శ్రీదేవిని తలుచుకుని ఎమోషనల్ కామెంట్స్ చేసిన జాన్వీ కపూర్,

శ్రీదేవి మరణం తరువాత ఆ బాధనుంచి ఎలా బయటపడ్డారన్న విషయాన్ని వెల్లడించింది స్టార్ హీరోయిన్ జాన్వీ కపూర్. 

శ్రీదేవి కూతురు జాన్వీ కపూర్

బాలీవుడ్ యువ నటి జాన్వీ కపూర్ తన తల్లి, సూపర్ స్టార్ శ్రీదేవిని కోల్పోయిన బాధను తరచుగా గుర్తుచేసుకుంటూ, భావోద్వేగానికి లోనయ్యింది. మాతృదినోత్సవం సందర్భంగా ఆమె పాత ఇంటర్వ్యూ ఒకటి మళ్ళీ వెలుగులోకి వచ్చింది. శ్రీదేవి మరణం తర్వాత, తన చెల్లెలు ఖుషీ కపూర్ తనకు ఎలా ఓదార్పునిచ్చిందో ఆమె వివరించింది.

2018లో శ్రీదేవి మరణం భారతదేశానికే షాక్ ఇచ్చింది. ఆ సమయంలో తనలో ఏర్పడిన శూన్యాన్ని వివరిస్తూ జాన్వీ, "ఏం జరుగుతుందో, ఇంకేం చేయాలో అర్థం కాలేదు. కానీ, నా చెల్లెలు ఖుషీ, నాకన్నా చిన్నదైనా, నన్ను ఓదార్చడానికి తను ఏడవకుండా ఉంది. ఆమె నాకన్నా ధైర్యంగా, పరిణతితో వ్యవహరించింది" అని చెప్పింది. చెల్లెలి లో  ఈ ఊహించని ధైర్యం, మద్దతు ఆ సమయంలో తనకు చాలా బలంగా నిలిచిందని జాన్వీ గుర్తుచేసుకుంది.

శ్రీదేవి మరణం తర్వాత బలపడిన బంధం

తల్లి మరణం తర్వాత, తనకూ, చెల్లెలు ఖుషీకీ, తండ్రి బోనీ కపూర్‌కీ మధ్య బంధం మరింత బలపడిందని జాన్వీ తెలిపింది. "ఆ సంఘటన తర్వాత, మా కుటుంబంలో అందరం ఒకరికొకరం దగ్గరయ్యాం. నాన్న, చెల్లెలిని కాపాడుకోవాల్సిన బాధ్యత నాకుందని నేను భావించాను. ముఖ్యంగా ఖుషీ, ఆమె చాలా చిన్నది, ఆమెను కాపాడుకోవాలి, ఆమెకు ధైర్యం చెప్పాలి అని అనుకున్నాను," అని జాన్వీ తన మనసులోని మాట చెప్పింది. ఆ సమయంలో తండ్రి బోనీ కపూర్ కూడా మానసికంగా తనపై ఆధారపడ్డారని ఆమె పేర్కొంది.

శ్రీదేవి కల నెరవేర్చిన జాన్వీ కపూర్

ఫిబ్రవరి 2018లో దుబాయ్‌లో శ్రీదేవి మరణించారు. ఈ విషాద సంఘటన జరిగిన కొన్ని నెలలకే, జూలై 2018లో, జాన్వీ మొదటి సినిమా 'ధడక్' విడుదలైంది. తల్లి కలను నెరవేర్చాల్సిన బాధ్యత జాన్వీపై ఉంది. తల్లిని కోల్పోయిన బాధ మధ్యలో తన మొదటి సినిమా విజయాన్ని చూడాల్సిన పరిస్థితి ఆమెకు ఏర్పడింది. కుటుంబ సభ్యుల మద్దతు, తన వృత్తిపరమైన నిబద్ధత కారణంగా ఆమె ఆ పరిస్థితిని ధైర్యంగా ఎదుర్కొంది.

తల్లి జ్ఞాపకాలతో జాన్వీ కపూర్

ఈ సంఘటన తన జీవితంపై దృక్పథాన్నే మార్చేసిందని జాన్వీ చాలాసార్లు చెప్పింది. తల్లి జ్ఞాపకాలు ఎల్లప్పుడూ తనతోనే ఉంటాయని, ఆమె ఆశీర్వాదం తనకు దారి చూపుతుందని జాన్వీ నమ్ముతుంది. శ్రీదేవి మరణం జాన్వీ కపూర్ జీవితంలో తీరని లోటును ఏర్పరిచినప్పటికీ, కుటుంబ సభ్యులు, ముఖ్యంగా చెల్లెలు ఖుషీతో ఆమె బంధం, పరస్పర మద్దతు, ఆ కష్టతరమైన దుఃఖాన్ని ఎదుర్కోవడానికి ఆమెకు గొప్ప బలంగా నిలిచాయి.