Snake Village: ఇది పాముల గ్రామం.. ప్రతి ఇంట్లో నాగుపాముకు ఒక చిన్న గది

Snake Village: భారతదేశంలో ఎన్నో వింతలు, విశేషాలు ఉన్నాయి. అలాంటి వాటిల్లో కొన్ని గ్రామాలు కూడా భాగమే. ఓ విచిత్రమైన ఊరే 'పాముల గ్రామం'. ఆ ఊరి గురించి ఎన్నో విశేషాలు ఉన్నాయి.

పాముల ఊరి కథ

మనదేశంలో ఎంతో వైవిధ్యభరితమైనది. ఈ దేశంలో ఎన్నో రకాల గ్రామాలు ఉన్నాయి. ఒక్కో గ్రామం ఒక్కో విషయానికి ప్రసిద్ధి చెందింది.  ప్రతి రాష్ట్రం, ప్రతి గ్రామానికి దానికంటూ ఓ ప్రత్యేక గుర్తింపు, సంప్రదాయం ఉన్నాయి. అలాంటి వాటిలో 'పాముల గ్రామం' ఒకటి. ఈ పేరు వినగానే కొందరికి భయం కలుగుతుంది. మరికొందరికి ఆశ్చర్యం కలుగుతుంది. కానీ ఈ ఊరి వెనకున్న కథ మాత్రం చాలా ఆసక్తికరంగా ఉంటుంది.

ఎక్కడుంది ఈ గ్రామం

ఈ పాముల గ్రామం మహారాష్ట్రలో ఉంది. పేరు 'షేత్‌పాల్'.  ఇక్కడి స్థానికులకు, పాములకు మధ్య ఉన్న అద్భుతమైన సంబంధం వల్లే ఈ ఊరు ప్రపంచవ్యాప్తంగా ఫేమస్ అయింది. మహారాష్ట్రలోని సోలాపూర్ జిల్లాలో ఈ షేత్‌పాల్ గ్రామం ఉంది. ఇక్కడి చాలా ఇళ్లలో పాముల కోసం, ముఖ్యంగా నాగుపాముల (Cobra) కోసం ప్రత్యేకంగా ఓ చిన్న గదిని లేదా చోటను కేటాయిస్తారు. ఈ ప్రదేశాన్ని పాములకు సురక్షితమైన నివాసంగా గ్రామస్థులు చెబుతారు. దశాబ్దాలుగా ఇక్కడ మనుషులు, పాములు శాంతియుతంగా కలిసి జీవిస్తున్నాయి. పాములను దైవాలుగా భావించి ఇక్కడ కొలుస్తారు.

పాముల రాకపోకల కోసం

షేత్‌పాల్‌లోని ఇళ్లలో పాములు తేలిగ్గా వచ్చిపోయేందుకు వీలుగా గోడల్లో ప్రత్యేకంగా గూళ్లు లేదా చిన్న ఖాళీ స్థలాలను ఏర్పాటు చేస్తారు. అలాగని ప్రతి ఇంట్లో నిత్యం పాములు ఉంటాయని చెప్పలేం. అవి ఎప్పుడైనా రావచ్చు… ఎప్పుడైనా పోవచ్చు. రాకపోనూ వచ్చు. అంతా అక్కడ పాముల ఇష్టమే.

అక్కడ పామును చంపితే

ఈ గ్రామ ప్రజలకు నాగులే ప్రధాన దేవత. నాగ దేవతపై అపారమైన భక్తి.  నాగ పంచమి లాంటి పండుగలప్పుడు పాములను పూజిస్తారు. వాటిని శుభసూచకంగా భావిస్తారు. ఈ ఊరిలో పామును చంపడం మహా పాపంగా, అపశకునంగా నమ్ముతారు. అలా చేసిన వారికి శిక్షలు కూడా విధిస్తారు.