Vishnu Vishal: అరుదైన వ్యాధితో బాధపడుతున్న స్టార్‌ హీరో.. మూడేళ్లు దాచిన నిజం బట్టబయలు

Vishnu Vishal: గట్టా కుస్తీ 2(మట్టి కుస్తీ) సినిమా ప్రమోషన్స్‌లో బిజీగా ఉన్న హీరో విష్ణు విశాల్, తాను ఓ అరుదైన వ్యాధితో బాధపడుతున్నట్లు షాకింగ్ విషయం బయటపెట్టారు.

గట్టా కుస్తీ(మట్టి కుస్తీ)2తో రాబోతున్న విష్ణు విశాల్‌

తమిళంలో విభిన్నమైన కథలను ఎంచుకుంటూ సక్సెస్‌లు అందుకుంటున్న హీరో విష్ణు విశాల్. ఆయన నటించిన లేటెస్ట్ మూవీ 'గట్టా కుస్తీ 2'. ఇది గతంలో వచ్చిన `గట్టా కుస్తీ`(తెలుగులో మట్టి కుస్తీ)కి సీక్వెల్‌.  సినిమా జులై 3న థియేటర్లలో రిలీజ్ కానుంది. ఈ మూవీ ప్రమోషన్స్‌లో భాగంగా విష్ణు విశాల్ ఓ స్టేట్‌మెంట్ రిలీజ్ చేశారు. తాను ఆటో ఇమ్యూన్ వ్యాధితో బాధపడుతున్నట్లు అందులో వెల్లడించారు.

తన ఆరోగ్య సమస్యని వెళ్లడించిన విష్ణు విశాల్‌

విష్ణు విశాల్ తన స్టేట్‌మెంట్‌లో ఇలా రాశారు: 'ముందుగా మీ ప్రేమకు, నాపై చూపిస్తున్న కేర్‌కు మనస్ఫూర్తిగా ధన్యవాదాలు. నా లేటెస్ట్ పోస్టులపై మీరు పెట్టిన కామెంట్స్ అన్నీ చూశాను. అవి నాకు చాలా ఎమోషనల్‌గా, ఉత్సాహంగా అనిపించాయి. అందుకే ఈ విషయాన్ని మీతో నేరుగా పంచుకోవాలనుకుంటున్నా` అని అన్నారు. తాను అనారోగ్యంతో బాధపడుతున్నట్టు తెలిపారు. 

ఆటో ఇమ్యూన్‌ వ్యాధితో బాధపడుతున్న విష్ణు విశాల్‌

ఈ మధ్య నా ముఖం నీరసంగా కనిపిస్తోందని చాలామంది గమనించారు. దానికి కారణం, గత 3-4 ఏళ్లుగా నేను ఆటో ఇమ్యూన్ వ్యాధితో బాధపడుతున్నాను. దానికోసం డాక్టర్లు సూచించిన మందులు వాడుతున్నాను. ఆ మందుల సైడ్ ఎఫెక్ట్ వల్లే నాలో ఆ నీరసం. కానీ నా ఆరోగ్యానికి ఈ ట్రీట్‌మెంట్ చాలా అవసరం. అదే సమయంలో, మీరు చూపిస్తున్న ప్రేమ, నా పని మీద నాకున్న నమ్మకం, `గట్టా కుస్తీ 2' కోసం రాత్రింబవళ్లు కష్టపడిన టీమ్ పట్ల నా బాధ్యత నన్ను ముందుకు నడిపిస్తున్నాయి' అని విష్ణు విశాల్ తెలిపారు.

గట్టా కుస్తీ 2 మిమ్మల్ని ఆకట్టుకుంటుంది..

‘అందుకే ఆరోగ్య సమస్యలు ఉన్నా, సినిమా ప్రమోషన్లలో పాల్గొంటున్నాను. నా ఆరోగ్యం త్వరలోనే మెరుగుపడుతుంది. మీరు చూపిన కేర్, నా ఆరోగ్యంపై మరింత శ్రద్ధ పెట్టేలా చేసింది. ప్రతి కామెంట్‌కు, మీ సపోర్ట్‌కు థ్యాంక్స్. ప్రస్తుతం ’గట్టా కుస్తీ 2' ప్రమోషన్స్ చివరి దశలో ఉన్నాం. చాలా నమ్మకంతో, ఉత్సాహంగా ఉన్నాను. జులై 3న థియేటర్లలోకి వస్తున్న ఈ సినిమాను మీరంతా చూస్తారని ఎదురుచూస్తున్నా' అని విష్ణు విశాల్ వెల్లడించారు. ఇదిలా ఉంటే విష్ణు విశాల్‌ భార్య బ్యాడ్మింటన్‌ ప్లేయర్‌ గుత్తా జ్వాల అనే విషయం తెలిసిందే.