మారుతున్న జీవనశైలి, చెడు ఆహారాల వల్ల ప్రస్తుత కాలంలో చాలా మంది ఊబకాయం, డయాబెటీస్, హైబీపీ వంటి ఎన్నో సమస్యలతో బాధపడుతున్నారు. అయితే కొన్ని రకాల ఆహారాలను తింటే మీకు ఈ వ్యాధులొచ్చే ముప్పు తప్పుతుంది. బరువు కూడా తగ్గుతారు.
ఓవర్ వెయిట్, డయాబెటిస్ రెండూ గుండె ఆరోగ్యాన్ని దెబ్బతీస్తాయి. మీకు తెలుసా? అధిక బరువు కూడా డయాబెటీస్ కు కారణమవుతుంది. ఈ ఊబకాయం వల్ల మీకు హై బీపీ, అధిక కొలెస్ట్రాల్ వంటి సమస్యలు వచ్చే అవకాశం ఎక్కువగా ఉంది. వీటివల్ల మీకు గుండెజబ్బులు వచ్చే ప్రమాదం ఉంది. ఆరోగ్య నిపుణుల ప్రకారం.. మీరు మంచి హెల్తీ ఫుడ్ ను తింటే ఈ వ్యాధులేమీ రావు. అవేంటంటే?
బీపీ, డయాబెటిస్, బరువును తగ్గించే ఫుడ్స్
ఆకుకూరలు
ఆకు కూరలు ఆరోగ్యానికి ఎంతో మేలు చేస్తాయి. ముఖ్యంగా బచ్చలికూర మనల్ని ఎన్నో రోగాలకు దూరంగా ఉంచుతుంది. దీనిలో విటమిన్ ఇ, విటమిన్ సి, విటమిన్ కె, ఇనుము పుష్కలంగా ఉంటాయి. అలాగే యాంటీ ఆక్సిడెంట్లు, కాల్షియం కూడా మెండుగా ఉంటాయి.
ఈ ఆకు కూరను తింటే మీ శరీర రోగనిరోధక శక్తి పెరుగుతుంది. ఈ కూరలో ఉండే ఫైబర్, వాటర్ మీరు ఆరోగ్యంగా బరువు తగ్గడానికి సమాయపడతాయి. బచ్చలి కూరలో ఉండే నైట్రేట్ అనే సమ్మేళనం బీపీని కంట్రోల్ చేయడానికి సహాయపడుతుంది. దీంతో మీకు గుండె జబ్బులొచ్చే రిస్క్ తగ్గుతుంది. అలాగే బచ్చలి కూరలో గ్లైసెమిక్ ఇండెక్స్ తక్కువగా ఉంటుంది. కాబట్టి ఇది మధుమేహులకు ప్రయోజనకరంగా ఉంటుంది.
బాదం పప్పు
బాదం పప్పులు మన శరీరానికి అవసరమైన ఎన్నో పోషకాలను అందిస్తాయి. ముఖ్యంగా దీనిలో మెగ్నీషియం పుష్కలంగా ఉంటుంది. ఇది బీపిని కంట్రోల్ చేస్తుంది. రక్తపోటు నియంత్రణలో ఉంటే మీకు గుండె జ్బబులొచ్చే ప్రమాదం తగ్గుతుంది.
ఇకపోతే బాదం పప్పుల్లో మంచి మొత్తంలో ఉండే ఫైబర్ మీరు బరువు తగ్గడానికి సహాయపడుతుంది. అలాగే ఇవి షుగర్ ఉన్నవారికి కూడా ప్రయోజనకరంగా ఉంటాయి. ఇందుకోసం బాదం పప్పులను రాత్రంతా నానబెట్టి మరుసటి రోజు ఉదయం తొక్క తీసేసి తినాలి.
బెండకాయ
బీపీ, షుగర్, గుండె జబ్బులు ఉన్నవారికి బెండకాయ మంచి మేలుచేస్తుంది. బెండకాయను తింటే శరీరంలో పేరుకుపోయిన చెడు కొలెస్ట్రాల్ తగ్గుతుంది. ఇది గుండె జబ్బులకు మిమ్మల్ని దూరంగా ఉంచుతుంది. దీనిలో గ్లైసెమిక్ ఇండెక్స్ తక్కువగా ఉంటుంది. కాబట్టి ఇది రక్తంలో చక్కెర స్థాయిలను తగ్గించడానికి సహాయపడుతుంది. ఇకపోతే దీనిలో ఫైబర్ కంటెంట్ ఎక్కువ మొత్తంలో ఉంటుంది. ఇది బరువును తగ్గించడానికి బాగా సహాయపడుతుంది.
ఓట్స్
ఓట్స్ లో ఎన్నో ఔషదగుణాలుంటాయి. దీన్ని తింటే ఒకటి కాదు రెండు కాదు ఎన్నో ఆరోగ్య ప్రయోజనాలు కలుగుతాయి. ఓట్స్ లో మాంగనీస్, ఫాస్పరస్ మెగ్నీషియం, కాపర్, ఐరన్, జింక్ పుష్కలంగా ఉంటాయి. అలాగే ఓట్స్ లో బీటా గ్లూకాన్ అనే కరిగే ఫైబర్ ఎక్కువ మొత్తంలో ఉంటుంది.
ఇది కొలెస్ట్రాల్ ను తగ్గించి, బ్లడ్ షుగర్ ను కంట్రోల్ చేస్తుంది. అంతేకాదు దీన్ని తింటే మీరు ఎనర్జిటిక్ గా ఉంటారు. వెయిట్ కూడా తగ్గుతారు.
రాగులు
రాగుల్లో ఫైబర్, మెగ్నీషియం, పొటాషియం, ఫైటోన్యూట్రియెంట్స్ పుష్కలంగా ఉంటాయి. రాగులను తీసుకుంటే ట్రైగ్లిజరైడ్స్, ఎల్డిఎల్ కొలెస్ట్రాల్ తగ్గుతాయి. అలాగే హైబీపీ కంట్రోల్ అవుతుంది. రాగుల్లో యాంటీ ఆక్సిడెంట్స్ మెండుగా ఉంటాయి. రాగులు గుండెజబ్బులు, డయాబెటీస్ తో బాధపడేవారికి ఎంతో మేలు చేస్తాయి. దీనిలో ఉండే ఫైబర్ కంటెంట్ మీరు బరువు తగ్గేలా చేస్తాయి.