Most Liveable Cities 2026: వరల్డ్ బెస్ట్ సిటీ ఏదో తెలుసా? ఇండియా, పాకిస్థాన్‌ నగరాల ర్యాంకులు ఇవే

Most Liveable Cities 2026: చాలా మంది ఇష్టపడే నగరాలు ఎన్నో ఉన్నాయి. కానీ, వరల్డ్ బెస్ట్ సిటీ ఏదో తెలుసా? గ్లోబల్ లివబిలిటీ ఇండెక్స్‌ 2026లో టాప్ లో నిలిచిన నగరాలు ఏవి? ఇండియా, పాకిస్థాన్ నగరాల ర్యాంకులు ఎంత? అనే ఆసక్తికర విషయాలు ఇక్కడ చూద్దాం.

నివాసానికి బెస్ట్ సిటీలు ఇవే

ప్రపంచంలో జీవించడానికి అత్యంత సౌకర్యవంతమైన నగరాలు ఏవి? ఎక్కడ ఉంటే ఆరోగ్యకరమైన, ప్రశాంతమైన జీవితం గడపవచ్చు? ఈ ప్రశ్నలకు సమాధానం ఇస్తూ ‘ది ఇకనామిస్ట్’ గ్రూప్‌కు చెందిన ఎకనామిస్ట్ ఇంటెలిజెన్స్ యూనిట్ (EIU) ప్రతిష్ఠాత్మక ‘గ్లోబల్ లివబిలిటీ ఇండెక్స్ 2026’ జాబితాను విడుదల చేసింది. ప్రపంచవ్యాప్తంగా ఉన్న 173 నగరాలను పరిశీలించి ఈ ర్యాంకులను ఖరారు చేశారు.

నగరాల్లోని విద్యా సౌకర్యాలు, శాంతిభద్రతలు, వైద్య సేవలు, ఇన్‌ఫ్రాస్ట్రక్చర్, అలాగే సంస్కృతి, పర్యావరణం వంటి ఐదు కీలక అంశాల ఆధారంగా ఈ స్కోర్లను కేటాయించారు. ఈ ఏడాది విడుదలైన జాబితాలో కొన్ని దేశాల నగరాలు టాప్ లో మెరవగా, మరికొన్ని ఆసియా నగరాలు తీవ్ర నిరాశపరిచాయి.

టాప్ లో కోపెన్‌హేగన్, వియన్నా

2026 ఇండెక్స్‌లో డెన్మార్క్ రాజధాని కోపెన్‌హేగన్ వరుసగా రెండో ఏడాది కూడా ప్రపంచంలోనే అత్యంత నివాసయోగ్యమైన నగరంగా మొదటి స్థానాన్ని కైవసం చేసుకుంది. ఈ నగరం 100కు గాను 98 పాయింట్లు సాధించింది. స్టెబిలిటీ, ఎడ్యుకేషన్, ఇన్‌ఫ్రాస్ట్రక్చర్ విభాగాల్లో 100కు 100 పర్ఫెక్ట్ స్కోర్ సాధించడం విశేషం. హెల్త్‌కేర్‌లో 96, కల్చర్‌లో 95 పాయింట్లు రాబట్టి అత్యుత్తమ ప్రజాసేవలు, భద్రతకు నిదర్శనంగా నిలిచింది.

రెండో స్థానంలో ఆస్ట్రియా రాజధాని వియన్నా 97.1 స్కోరుతో నిలిచింది. గతంలో పలుమార్లు తొలి స్థానంలో నిలిచిన వియన్నా, ఈసారి కూడా తన అద్భుతమైన అర్బన్ మేనేజ్‌మెంట్, మౌలిక వసతులతో టాప్-2లో కొనసాగుతోంది. ఇక మూడు, నాలుగు స్థానాలను ఆస్ట్రేలియాకు చెందిన మెల్‌బోర్న్, సిడ్నీ నగరాలు సాధించాయి. మెల్‌బోర్న్ మూడో స్థానంలో నిలవగా, సిడ్నీ నాల్గో స్థానాన్ని కైవసం చేసుకుంది. ఆస్ట్రేలియాకు చెందిన మూడు నగరాలు టాప్ 10లో ఉండటం విశేషం.

ఐదో స్థానంలో స్విట్జర్లాండ్‌కు చెందిన జూరిచ్, ఆరో స్థానంలో జెనీవా నిలిచాయి. సంస్కృతి, పర్యావరణ విభాగాల్లో స్కోరు కాస్త తగ్గడంతో ఈ రెండు నగరాలు ఒక్కో మెట్టు కిందకు దిగాయి. ఏడో స్థానంలో జపాన్‌కు చెందిన ఒసాకా నగరం నిలిచింది. అత్యుత్తమ వైద్య వసతులు, తక్కువ నేరాల రేటు ఒసాకాకు ప్లస్ పాయింట్‌గా మారాయి.

ఇండియా నగరాల పరిస్థితి ఏంటి?

ఈ అంతర్జాతీయ జాబితాలో భారతదేశానికి చెందిన ఏ ఒక్క నగరం కూడా టాప్ 100లో చోటు దక్కించుకోలేకపోయింది. భారత్‌లోని ప్రముఖ మెట్రో నగరాలు చాలా వెనుకబడి ఉన్నాయి. దేశ రాజధాని ఢిల్లీ 120వ ర్యాంకులో నిలిచింది. దీని తర్వాత ముంబై 121వ స్థానం, చెన్నై 123వ స్థానం, ఐటీ హబ్ బెంగళూరు 127వ స్థానంలో ఉన్నాయి.

ఢిల్లీ మొత్తం స్కోరు 100కు 48.1గా నమోదైంది. విద్య రంగంలో 66.7 స్కోరుతో మెరుగ్గా ఉన్నప్పటికీ, వైద్య రంగంలో 41.7, పర్యావరణం, సంస్కృతి విభాగంలో కేవలం 35.4 స్కోరు మాత్రమే సాధించింది. విపరీతమైన వాయు కాలుష్యం, మౌలిక వసతుల కొరత, వేగవంతమైన పట్టణీకరణ వల్ల వచ్చే సమస్యలే భారత నగరాలు వెనుకబడటానికి ప్రధాన కారణాలుగా ఈ సర్వే పేర్కొంది.

పాతాళంలో పాకిస్థాన్.. కరాచీ ర్యాంక్ ఎంతంటే?

మన పొరుగు దేశమైన పాకిస్థాన్ పరిస్థితి మరింత దారుణంగా ఉంది. ఈ సర్వే నిర్వహించిన 173 నగరాల్లో పాకిస్థాన్‌కు చెందిన కరాచీ నగరం 170వ స్థానంలో నిలిచింది. ప్రపంచంలోనే జీవించడానికి అత్యంత అనుకూలం కాని నగరాల జాబితాలో కరాచీ ఒకటని రిపోర్టు వెల్లడించింది.

కరాచీకి మొత్తం 100కు గాను కేవలం 43 స్కోరు మాత్రమే వచ్చింది. శాంతిభద్రతల విభాగంలో అతి తక్కువగా 20 పాయింట్లు, హెల్త్‌కేర్‌లో 54, పర్యావరణంలో 36, విద్యలో 75, ఇన్‌ఫ్రాస్ట్రక్చర్‌లో 52 పాయింట్లు వచ్చాయి. కరాచీ కంటే కింద కేవలం ఢాకా, త్రిపోలీ, డమాస్కస్ నగరాలు మాత్రమే ఉన్నాయి.

ఆసియా నగరాల పురోగతి

మొత్తంగా చూస్తే ఈఐయూ 2026 గ్లోబల్ లివబిలిటీ ఇండెక్స్ ప్రకారం ఐరోపా, ఆస్ట్రేలియా నగరాలు అగ్రస్థానాల్లో తమ ఆధిపత్యాన్ని నిలుపుకున్నాయి. అదే సమయంలో ఆసియా నగరాల్లో ముఖ్యంగా వైద్య సేవల్లో మెరుగుదల కనిపిస్తోంది. అయితే వేగంగా పెరుగుతున్న జనాభా, కాలుష్యం, మౌలిక వసతుల లేమి వంటి సమస్యల వల్ల దక్షిణ ఆసియా నగరాలైన ఇండియా, పాకిస్థాన్‌లలోని మెట్రోలు ఇంకా చాలా దూరం ప్రయాణించాల్సి ఉందని ఈ సర్వే స్పష్టం చేస్తోంది.