా పడకుండా చూసుకోండి.  వేడి నుండి దూరంగా ఉంచండి. ఓట్స్ పై వేడి పడితే అది దాని రుచిని, పోషకాలను కోల్పోతుంది. దీనివల్ల గోధుమ రంగులోకి మారుతాయి. అలా జరగకుండా ఉండాలంటే చల్లని, పొడి ప్రదేశంలో నిల్వ చేయండి.

ఫ్రీజర్‌లో నిల్వ చేయండి

మీరు ఓట్స్‌ని బల్క్ గా కొనుగోలు చేస్తే వాటిని ఫ్రీజర్‌లో ఉంచితే ఎక్కువ కాలం నిల్వ ఉంటాయి. ఇలా చేస్తే ఒక సంవత్సరం అయినా ఫ్రెష్‌గా ఉంటాయి. దీనికోసం ఓట్స్‌ని గాలి చొరబడని డబ్బాలో వేసి దాన్ని ఫ్రీజర్‌లో వేసి నిల్వ చేయండి. ఫ్రీజర్‌ లేకపోతే ఫ్రిజ్‌లో కూడా నిల్వ చేయవచ్చు. కానీ ఓట్స్ డబ్బా మూతను గట్టిగా మూయడం మర్చిపోవద్దు.