పునీత్ రాజ్ కుమార్ జీవితంలో ఎన్నో అందమైన విశేషాలు ఉన్నాయి. పునీత్ హంగులు, ఆర్భాటాలకు దూరంగా సింపుల్ గా ఉంటారు. కుటుంబ విషయాలని ఇంటి వరకే పరిమితం చేస్తారు.
కన్నడ పవర్ స్టార్ పునీత్ రాజ్ కుమార్ మృతి ఇప్పటికీ నమ్మశక్యం కాని విషాదం. ఎంతో ఆరోగ్యంగా కనిపించే పునీత్ గుండెపోటుతో 46 ఏళ్ల పిన్న వయసులో మరణించడం జీర్ణించుకోలేని విషయం. అభిమానులంతా శోకసంద్రంలో మునిగిపోగా.. ఆయన కుటుంబంలో విషాద ఛాయలు అలుముకున్నాయి.
ఇక Puneeth Rajkumar జీవితంలో ఎన్నో అందమైన విశేషాలు ఉన్నాయి. పునీత్ హంగులు, ఆర్భాటాలకు దూరంగా సింపుల్ గా ఉంటారు. కుటుంబ విషయాలని ఇంటి వరకే పరిమితం చేస్తారు. చాలామంది సెలెబ్రిటీల లాగే పునీత్ రాజ్ కుమార్ కూడా ప్రేమ వివాహం చేసుకున్నారు. పునీత్, అశ్విని దంపతులది అందమైన ప్రేమ కథ.
కొన్నిసార్లు మన లైఫ్ పార్ట్నర్ పక్కనే ఉన్న గుర్తించలేం. భవిష్యత్తులో ఎవరు ఎవరి వివాహం చేసుకుంటారనేది మన చేతుల్లో లేదు. పునీత్ జీవితంలో కూడా ప్రేమ పెళ్లి అనుకోకుండా జరిగాయి. చిక్ మగళూరుకు చెందిన అశ్వినిని పునీత్ ఓ పార్టీలో కలుసుకున్నాడు. అప్పుడే ఇద్దరి చూపులు కలిశాయి.
పునీత్ వ్యక్తిత్వానికి అశ్విని ఆకర్షితురాలైంది. పునీత్ కూడా అశ్వినికి దగ్గరయ్యేందుకు ప్రయత్నించాడు. అలా వీరిమధ్య స్నేహం చిగురించింది. ఒకరినొకరు పూర్తిగా అర్థం చేసుకోవడంతో పెళ్లిపీటలెక్కడానికి ఎంతో సమయం పట్టలేదు. 1999 డిసెంబర్ 1న పునీత్, అశ్విని ల వివాహం జరిగింది.
అశ్వినికి పునీత్ అంటే పంచప్రాణాలు. గతంలో ఓ ఇంటర్వ్యూలో అశ్విని తమ ప్రేమ గురించి ఆసక్తికర విషయాలు తెలిపింది. పునీత్ లో మీకు నచ్చినది ఏమిటి.. ఆయన్ని ఎలా ప్రేమించారు అని ప్రశ్నించగా అశ్విని ఆసక్తికర సమాధానం ఇచ్చింది. నాకు ఆయన చూడగానే నచ్చారు. ఇక ఆయన వ్యక్తిత్వం గురించి తెలుసుకున్నపుడు సింప్లిసిటీ, ఎదుటివారికి సాయం చేసే గుణం నాకు ఎంతగానో నచ్చాయి.
ఆయన అందరిని వెంటనే నమ్మేస్తారు. స్నేహితులతో కలసి ట్రావెల్ చేయడం ఆయనకు ఎంతో ఇష్టం. ఎప్పుడూ చిరునవ్వుతో ఉంటారు. ఇవన్నీ ఆయన ప్రేమలో పడేలా చేశాయి అని అశ్విని చెప్పుకొచ్చింది. వీరిద్దరి ప్రేమకు ప్రతిరూపంగా ఇద్దరు కుమార్తెలు జన్మించారు. వందిత, దృతి లు పునీత్, అశ్విని ల సంతానం. పునీత్ మరణ వార్తతో ఆయన కుటుంబ సభ్యులు ఎంతటి వేదన అనుభవిస్తున్నారో అర్థం చేసుకోవచ్చు. యువతలో అద్భుతమైన క్రేజ్ సొంతం చేసుకున్న పునీత్ అగ్ర నటుడిగా దూసుకుపోతున్నారు. ఇంతలోనే గుండెపోటు ఆకస్మికంగా పునీత్ ని బలితీసుకుంది.
Also Read: పునీత్ చేసిన మరో గొప్ప పని, టీఎస్ఆర్టీసీ తరుపున సజ్జనార్ నివాళి